For Unicode
နဂိုကတည်းက အပျော်မက်တာ အဖော်မင်တာ က အူစီလုံးရဲ့ စရိုက်ဆိုပေမယ့်
တေးသရုပ်ဖော်ကပြီးတာတောင် ထို၀တ်စုံကို မလဲပဲ လူတစ်စုနဲ့ ဟိုယိမ်းသည်ယိမ်း လုပ်နေတာကတော့ တရားကိုလွန်သည်။ ဟိုဟိုသည်သည်ကနေ သူ့အသံကပဲ စူး ထွက်နေ၏။
ရှင်းယံ ကတော့ နာရီကို ကြည့်ကာ ကြည့်ကာနဲ့ ပြန်ချင်လှပြီ ဖြစ်ပြီး သွားခေါ်ရင်လည်း ပွဲကြိုက်မောင် တစ်ယောက် စိတ်တော် ညိုးမည်စိုး၍ စောင့်ပေးနေရတာ ဖြစ်သည်။
" မောင်လေး ဒီကြည့်မယ် "
ကင်မရာကိုင်ထားသည့် အစ်မတစ်ယောက်က ပြောပြောဆိုဆို ဓာတ်ပုံရိုက်လိုက်တာမို့ ရှင်းယံမှာ အနေခက်ခက်နဲ့ပဲ ပြုံးလိုက်ရတယ်။
ဒီဓာတ်ပုံရဲ့ ရှေ့လားရာကို သူကကြိုသိနေနှင့်ပြီ။ ပထမဆုံး ကျောင်းပေ့ခ်ျမှာ ပါလာမယ်..ပြီးရင် နိုတီတွေတတ်မယ် ။ အူစီလုံး က friendတွေ လာလက်ခံခိုင်းဦးမယ်...သူက အလိုက်မသိ ထိုးကျွေးနေတဲ့ အူစီလုံးကို ဒေါသထွက်ရမယ်။
ဒီလိုပဲ သံသရာတွေလည်နေဦးမှာ မလွဲ..။
" ကိုရဝေရှင်းယံ "
ဘယ်သူမှန်းမသိသော်လည်း အနားလာကာ ကိုယ့်နာမည်ခေါ်လိုက်ပြီ မို့ ရှင်းယံ အလိုက်တသင့်ပြုံးပြလိုက်ကာ အကြည့်ပြန်လွှဲလိုက်တယ်။
" ကျွန်တော့် နာမည် မြတ်လင်းသူ ပါ "
" ဟုတ်ကဲ့ "
သူစိမ်းတစ်ယောက်က ဘေးနားကပ်ရပ်ကာ စကားပြောဖို့ အစပြုနေခြင်းသည် ရှင်းယံအတွက်ကအဆင်မပြေဖြစ်လှတယ်။
ဒါကြောင့် နှုတ်ကသာ စကားပြန်ဖြေပေးနေပေမယ့် သူ့အပြုအမူတွေကတော့ ဆန့်ကျင်ဖက်ကြီး ဖြစ်နေလျှက် ရှိ၏။
အရေးထဲမှာမှ အူစီလုံးက ဘေးက ကောင်နဲ့ ဖက်ကာ သီချင်းလိုက်အော်နေသဖြင့် လက်သီးက တင်းခနဲ ဖြစ်သွားရသည်။
ပြန်ရတော့မည်ထင်ရဲ့။
" ကျွန်တော် ကိုရဝေရှင်းယံ နဲ့ ရင်းနှီးချင်.."
" ဆောရီး ညီလေး။ ကျွန်တော် သွားရတော့မှာမို့ "
စင်အောက်မှာ အော်ဟစ်လို့ ကောင်းနေတဲ့ အူစီလုံး နားကို သွားကာ လက်ကိုဆွဲတော့ အကြည့်စူးစူး တစ်ချက်က ဒိုင်းခနဲ ရောက်လာပြီး သူမှန်းသိမှ မျက်နှာက ချက်ချင်းစပ်ဖြီးဖြီး ဖြစ်သွားတယ်။
