روح تراني طايب النفس مابغاك حكم طغى ماعاد ينفع نظامه

بارت ١٥

فتح عيونه وشاف توق الي قدام المرايه تسوي شعرها قام يستند على ظهر السرير وطق رقبته رفعت نظرها له من المرايه بدون ماتقول شي ونزلته مرة ثانيه
استغفر يقوم للحمام ياخذ له دش قبل مايروحون للعزيمه الي هي شي مألوف لكل عرسان
وقفت توق بعد مافيرت شعرها وسوت ميكبها خذت فستانها الكحلي تلبسه بسرعه قبل يطلع رعد كان بتصميم بسيط ماسك على جسمها بطريقة حلوه ومناسبه لبست كعبها الاسود ترفع نظرها لرعد الي طلع وقفت تطلع من الغرفة تاخذ المبخرة الاكترونيه من شنطتها تشغلها تبدا تبخر شعرها ناظرت رعد الي طلع وهو يضبط شماغه خذت نفس بتوتر تروح توقف قدامه تبخره بهدوء بدون ماتقول شي رفعت نظرها له بأستغراب من حاوطها بشماغه يتبخرون مع بعض
ناظرته وكان يناظرها ، سارح بمنظرها الي يجذبه بلعت ريقها بتوتر من قبل جبينها وبدا يحصنها بعد من خلص وشال شنطهم
رعد : اللبسي عبايتك بنروح
راحت تلبس عبايتها ونقابها تاخذ شنطتها الصغيرة تروح للسيارة تركب جنبه يحركون لقصر ال راشد ومن بعدها قصر ال رشيد
نزلو من السيارة يفترقون هي راحت جوا وهو للمقلط استقبلتها نوال وهي مبتسمه سلمت عليها تروح للمرايه تضبط شكلها تدخل للصاله تشوفهم موجودين سلمت عليهم متجاهله امل الي تناظرها نظرات مو مفهومه مدت له رنيم فنجال القهوة وجت تغريد وبيدها الحلا تقدمه لها
___________
كانت ولاء جالسه قدام معتصم وتقرا الملفات وهي عاجزة عن الكلام لسانها انشل من الصدمه
ولاء : كيف كذا مستحيل يعني ماكان مكتوب بالسجلات ابدا انها متزوجه والحين ذا الملف مكتوب انها كانت حامل كيف
معتصم : شوفي تاريخ الفحص قبل الجريمه بثلاث ايام درت يعني المفروض ينكتب بالتقرير وهنا مكتوب انها جت عشان تحاليل زواج هي وامير
واضح عرف كيف يلعبها بس كيف بتثبتين ذا شي ؟
ولاء وهي تاخذ الملفات : نعرضها على المدعي العام ونشوف وش بيقول
معتصم : طيب مدامني فاضي وش رايك تجين نتقهوى
قام من مكانه لما رمت عليه المزهريه وطلعت
_________
نزل عبد السلام من سيارته ينزلون وراه نايف وميلان الي سافرو من زمان عشان شغل نايف والحين معهم ولدهم الوحيد عبد الله والي عمره ٤ سنين دخل نايف قصر ال حمد وهو ينادي
نايف : يمههه يبههه
فزت روان من سمعته وتقدم يسلم عليها ووراه ميلان الي شايله عبد الله
روان : ياهلا ومرحبا بعيون جدته
ابتسمت ميلان تسلم عليها وتمد لها عبد الله الي تعرف على جدته
ميلان : كيف حال البنات وينهم ؟
روان : زياد مع حرمته وعياله ببيته وسعد نقله جده للشركة الثانيه برا الرياض
والباقي على وضعهم ماتغير شي
ناظر عبدالله امه وقال ببراءة : ماما ابي توليب
ميلان : روح الماما شوي ونروح نسلم عليهم ونشوفها تمام
هز راسه بحماس يناظرهم يسولفون
__________
طلعت لرعد الي يستناها برا بعد ماوداها تسلم على اهلها والحين بيروحون
ركبت جنبه تسلم ورد عليها السلام يحط جواله على جنب يبدا يسوق
رعد : كنسلت حجز الطيارة عادي عندك نمسك خط ؟
توق : وش فرقت انت كنسلته يعني حتى لو مابغيت بمسكه غصب
رعد ببرود : اذا ماتبين رحت لحالي وانتي اقعدي
توق : لالا خلاص موافقه موافقه امسك خط مثل ماتبي اهم شي اروح
ناظرها رعد ورجع نظرة للطريق : واضح ودك بالروحه كثير
شافت توق انهم بعدو وبحكم ان سيارته رعد مضلله شالت نقابها ونزلت طرحتها على كتفها : مدامه متعلق بالقضيه اكيد بروح
رعد : شدراك ؟؟؟
ابتسمت توق تمد يدها بدلع : لاتنسى مين زوجتك  بعدين كيف ماتعرف طبعي انا معك من الصغ ....
حطت يدها على ثغرها تبتر باقي كلامها تصد عنه بسرعه لما استوعبت انها بغت تجيب العيد
عقد رعد حواجبه يناظرها من سكوتها المفاجئ : ايه كملي !!
مسكت توق كوب قهوته تشربه بسرعه من توترها : ولا شي ولا شي شرايك توقف تاخذ لك قهوة او نوقف عند محطه ناخذ لنا اشياء مدري شوف انت خلصت قهوتك
رعد : طيب بس بنكمل موضوعنا بعدين ماني ناسيه
رفعت يدها بتسليك له تمسك جوالها تصد عنه وتطقطق فيه
_____
كانو البنات توليب وولاء ورغد ولميس ورنيم وحوريه ومنيرة ونوال وتغريد ويارا ولمار وميرال 
بقصر ال رشيد يشوفون ميلان بعد وقت
كان عبدالله بحضن توليب الي حاضنته بقوة وكل شوي تبوس خده
توليب : اههخخخ اشتقت لك شفت ماما شريرة ماتجيبك
رولا : انا!!
لفت لها توليب وهي مبوزه تمثل الزعل : ايه انتي من زمان ماشفت ولدي ماتدقين ولا شي
ناظرت ميلان البنات الي ضحكو تهز راسها بقلة حيلة من توليب
ميلان : صح تذكرت كيفك انتي واسر هاه للحين مافيه شي هنا ولا هناك
سكتو الكل وصار هدوء غريب ويناظرون بعض بدون مايقولون شي
وقفت توليب لعب مع عبدالله واختفت ابتسامتها بالتدريج ماتقول شي
توترت ميلان من سكوتهم وقالت : انا قلت شي غلط ! معليش توليب توكم صغار لاتهتمين لتعليقات الن
توليب ببرود : انفصلنا انا واسر ماعاد يعنيلي شي ميلان
خلصت كلامها توقف تطلع من الصاله تروح للحديقه برا
جلست على الكراسي وهي ضامه يدها من البرد وبدت تراودها هواجيس
رن جوالها بأسم انس استغربت من اتصاله بهذا الوقت بس ردت عليه هذا شي اكيد
توليب : هلا انس
انس : انتي قايله لي اراقب ميس صح ؟
توليب : ايه صح وش صار
انس : اجل اسمعي زوجها له فترة حول بيتها
توليب : من متى يا انس ليش توك تتكلم
انس : له يومين كذا بس حسيت الموضوع زاد عن حده تطلعين قرار ابعاد بحقه ؟
وقفت توليب وهزت راسها مدعية انها تشوفه : الحين بروح
انس : انتبهي لنفسك
سكر الخط وهي دخلت خذت عبايتها وودعتهم تطلع لسيارتها تروح للمكتب
شافت اشارة بوجهها وضغطت فرامل بس ماقدرت توقفها رمشت اكثر من مرة بسبب هذا شي وعرفت انه انلعب بالفرامل شافت شاحنه قدامها وغمضت عيونها تضغط على الفرامل بقوة وو .

كان اسر على اللابتوب وحاس انه مخنوق مايدري وش السبب رفع نظرة لأمل الي دخلت مكتبه ورجعه مرة الثانيه على لابتوبه
اسر : ماعندك شي اطلعي
جلست امل قدامه وقالت : يا اسر تدري ان بمعاملتك هذي لي قاعد تظلمني وتظلم نفسك عشان وحدة اكيد نستك
اسر : تفضلي برا واضح مافيه شي مهم
ناظرها من بدت تضحك وسكر لابتوبه يتكتف : وش الي يضحك
امل : اسر انت يعني واثق مرة ان توليب بترجع لك
رفع حاجبه يبتسم وشبك كفوفه ببعض يستند عليهم : واكثر بعد وانتي بتكونين يا امل حكاية بتنسي مع الوقت
وقفت امل بأنفعال من كلامه الي استفزها : وحدة منا بتكون حكاية بتنسي بس مو انا توليب سكتت شوي تكمل مع ابتسامه : اسفه لك بس يا اسر انت ووردة التوليب ذيك انتهيتو
اسر : وش تقصدين ؟
امل ببرود : اذا ركبت سيارتها المسكينه ماتقدر توقفها لأني فاصله الفرامل
توسعت عيون اسر من كلامها وثقل تنفسه وبسرعه وقف يمسكها من وجهها
اسر : انتي مستوعبه الي قلتيه سامعه وش تقولين
امل : ايه مستوعبه مسكين يمكن بعد الحين بالكفن حقها ومالك احد تتشكى له غيري
تركها بقوة من هول الي سمعه وخذ جواله يفتح رقمها بس فصل
اسر : لا ياتوليب لا لا
سحب مفتاح سيارته وطلع برا يشوف سيارتها مو موجودة حاول كثير يتصل بس ماقدر ركب سيارته وهو تايه مايدري وين بيروح حرك للطريق العام وبيده الثانيه لازال يحاول يتصل فيها
اسر : توليب وينكككك قوليلي وينك
هذا اول شي قاله من انفتح الخط ماكان فيه الا صوت سيارات وصوت تنفس عالي وسريع
توليب برجفه : اا اسر !!!

نشوف وش صار على توليب قبل ونرجع لهم
اول ماشافت الشاحنه غمضت عيونها وضغطت فرامل بقوة تلف سيارتها تبعد والحمدلله وقفت كانت ماسكه الدركسون وتناظر قدامها تتنفس بسرعه
سندت راسها على الدركسون وغمضت عيونها من الي صار مر شريط حياتها قدام عيونها كان جوالها يرن من قبل ماتطلع الشاحنه قدامها والي يتصل اسر كرر اتصالاته بشكل مجنون مسكت جوالها برجفه ترد عليه بالبدايه سكتت وماقدرت تقول شي غير انها تسمعه صوت انفاسها العالي
نرجع للواقع ~~
اسر : الحمدلله يارب الحمدلله توليبي وينك انتي قوليلي
توليب : انا حول الشارع حق وزارة العدل
اسر : طيب جايك لاتتحركين سامعه توليب ردي علي وينك
كانت توليب تحس بغثيان ودوار وقالت بصوت خامل : استعجل طيب
قالت هذي الجملتين واغمى عليها يطيح الجوال
اسر : توليب وينك ردي
صرخ بقهر يرمي جواله جنبه ويزيد سرعته عشان يوصل لها
________
لف رعد على توق وشافها نايمه وشعرها على وجهها رجع راسه على ورا يناظرها
تنهد ينزل من السيارة يدخل الفندق يحجز لهم خذ الكرت يرجع يطلع وفتح باب توق خذ طرحتها يحطها على وجهها وشعرها يمسك شنطة يدها وحط يد بين مفصل ركبتها والثانيه على خصرها يحملها له سكر الباب يروح للمصعد
سند جبينه على راسها يغمض عيونه بتعب
فتحها لما سمع صوت المصعد ينفتح يطلع لغرفتهم يفتحها حطها على السرير يفتح ازارير عبايتها ويشيل طرحتها يحطهم على جنب يدفيها بالشرشف
سمع صوت طق الباب وراح يفتحه كان العامل دخل شنطهم يطلع
خذ رعد شنطة اللابتوب الي فيها بعد الملفات راح بدل ملابسه وجلس بالصاله حقت الغرفه يبدا يخلص شغله
______