အော်တစ်ဇင်ဇနီးလေးအား ကမ်းကုန်အောင်အလိုလိုက်ခြင်း (ဘာသာပြန်)

Chapter 21+22

💘Chapter 21
မျက်နှာဖြတ်ရိုက်ခြင်း

"သူ့ကိုဖမ်းကြ..."

တုလီရွှင်း၏အမိန့်ကိုလက်ခံရရှိပြီးနောက် အရာရှိကျန့်က သူ၏လက်အောက်ငယ်သားများအား အစေခံကို ဖမ်းချုပ်ခိုင်းလိုက်၏။

သို့ပေငြား ချန်မိသားစုမှ တစ်စုံတစ်ယောက်ကိုဖမ်းရခြင်းအတွက် သူအလွန်ကိုမှစိတ်ညစ်နေမိသည်။သူမက အရေးမပါသောအစေခံတစ်ဦးမျှသာဖြစ်သော်လည်း ချန်မိသားစုအတွက်သိက္ခာကျစရာဖြစ်သဖြင့် ချန်မိသားစုကိုဆန့်ကျင်သည်ဟု မှတ်ယူ၍ရနိုင်လေသည်။

အစေခံကို ဖမ်းပြီးနောက် ကိစ္စကပြေလည်သွားပြီဟု လူတိုင်းတွေးခါရှိသေး ဝေ့ချန်က အရာရှိကျန့်၏လက်ထဲဖိုင်အိတ်ကို ပြန်ယူလိုက်လေသည်။

အရာရှိကျန့် ပဟေဠိဖြစ်သွား၏။
"ဝေ့သခင်လေး ဒါကသံသယရှိသူကို တရားဆွဲနိုင်မဲ့သက်သေလေ...ဘာလို့ပြန်ယူချင်ရတာလဲ"

ဝေ့ချန်က သူ့လက်ထဲကဖိုင်အိတ်ကိုမြှောက်ပြလိုက်ပြီးဆို၏။
"ဘာဒဏ်ရာစစ်ဆေးမှုရလဒ်မှမရှိဘူး...သံသယရှိသူကိုအပြစ်ဝန်ခံအောင်လုပ်ဖို့နည်းလမ်းတစ်ခုသက်သက်ပဲ...စာရွက်ဗလာ လေးငါးရွက်တင်ပါ"

တုလီရွှင်း၏ မျက်ခုံးများ အနည်းငယ်ကြုံ့သွားပေမဲ့ များမကြာမီ ပြန်လည်ပြေလျော့သွားသည်။သို့ပေမဲ့ ဝေ့ချန်အပေါ်သို့ရောက်နေသော သူမအကြည့်ကအနည်းငယ်ပိုအေးစက်လာလေသည်။

ချန်နှင့်ဝေ့မိသားစုများ၏ ကိစ္စများက သူကြည့်နေ၍ဖြစ်သည့်အရာမဟုတ်မှန်း အရာရှိကျန့်သိလေသည်။ထို့ကြောင့် အစေခံကိုဖမ်းပြီးနောက် သူချက်ချင်းထွက်လာခဲ့လိုက်သည်။သူက ချန်နှင့်ဝေ့မိသားစုများကဲ့သို့သော အကောင်ကြီးကြီးနှစ်ကောင်ကို မရွှေ့နိုင်သည့် ပမွှားလေးဖြစ်သည်မဟုတ်ပါလော။

အရာရှိကျန့် တံခါးဝသို့ရောက်ချိန်မှာ ဝေ့ချန်၏အေးစက်စက် အသံပျံ့လွင့်လာသည်ကိုသူကြားလိုက်ရသည်။

"ဒီတစ်ခေါက်တော့ တရားမျှတမှုအတွက် မိသားစုကိုစတေးပေးခဲ့တဲ့ သခင်မချန်ကိုကျေးဇူးတင်ရမှာပဲ...သူ့ကျေးဇူးကြောင့် ကျွန်တော်တို့ ချန်လီကိုနှိပ်စက်ခဲ့တဲ့ တရားခံကိုဖမ်းမိနိုင်ခဲ့တယ်လေ"