For Unicode
" ရှင်းယံ "
" အင်း "
အရိပ်ရတဲ့ ပိတောက်ပင်ကြီးရဲ့ အောက်မှာ ဖျာတစ်ချပ်ခင်းရင်း သူတို့နှစ်ယောက် အေးအေးသက်သာပဲ အနားယူနေတယ်။
ဘေးမှာ ကုလားထိုင်တစ်လုံးရှိကာ မေမေဈေးမသွားခင် တင်ပေးသွားတဲ့ လိမ္မော်ရည် တွေက အအေးငွေ့တွေ ကင်းစင်ပြီး ရေစက်လက်နဲ့ ခုံပေါ်ကို အိုင်ထွန်းနေ၏။
" မင်း ငါ့ကို မကြိုက်တော့ရင် ချက်ချင်း ပြောပြီး လမ်းခွဲရမယ်နော် "
မဉီးမချွတ်...။ ကိုယ့်မှာတောင် ရွှေထုပ်လေး ကောက်ရထားသလို ဘယ်နားထားရ ဝှက်ရမည်မသိဖြစ်နေရတဲ့ အထဲ သင်းကလေးက ပြောလိုက်ရင် တစ်ခါမှ အကောင်းမပါ။
" ဥပမာ ငါ့ထက်ပိုကြိုက်သွားတာ ဖြစ်ဖြစ်ကွာ၊ နောက်မှ တကယ်မင်းချစ်သွားတဲ့ လူကို ရှာတွေ့တာ ဖြစ်ဖြစ် ငါ့ကို ပြောပြရမယ်။ "
" တွေ့မှာ မဟုတ်တော့ဘူး အဲ့တာမင်းပဲ "
အူစီလုံးမျက်နှာလေးက နည်းနည်းတော့ ရဲသွားပေမယ့် ချောင်းဟန့်ကာ ခေါင်းကို အသားကုန်ခါပြသည်။
" စကားအကုန်မပြောရဘူး နွားရ။ ငါအတည်ပြောနေတာ "
" ငါလဲ အတည်ပဲလေ "
" ဆုံးအောင်နားထောင်။ တကယ်လို့ တကယ်လို့ ရှိလာခဲ့ရင်ကွာ...ပြော လို့ ပြောတာ။ ငါတကယ် အေးအေးဆေးဆေး လမ်းခွဲပေးမှာ ကြားလား ရှင်းယံ "
ရှင်းယံက ပြန်မဖြေတော့ အူစီလုံးက ခေါင်းကို ဒေါက် ခနဲ ခေါက်၍ ထပ်ပြောသည်။
" ကြားလား လို့ "
ဒါလား အေးအေးဆေးဆေးလမ်းခွဲပေးမည့်သူ။ အခုကတည်းကကို ဒေါသသံက ပါနေပြီ။ လူကောင်သေးသလောက် လက်ဆက တစ်ချက်ဆို တစ်ချက် အတော်တော့ ပြင်းသည်။
" အင်း "
သူ့အကြိုက်လိုက်ဖြေတော့မှ အူစီလုံးကျေနပ်သွားသလို ပြန်ငြိမ်သွားကာ ရှင်းယံနဲ့ နည်းနည်းခွာကာ သူဆော့လက်စဂိမ်းကို ဆက်ဆော့ဖို့ ပြင်သည်။
" ဒါနဲ့ ငယ်ငယ် မင်းငါ့ကို ဒီလိုပဲ ခေါ်နေတော့မှာလား "
" ဘယ်လိုတုန်း "
