روح تراني طايب النفس مابغاك حكم طغى ماعاد ينفع نظامه

البارت ١٦

نزل اسر بسرعه من سيارته يفتح باب سيارتها بقوة يشوفها مغمى عليها
مسك وجهها يلفه له وبدا يضرب خدها بخفيف كم مرة
اسر : توليب توليب ردي علي انا هنا جيتك لاتخافين فتحي خليني اشوف عيونك مثل كل مرة
كان يتكلم بخوف وهلع من انه صار لها شي ماشاف فيه اي استجابه مسك يدها يحطها خلف عنقه يحاوط خصرها يحملها له ويركب السيارة يتوجه للمستشفى بسرعه
___
فتحت عيونها تفركها بنعاس تحاول تصحصح عدلت جلستها تناظر الغرفة الي هي فيها قامت من على السرير وتوجهت لشنطتها طلعت لها بجامة مريحه وسليبرها تاخذهم تدخل الحمام تاخذ لها شاور مريح تريح نفسها وجسمها من تعب الطريق
خلصت ولبست روبها طلعت وهي ماسكه المنشفه تحركها على شعرها تنشفه ناظرت حولها وتوها تستوعب عدم وجود رعد معها ما اهتمت كثير وجلست تطلع المجفف تسوي شعرها ولما خلصت عطرته تحط مسك عليه وعلى اماكن النبض لبست بجامتها والسليبر تطلع للصاله استندت على الباب تشوفه جالس على الكنبه ومركز نظرة كله على اللابتوب
رفع عيونه لها لما حس فيها جايه
رعد : صحصحتي ؟
توق وهي تجلس جنبه : ايه وانت ارتحت بالنومه
رجع نظرة للشاشه يضغط على بعض الحروف باللوحه : توني مانمت من وصلنا على جلستي
ناظرت توق حولها تدور ساعه او جوالها بس مالقته
خذت جوال رعد تفتحه وتشوف ان الساعه ١:٣٠ منتصف الليل
يعني من فترة طويله واصلين
توق : رح نوم انا اكمل عنك ورني
رعد : لا خلاص خلصت بطلب عشاء على مايوصل بتروش طيب
هزت راسها له تناظر اللابتوب تاخذه بحضنها تشوف الي كان يسويه
رعد : لايخرب الشغل انتبهي
توق : تمام تمام

دخلت العنود وهي خايفه ووراها ماهر الي يحاول يهديها راحت للأستقبال وهي تبكي
العنود : بنتي عندكم وينها
حط ماهر يده على كتفها يأشر لها تهدا وناظر الموظفه : توليب ال حميد عندكم ؟
الموظفه : ايوه بالطوارئ على اليمين تلقاها قدامك مباشرة
ماهر : طيب يعطيك العافيه امشي يمه
اتبعو وصف الموظفه وشافو اسر الي قدامهم جالس على الكرسي
ماهر : اسر وش صار وكيف انت هنا ووين توليب ؟؟
وقف اسر يناظر حالتهم يأشر للعنود تجلس وتهدا
اسر : هي بخير بس واضح جتها نوبة هلع من الي صار
ماهر : وش صار تكلم !
ضغط اسر على جبينه بتعب وقال : كانت بتسوي حادث بس على اخر لحظة ربي ستر عليها
شهقت العنود يزيد نحيبها على بنتها والي كانت بتفقدها
ماهر : وانت كيف عرفت يعني مكانها والسالفه
اسر : كانت حول المركز وانا اتصلت عليها عشان شغل وقالت وش صار وانتهينا هنا
ناظرة ماهر لثواني وبعدها حضنه حضن من زمان عنه حضن الاخوة الي بينهم والمعزه ووالواضح ان ماهر سامح اسر بسبب انقاذة لتوليب
ماهر : مدري وش اقولك يا اسر بس مشكور وانا اخوك
اسر : مابينا يا ماهر لاتنسى ترانا اخوان من الصغر ، ادخلو عندها يمكن صحت انا بروح وصيت احد يجيب سيارتها بيحطها عند بيتكم  سلمولي على الكل والحمدلله على سلامتها
بعد ماودعهم طلع لسيارته يتوجه للقصر بأقصى ماعنده وهو واصل حده من امل بس تطاولها ذي المرة وانها حاولت تقتل توليب تجاوزت الحدود ووصل مواصيله منها
دخل من الباب وهو معصب ونار العصبيه يطلع منه كانو البنات بالصاله وفزو من جا يحطون جلالاتهم عليهم بسرعه اما هو ماناظرهم وراح عند امل يمسكها من يدها بقوة
اسر : متى بتعقلين كل الي سويتيه وساكت لك بس الحين مستحيل اسكت انتي مختله سمعتي مختله كيف تتجرئين وتحاولين تقتلينها ليش تعبثتي بالفرامل قولي
كانت امل مكشرة بألم وتحاول تبعده عنها بس ماقدرت
ساميه : وشفيك وانا امك اترك زوجتك
اسر : يمه تكفين ذي مهيب زوجتي
رانيا  : اعقل يا ولد وقولنا وش صاير
اسر : جدة ذي الكلبه تعبثت بسيارة توليب وبغت تسوي حادث بسببها وبكل وقاحه جايه عندي وتتكلم والله لو اني ما امد يدي على بنت كنت تصرفت تصرف ثاني
روحي بيت اهلك واستني ورقة طلاقك
توسعت عيون امل وتشبثت فيه
امل : اسر اسر لالا والله اسفه اسفه لاتطلقني ما اعيدها بقعد وماني مقربه من توليب ابدا
ماكان اسر يناظرها بعدها عنه ورجع يطلع برا البيت تحت صراخها عليه
تغريد : وش انتي من بين الناس خير
امل : اسكتيييي اصصصص ولا كلمة مالك دخل
كانت بتمسك شعر تغريد بس بعدتها حوريه بقوة : مريضه واضح يبيلك مصحه عقليه امشي ادخلك
ناظرتها امل بحدة اما حوريه ابتسمت بأستفزاز وسحبت تغريد والبنات يروحون غرفتها
ساميه : وش سويتي تدرين لو صارلها شي على طول السجن يا بنت وش وجعك قوليلي
امل : انتي السبب انتي الي كرهتيه فيني انتي الي زوجتينا بالطريقه ذي انتي السبب لو انك موموجودة بيحبني وينساها
برد وجهها من الكف الي جاها ناظرت رانيا الي ضربتها تسكتها وراحت بدون ماتقول شي
نزلت حوريه ترمي بوجهها عبايتها
حوريه : روحي الله لايوفقك ان شاء الله
امل : برجع لاتفرحون
حوريه : ايه ايه يصير خير
خذت امل عبايتها تلبسها وخذت جوالها تطلب لها اوبر تركب معه تروح بيت اهلها والحقد مالي قلبها
_________
فتح الباب يدخلون وراه العنود وهي ماسكه توليب ساندتها جوها ميرال ونواف يتطمنون عليها
العنود : خلاص خلوها ترتاح شوي ميرال امشي ساعديني
ميرال : ان شاء الله تعالي
مسكت يدها يرقون الدرج يساعدونها
ناظرهم سامر يستنى تفسير منهم تنهدت العنود تأشر له يطلعون
طلعو يتكتف قدامها يستناها تتكلم
العنود : بغت تسوي حادث بس ربي ستر واسر كان حولها وساعدها
سامر : متأكدة !!
العنود : ايه بس خلها تصحصح شوي وافهم كل شي 
سامر : وانس وينه بالله
العنود : مدري عنه بس الواضح انه مشغول على حسب كلامها ، شفيك انت لك فترة مب على وضعك
سامر بدون مقدمات : اسر قبل يومين مكلمني يبي توليب مرة ثانيه
العنود بذهول : ايش !! كيف كذا هو متزوج تبيها تصير زوجة ثانيه
سامر : ماودي ابدا بكذا بس اصراره غريب
العنود : للحين يحبها بس وش قلت له ؟
سامر : مارديت له قلت بس الراي لتوليب
العنود : ما اتوقع بتوافق وهو متزوج بعد
خذ نفس عميق يزفره بقلة حيلة