لا تباطيتي بوصلك ..والبطى ماني خويٍ له

Part 11

بيت بو نواف ..
المها منسدحه بألم : واه ياخشمي
نواف بقلق : اوديتس المستشفى
المها : لالا اخاف يطلع منكسر صدز .. اقول عز
عز فز : هلا
المها : عطني بسكوت كندر ..كود الألم يخف
عز بسرعه مد لها مجموعة بساكيت
ام نواف وهي تضغط على خشم المها بمنديل : تحسين بألم واجد ولا خفيف
المها: واااججد مير الله يهديتس يمه .. كان وافقتي من بدري وريحتينا .. ذحين كيف اروح وخشمي تسذا ..ليش هالأكشن يعني .. لازم اخفف الورم بمكياج
عز رفع يده يدعي : ياارب يطيب قبل باتسر
المها: عز اوعدني بشيء
عز : وشهو
المها : انك ماتجي تراضيني ابد حتى لو انصرعت بتسا.. ماندري يمكن المره الجايه عيني تفقشها من قوة لطافتك
عز بسرعه : وعد وعدد مابسويها مرةٍ ثانيه .. بس انتي طيبي بسرعه تكفين .. تأنيب الضمير مو مخليني
ام نواف : يلا معليه بسيطه
المها قامت : يمه انتي راضيه اني اروح ولالا تكفين..ترا والله مابروح اذا انتي زعلانه مني
ام نواف وهي تمسح على راس بنتها : راضيه يمي راضيه.. روحي واستمتعي فليها معاهم ولا تنسين تصورين لي
المها : واذا احد قالي وين امتس
ام نواف : قولي تعبانه ولا مشغوله دبري اي عذر ..
المها بخرعه : بسم الله عليتس يمه مقدر اتفاول
نواف بعصبيه : اجل قولي مشغوله خلاص ! وبعدين منهو الحرمه الي بتحقق معتس تسذا
يوم العزيمه ..
الكل مجتمع ويجهز .. والجد كارف العيال كرف .. والبنات حوسة المكياج ..
فلك بقهر : بناات  الايلاينر مب راضي يزبط
ريما بثقه : تعالي انا أسويه لتس
فلك جات وجلست عندها وريما تسوي لها ..
ريما بتهديد: فلك قسم بالله لو تتحركين ياويلتس ترا بالايلاينر وسط عينتس

في غرفة ساره ..
تحاول تتجهز صار لها فتره طويله ماحضرت عزايم ..من يوم انسجن زوجها قبل سنه وهي مكتأبه وحابسه نفسها ..وتفكر كيف تواجه كلام للناس الي بيقولونه  لها ...يقطع تفكيرها صوت دق الباب
ساره بصوت عالي : مين
ميلاف بصوت هادئ : انا ميلاف
توجهت ساره تفتح الباب ..
ميلاف ببلشه رفعت شنطة مكياجها : ممكن اتجهز عندتس ..تحت الغرفه حوسه وازعاج مايخلون الواحد يركز صراخ ملاك ( مايقولون لها خاله زي فراس) عشان شعرها مازبط (وبأستغراب) انتي ما تجهزتي؟
ساره: هلا ادخلي نسولف ..هالحين بجهز معتس  تعالي شوفي وش يليق كعب على فستاني الاحمر ..
عند العيال ..
الجد وهو جالس بصوت عالي : يااا منصوورر
منصور وهو يفرش الفرش : ياالبيه
الجد : دق على ولد خالتس البتال (ولد غزلان)وين وصلو علامهم ابطو تسذا
يقطع كلامهم صوت سياره مسرعه تدخل الحوش والغبار يتناثر وراها ..
منصور بأبتسامه : عانيهم جو ..
تنزل غزلان مع ولدها الصغير فادي ووراها ولدها البتال متوجهين الا الجد
الجد بعصبيه : انا كم مره اقول لتس لاتسرع ماتفهم
البتال بضحكه : شسوي ياخي .. خفت ابطي وتقوم علي
غزلان بهدوء وهي تسلم على يد ابوها: اخبارتس يبه ..
الجد بأبتسامه : بخير الحمدلله (وبأستغراب )الا وين بناتس ..
غزلان بأحباط : ابطو علي بالتجهيز ..سحبت عليهم قلت لعبدالله يتحراهم ويجيبهم ..شسوي لزومن اجي بدري اساعدهم
توجه منصور بأبتسامه لغزلان : علومتس يا خاله
غزلان بأبتسامه : بخير الحمدلله ..

سيارة بو نواف ..
المها دقت على فلك متحمسه تقول لها المفاجأه
فلك : هلا
المها بدون مقدمات : اخبارتس ..الا تخيلي عندي مفاجأه لتس
فلك بفضول : الحمدلله .. وش هي
المها بحماس : تخيلييي فلك بجييكمم ديرتكمم متحمسه بقابل خالاتس وبنات خالاتسس متخيله
فلك بحماس وصدمه : تسذااببه
المها : والله والله ذحين بالطريق حنا
فلك: اخييراا مابغيتوو تجونن حياتس ..قسم بيصير اكشن هنيا ..دايما كل عزيمه يا ينصرع واحد او تصير مهاوشه ..
المها : والله متحمسهه ..اخيرا
فلك : انتي متجهزه
المها: ايه قاعده اتمكيج بالسياره ..مسكين نواف مظلل السياره عشاني وكلشوي اقول وقف بعدل الايلاينر
فلك يضحكه: الله يعينه عليتس ..انا باقي لي شوي سكري سكري عشان اكمل
عند الجد ..
فراس جلس بتعب : هاه يبه تسذا
الجد بعصبيه : مب تسذا يالاحول الفرشه مايله
سيف وهو يعدل الفرشه : تسذا تسذا
الجد : ايه صح عليتس
فراس بصدمه لف لسيف : يا تسذاب ماتغير شي فيها
منصور بتعب : خلصنا تسذا مابغينا الضيوف شوي بيجون
قاطع كلامهم سيارة عبدالله داخله الحوش بهدوء ..
فراس بترحيب : يالله حيه
عبدالله بأبتسامه وهو لابس نظارته الشمسيه وعاصب الشماغ على راسه : الله يبقيتس
وبهدوء ينزلون ريتال وترف متوجهين للجد يسلمون عليه ..
سيف اول ماشافهم غض بصره وراح للمجلس
فراس تقدم : يالله حيهم (وبطقطقه)رفع يده يمثل انه معاه سلاحه ويقول : طعطععع شرايتس بسلاحي
ترف : ايه ايه حلو
رتيل بضحكه : آخ يافراس طول عمرك سامج
فراس تقدم حضنهم : هذا جزاتي اغير جوكم ..
منصور شاف عيون رتيل بالمكياج وعبايتها آخر زر مفكوك وباين منه فستانها حس بغيره وعصبيه (منصور غيور )واكيد بتسألون كيف عرف رتيل من اختها لان قضى اغلب طفولته معاها ويقدر يميزها بين كل من بنات خالاته ..
رتيل توجهت تسلم على الجد وبسرعه فراس سحب ترف على جنب
فراس بهمس وهو يعرف ان ترف ماتخبي عليه شي:
اسمعي ابوتس جاكم بعد آخر مره طردناه فيها ؟
ترف بسرعه : لا معليك واذا جا بقول لتس اصلا
فراس : كفو ..ولاتخافين من شي انا معتس

دخل ابو فلك معاه كراتين قوارير مويا
الجد بصدمه : لا يبناخي  ليش جبتها
ابو فلك وهو ينزل الكراتين : ابد والله قلت يمكن تنقص ..قلت اجيب احتياط
الجد : الله يصلحك بس..الخير واجد (وبعصبيه) انت لزومن تقعد قدامي ولا تتحرك باقي تجيب الذبايح هذا الي ناقص بس
عبدالله بضحكه : اول مره اشوف ضيف يحب ينكرف
الجد وكانه تذكر : قم قمم يا عبدالله جييب السلااح لزومن نرحب بضيوفه ..تلقاه عند جدتك اسألها عنه فز عبدالله وهو يحط اصباعه على خشمه : على خشمي
وتوجه للبيت ينادي جدته
عبدالله بصوت عالي : ياااوللدد يااجدده يااججدده
وبسرعه البنات انحاشو وتوزعو بالغرف..
مريم : ادخل ياعبدلله مامن احد
عبدالله سلم عليها وقال : وين جدتي يا خاله .. جدي يبغى سلاحه
مريم : تلقاها بالمطبخ روح من الباب الخلفي في حريم جو
عبدالله وهو خارج : تمام