For Unicode
ကိုယ့်ကိစ္စတွေနဲ့ ကိုယ် ရှုပ်မှန်းမသိရှုပ်နေခဲ့တာ
မေဂျာမတူ သူငယ်ချင်းလေးကို သတိရ၍ သွားတွေ့ချိန်မှာတော့ တွေ့တာနဲ့ မွှန်နေအောင်ကို အဆဲခံရတော့သည်။
ဟိုအရင်တစ်ခါဖုန်းမကိုင်ကတည်းက စိတ်ကောက်သွားတဲ့ ကျော်ရှိန်က အခုထိလဲ အလံဖြူမပြသေးပါ။
" နေ့လည်စာသွားစားရအောင် လာခေါ်တာကိုကွာ။ ရှမ်းထမင်းစားမယ်လေ အအေးပါသောက်"
ကျော်ရှိန်က ဘုကြည့်ကြည့်ရင်း ဘာမှမဖြေသေးပဲ ငြိမ်နေသည်။
အူစီလုံး သူ၏ ကျောပိုးအိတ်ကိုဆွဲကာ စကားထပ်ပြောဖို့ ပြင်လိုက်စဉ်မှာပဲ
" ဟေ့ "
နေနောင့်က ဌာနအပြင်ကနေ အတန်းရှေ့က သူတို့နှစ်ယောက်ကိုအသံလှမ်း ပြုနေကာ အကြည့်ချင်းဆုံသွားတော့ လက်လှမ်းပြသည်။
ကျော်ရှိန်ကတော့ သူ၏ရှုတည်တည်ရုပ်မှာ မပျောက်သော်လည်း နားရွက်ဖျားများကတော့ ရဲစပြုလာသည်။
ဘာလား ဒီအငွေ့အသက်တွေက။
ဟိုရည်းစားတစ်ကောင်နဲ့ ရှုပ်နေမိတာ ဒင်းတို့ရဲ့ ဘာတွေကို သူလွတ်သွားခဲ့တာလဲ မသိတော့။
ကျော်ရှိန်က နေနောင့်ကို ကြည့်မရဘူးမဟုတ်ဘူးလား...။ဘယ်ကဘယ်လို တည့်သွားကြလို့ ထမင်းစားချိန်မှာတောင် လာခေါ်နေတဲ့အဆင့်ဖြစ်သွားရတာလဲ?
" ရှင်းယံက မင်းတို့အတန်းဘက်ထွက်သွားတာနော် အူစီလုံး "
" ရတယ်။ မတွေ့ရင် ကန်တင်းလိုက်လာလိမ့်မယ် "
နေနောင့်က ဆက်မပြောတော့ပဲ ခေါင်းညိမ့်ကာ ကျော်ရှိန့်ကို ကြည့်ပြီး သွားစို့ဟူသော ဟန်ဖြင့် မေးဆတ်ပြသည်။
" လိုက်မှာမှလား မင်းက "
ခပ်တည်တည်မျက်နှာပေးနဲ့ ကျော်ရှိန်က လောကွတ်ချော်ဖော်လေးရသေးတော့ အူလုံးအမြန်ပင် ခေါင်းညိမ့်ပြလိုက်၏။ စားရင်း သောက်ရင်း အကဲခတ်ရမည့် ကိစ္စတစ်ရပ်ကလဲ တိုးလာပြီ မဟုတ်ပါလား။
.
.
" မတွေ့တာလဲ သိပ်မကြာသေးပါဘူး။ မင်းတို့နှစ်ယောက်က အတူသွား အတူစား ဖြစ်လာတာလဲ ဟမ် "
