For Unicode
ကျောင်းရဲ့ မုန့်ဈေးပွဲတော် က ခါတိုင်းထက်ပင်ပို၍ စည်ကားသည်။ ညနေပိုင်း လုပ်မည့် ပွဲကြောင့် ထင်၏။
အူစီလုံးကတော့ ရေမှာလွှတ်တဲ့ လိပ်လို လူပင်လယ်ကြားမှာ ဘယ်ကိုမှာမှ ရှာမရ။
ရှင်းယံသည် နောက်ဆုံး တစ်ကောက်ကောက်လိုက်ဖို့ကို လက်လျှော့လိုက်ရပြီး သူတို့မေဂျာ နေရာယူထားသော မုန့်ရောင်းသည့်အဖွဲ့နောက်မှာပင် လိုတာများလုပ်ပေးရန် ထိုင်နေလိုက်သည်။
သူ့ဘေးမှာတော့ ရေခဲတွေကို လိမ္မော်ရည်ခွက်ထဲ ထည့်ပေးနေသည် နေနောင့် ရှိကာ သူ့မျက်နှာမှာလည်း အီလည်လည်။
သတိထားကြည့်လိုက်မှ သူတို့မေဂျာနဲ့ ကပ်ရပ်မှာ အိုင်တီ က လူတွေရှိကာ သူတို့ရောင်းသည့်
Sandwich နှင့် ကော်ဖီ အေးက အတော်လေး လူကြိုက်များသည့် ပုံပေါ်၏။
ကူညီလုပ်ကိုင်နေသည့် လူတွေထဲ အိုင်တီက နေနောင့်ဖဲသမား ကင်းလေး ကတော့ ထင်းနေကာ ခါတိုင်းမြင်ရခဲတဲ့ အပြုံးချိုချို ကို ဆင်မြန်းလျှက် ဟိုဒီပြေးလွှားနေတာဖြစ်၏။
" ရင်တွေပူနေရင် လိမ္မော်ရည်ကို ရေခဲများများလေးနဲ့ သောက်မလား "
ရေခဲပုံးပေါ် လက်တင်ကာ တစ်ဖက်မေဂျာကိုပဲ ငေးနေသည့် နေနောင့်ကို စလိုက်တော့ မဲ့ပြုံးပြုံးကာ လက်ခလယ် အသာထောင်ပြသည်။
" ငါတို့က ဘာမှလဲ မဖြစ်သေးသလို မေဂျာလဲ မတူလို့ထားပါတော့။ မင်းရည်းစား လေးရော"
ပြန်အဖဲ့ခံလိုက်ရတာကြောင့် ရုပ်တည်ကြီးနဲ့ စလိုက်မိတဲ့ ရှင်းယံသည်လဲ ငြိမ်ကျသွား၏။
တကယ်တော့ သူတို့နှစ်ယောက်လုံးဟာ အတူတူနဲ့အနူနူတွေချည်း။
.
.
.
မွန်းလွဲလောက်မှာပင် မုန့်ဈေးပွဲက သိမ်းဆည်းစပြုပြီး အလည်လွန် အူလုံးသည် အမောတကော ပြန်ရောက်လာပြီး ပိုနေသော လိမ္မော်ရည်ခွက်များကို ရေသောက်သကဲ့သို့ မနားတမ်းမော့သည်။ပြီးမှ
" ငါ အကုန်ပတ်တိုးစားကြည့်ခဲ့တာ
ငါတို့မေဂျာ မကောင်းဆုံးပဲ သိလား"
ဟု ချိုသာသော စကားများဖြင့် မေဂျာသူမေဂျာသားများ၏ ရင်၀ကို ဆောင့်ကန်ခြင်းအမှုကို ပြုတော့သည်။
