روح تراني طايب النفس مابغاك حكم طغى ماعاد ينفع نظامه

البارت ٢١

انفتحت ابواب القصر تعلن وصول رعد وتوق ، ركن رعد سيارته ونزل منها يروح لباب توق يفتحه ويساعدها تنزل
اشر للحارس انه ينزل شنطهم ودخل معها للصاله يشوف امه وخواته وجدته ورنيم وابوه وجدة
رعد : السلام عليكم
مالك : وعليكم السلام ، الحمدلله على السلامه
رعد : الله يسلمك ، توق اجلسي
استندت على عكازتها تمشي سلمت على مالك وهيا وعمر ورانيا والبنات تجلس جنب منيرة
هيا : سلامتك يابنتي وش صار لكم ؟
ابتسمت توق تطمنها : الله يسلمك خالتي بس اصابة عمل بسيطه
ناظرها عمر الي فهم يرجع نظرة لرعد
عمر : لقيتوها ؟
رعد : ايه ووديناها للمستشفى ماوصلكم التقرير ؟
خذ عمر فنجاله يشرب منه
كمل رعد ؛ فهمت يعني اسر ماقال شي ؟
رنيم : اصلا ابشرك اسر له يومين مختفي عن العالم انشقت الارض وبلعته
رعد : ايه وامل وينها بالعادة لو نام بالدوام تقوم القيامه
رانيا بهدوء : طلقها ياولدي
ناظروها رعد وتوق بصدمه بانت على ملامحهم
رعد : ليش وش صار !!
نوال : سوت شي مجنون واضح مختله ، تعبثت بسيارة توليب وكانت بتسوي حادث بسببها
توق : ايش !!
منيرة : ايه وقالت تغريد ان توليب سحبتها لهنا وخيرت اسر يا انه ياخذها ويبعدون او يطلقها وماصدق ان احد يقوله كذا وطلق
رنيم : احسن فكه صار القصر هادي والمشاكل قلت
رعد : صدمة كيف امه وافقت ؟
وقفت توق تستند على العكاز وقالت : مب لازم توافق كذا ولا كذا كان بيصير الطلاق ، بروح ارتاح
وقف رعد من مكانه واشر لها ترقا
رعد : بوريها الغرفه وارجع ، تفضلي استاذة توق
ناظرت توق الدرج وناظرته تمسك راسها بصداع : يا فهيم كيف برقا ماتشوف الجبس الي كبر راسك
رعد : عن الغلط ولا تركتك
توق : طيب طيب رقني سو الي تسويه ابي انام
رعد : طيب طيب امشي
نزل لمستوى طولها شوي يحملها ويمسك عكازها يرقا
منيرة : مالت عليك تعلمي
قالت لنوال تكش عليها
نوال : وانا شكو يابنتي فارس احلامي ماجاني  وين روميو حقي يارب جيبه وافتك من لسان ذي البنت
هيا : استحي يابنت قدامي طيب
ضحكو كلهم على وجه نوال اللا مبالي تكمل صحن الحلا بصمت

دخل غرفتهم ينزل توق على السرير يساعدها تشيل عبايتها ونطقت بعد صمت
توق : تتوقع وين توليب واسر
رعد : ليش توليب بعد مختفيه ؟
هزت توق راسها له ومد يده لجيبه يطلع جواله يفتح رقم اسر يحاول يتصل فيه بس عطاه مغلق وجرب مع توليب يعطيه نفس شي
رعد : مختفيين بنفس الوقت ومحد يرد وش مهببين ذولي
توق : وش مهبب اسر قصدك توليب عاقله
رعد بتفكير : من هذي الناحيه صادقه توليب اعقل منك حتى
رفعت حاجبها بصدمه تمسك اكبر مخده ترميها عليه ووقفت تدخل الحمام
بعد المخده عن وجهه يبي يرميها عليها بس سكرت باب الحمام قبل ماتوصل لها
رعد : بس لو ان رجلك مو مكسورة
توق بصوت شبه عالي : نينينينيني بس لو رجلك مو مكسورة دز امها
رعد : طيب طيب خليني بس افضى لك
___
نزلت توليب تناظر ارجاء البيت وماشافت اسر ولا سمعت له صوت
توليب : احسن ، وش اسوي الحين حتى الجوال مخلص شحنه
تلفتت تشوف باب غرفة ماقد دخلتها
راحت للباب تفتحه تشوف طاولة البلياردو تتوسط الغرفه وعلى الجدار العصا حقت اللعب وبنص الطاوله الكرات والي كان يلعب فيهم ماحس عليها لما دخلت من اندماجه تكتفت تستند على الباب تناظرة وهو يلعب
دخل كرة بمكانها واللتفت لصوت التصفيق الي سمعه يشوفها تصفق له وعلى وجهها علامات البرود
اسر : من متى وانتي هنا !
توليب : قبل شوي ، خلصت لعبتك يالله شرايك تفتح الباب وتخليني اروح 
ضحك بسخريه من كلامها يحرك راسه
مسك العصا يرجعها مكانها ويرتب الكور
تقدمت له بغضب توقف قدامه وتفرد يدينها تمنعه انه يطلع
توليب : اسر لاتضحك مايضحك وشذي الحركات !! خلني اطلع واتركني بحالي
اسر : توليب انا قايلك ماني فاتحه الين نتفاهم وتقولين لي كل شي عن ماضيك قبل وبعد ماعرفتيني
لانت ملامحها تنزل يدها تشوفه يتكتف يستناها تتكلم ، حاوط وجهه بكفوفه يناظرها
اسر : قوليلي كل شي من الالف للياء يا وردة التوليب وبصدقك ماني معاتب ابي بس اعرف وش الي خلانا نصير كذا
غمضت عيونها تبعد يدينه عن وجهها وطلعت للصاله
سكر الانوار وطلع يجلس قدامها يستناها تتكلم
توليب كل شي بدا قبل ما اتعرف عليك قبل ثلاث سنين كنا اول سنه جامعه رحنا الدمام لما طلع قبولنا هناك وكل وحدة دخلت تخصص غير عن الي نشتغله الحين ولاء برمجة ورغد ادارة وتوق طب وانا خدمة اجتماعيه ماكان ببالنا اي شي غير الدراسه ونكون مع بعض بس
لكن بيوم كنا طالعين وتعرضو لنا مجموعة شباب ومانشوف الا امير واخوانه جايين يطيحونهم من الضرب ومن بعدها صارت لنا كم صدف معهم حول الجامعه وبرا
بس ماحسبنا حساب ان ممكن هذا شي بيدمر حياتنا
مسحت دمعتها الي نزلت تكمل : امير حب توق وخطبها بس بيوم خطبتهم جابر جا خذني على اساس بنروح لهم وانا صدقته خذني مكان بعيد وحاول يعتدي علي بس قدرت انحاش ولاء سليم لعب عليها وقالها اننا نعرف انه يخونها ورغد مالها ذنب ولا حتى عطت عماد وجه ولما رفضته دمر لها دراستها وانفصلت من جامعتها وبصعوبه كملت دراستها اما توق
تخيل الشخص الي تحبه وتثق فيه يلعب عليك ويطلع متزوج ولا ومين يقولك كل شي ؟؟ ابو زوجته يجي ويقولك الحقيقه . سكتت شوي من الماضي الي داهمها وغصته المؤلمه
اسر : كملي بعدين ؟
توليب : هاشمت جا عند توق وقالها ان امير رجال متزوج وعنده بنت وكل شي كذبه من الخطوبه للوعود وكل شي ولما قالت له مابيك رماها بالشارع ولما صدمتها السيارة انحاش ماكلف على نفسه يساعدها جلست شهور تتعالج وبعدها رجعت ، واتوقع فهمت ليش غيرنا تخصصاتنا عشان ننتقم منهم على احلامنا الي سلبوها منا وحياتنا الي دمروها رجعت بعدها للرياض وبعد سنه قابلتك وليتني ماشفتك عطيتني امل جديد بس كسرتني لما تزوجت امل تدري اني كنت افكر بالموت بس قلت بصبر عشان ولدي لما مات تقفل كل شي بوجهي حسيت نفسي وحيدة حتى بوجود اهلي كنت محتاجتك بس ماقدرت حتى اكلمك واقولك اي شي
قد حاولت انتحر ومحد درا عني الا ولاء رغم اننا كنا متهاوشين الا انها ساعدتني وماقالت لأحد عن السالفه والحين بعد سنتين رجعتو طلعتو بوجهي ولما جابر وصل لأختي فاض كاسي ورحت له وصار الي شفته بالفيديو  ، خلاص اشبعت فضولك؟
كان اسر يطالعها بذهول من الصدمات الي سمعها من بداية تعارفهم مع امير الى لما حاولت تنتحر
اسر : توليب انا ماكنت اعرف ليش ماقلتي لي
قام من مكانه يجلس على ركبته قدامها ومسك يدها
نفضتها تبعد عنه : لاتواسيني ولا تمسك لا يدي ولا تحضني بس خلك بعيد
ناظرها بهدوء ومسك يدها مرة ثانيه يسحبها لحضنه يحاوطها
اسر : مابي اواسيك بس فكرة اني كنت بفقدك صعبه كثير ، انا معك معك بالأنتقام حقكم بحميكم توليب ربي بيعوضنا ونجيب نرجس واخوانها
غمضت عيونها من الدموع وكلامه الي اثر فيها وذكره لأسم نرجس خلاها تتأثر اكثر
خذت نفس عميق ترفع يدها وتبعده
توليب بأنفعال : وش تقول انت على بالك بس عشان قعدت معك وعرفت كل الماضي بيتغير شي مستحيل وانا بطلع من هذا البيت وبشتكي عليك عشان تعرف كيف تخطفني
انتفضت يدها بغضب وناظرت الزينه والزجاج الموجود بالمكان راحت بسرعه ومسكت مزهريه
توليب : اسر تخليني اروح ولا اكسر البيت فوق راسك ؟؟
مارد عليها بس اكتفى انه يسحب الكرسي ويجلس : تفضلي بس لاتأذين نفسك
صرخت توليب بقوة وكسرت المزهريه تكمل على باقي الاشياء
توليب : الله ياخذك ليش تسوي كذا اعتقني يا ابن الناس خلاص
كانت تقول كل كلامها وهي مقهورة وكل ماقالت شي كسرت اكثر
اسر : اذا تعبتي ارتاحي
كانت بترمي تحفه بس وقفت تناظرة هو وبرودة المستفز وبدون ماتحس رمت التحفه عليه فز يمسكها قبل ماتشوه له ملامحه حطها فوق الطاوله يناظرها
اسر : ما اتفقنا على كذا تشوهين وجهي بعدين كيف تطالعيني بالليل
توليب : اسر انطم اوص انطم لا اسمع صوتك حركاتك بكبرها تستفزني كيف صوتك
اسر : بس اعترفي يعجبك
تنفست بغضب تبعده من قدامها تتوجه للباب تفتحه حطت يدها على المقبض بس مقفل ضربته برجله ويدها بس ماقدرت رجعت له تضربه على صدرة
بقوة
توليب : اسر هات المفتاح بسرعه لا ارتكب فيك جريمه
مسك اسر يدها يوقفها عن الضرب وحركته هذي خلتها تفهم انه مستحيل يفتحه
ابتسمت بسخريه وقالت : طيب انت الي تبي كذا
راحت للمطبخ وهو طنشها يرجع يجلس يعطي الباب ظهره .
فتحت درج المطبخ تطلع منه سكينه وراحت لباب الشارع تحاول تفتحه فيها
لف راسه من سمع الصوت وشاف وش قاعدة تسوي
اسر : وش تسوين جيبيها
مد يده بياخذها بس بعدته تكمل الي تسويه
توليب : اذا ماتبي تخليني اطلع انا بدبر نفسي
اسر : توليب لاتستهبلين الحين تجرحين نفسك هاتيها
توليب : اسر وخر خلني
كان يحاول يسحب السكينه منها بس صرخ من انجرح شهقت من الي صار وطاحت منها تناظر يده وكيف ان الجرح مكانه خطير
ناظرها اسر بخوف يمسك يدها ويشوف اذا صار لها شي
اسر : صارلك شي
توليب : اسر يدك الجرح
اسر : جاوبي صارلك شي
توليب : ماصار شي
كشر من بدا الجرح يألمه وراح للكنبه يجلس وضغط على يده جته توليب ومعها منشفه كبيره حطتها على يده تضغط عليها
توليب : اسر قوم خلني اوديك للمستشفى بسرعه جرحك خطير وين موزي المفاتيح
بدت تفتش جيوبه بس قاطعها من قال 
: لا ماني متحرك لاتحاولين واصلا المفاتيح مب معي
توسعت عيونها بذهول منه : يعني عادي عندك تموت ؟؟
اسر : بالضبط اموت ولا اخليك تطلعين
ضربت طرف الكنبه الي جالس عليها وقالت بين دموعها : طيب خلك تنزف الين تموت ، اسر تكفى
خذ نفس وقال  بصوت متألم : فيه بالحمام خيط اسنان وبغرفتنا ابرة خياطه بالدرج الثاني بعلبة صغيرة جيبيهم
توليب : اسر وش بسوي فيهم
اسر : وشو ماقد خيطتي جرح بحياتك
توليب : اسر انت مجنون قوم اخذك للمستشفى
مارد عليها يلف بوجهه للجهه الثانيه
زفرت انفاسها الي حبستها من هول الموقف وركضت للحمام بعثرت كل الدروج الين مالقت خيط الاسنان وراحت للغرفة تفتح الدرج الي قالها تاخذ الابرة ورجعت له بسرعه
توليب : قول وين علبة الاسعافات بسرعه
اسر : مدري اتوقع مافيه
توليب : اوف منك يا الله منك اسر ليش كذا
جلست جنبه تفتح المنشفه عن جرحه الي خلا ذراعه تتلون للأحمر من الدم عضت شفتها تحاول تهدي نفسها عشان ماتغرز الابرة بمكان غلط وتأذيه اكثر
دخلت الخيط بالأبرة وقربتها من يده
صرخ بألم من انغرزت بيده وهي مو اقل منه
توليب : انا هبلت فيك صح يا اسر ؟
اسر : هبلتي فيني وجرحتيني بعد
توليب :  بس ماكنت اقصد والله حركاتك المجنونه سوت فينا كل ذا
سكت مايرد عليها يراقبها تخيط الجرح ولما خلصت وقفت وهي ترجف وقالت بصوت مبحوح : انا منجد اكرهك
ناظرها ينفي كلامها من قال : انتي تحبيني مثل ما احبك لدرجة الجنون 
مسكت المنشفه ترميها عليه بقوة وراحت فوق للغرفة تتركه
____________
نزلت ميس من السيارة ومعها تميم
ميس : وش اتفقنا تميم ؟
تميم : اجلس مؤدب واذا جيتي تاخذيني ما اعاند
ابتسمت ميس تنزل لمستواه تقبل وجنتيه بقوة : فديت حبيبي الشاطر
دخلت ميس حديقة القصر تتلفت يمين ويسار تدور رغد الي قالت لها انها بالحديقه
ميس : دايم كذا يارغد وش نهايتها
رفعت جوالها بتتصل عليها بس ناظرت تميم الي صرخ بصوت عالي من شاف فارس وركض له
فارس : يا هلا حي ذا الوجه
ضيقت عيونها تناظره تتعرف عليه نفس الشخص العصبي ذاك
ميس : تميم تعال
ناظرها فارس يتعرف على الصوت بشك
نزل تميم على الارض يروح عندها مدت له شنطته تقبل جبينه وراحت
رجع تميم عند فارس الي مسك يده يروحون السيارة
تميم : وين بنروح ؟
فارس : ناخذلك عصير  ونروح عند عمك انس ونلعب شوي شرايك
هز راسه بحماس يناظر الالعاب الي بجوال فارس
فارس : حبيبي مين الي معك تو
تميم : تقصد ماما ؟
فارس : اه هذي امك طيب وين ابوك ماقد شفناه
تميم وهو يلعب بالجوال : بابا عشانه يضربنا ماما  راحت عنه
ناظره فارس استغرب من الاباء الي زي كذا مد يده يعبث بشعره وكمل سواقه
_______
دخل اسر على توليب الي جالسه على السرير وضامه رجولها لصدرها جلس جنبها والغريب انها ما انتفضت او سوت شي ناظرته بكل هدوء
توليب : ماقلت لي وش صار معك لما بعدنا
مسك احدى خصلاتها يرجعها خلف اذنها وقال بصوته الهادي : امي متحكمه ماقدر اقولها لا تزوجتك بعد معاناة من الاقناع شفتي معاملتها لك وتفهمتي وصبرتي بس لما وديتها لبيت خالتي توقعت انها زيارة عادية بس لما دخلت اسلم اشوفهم يتهموني اتهامات كثيرة ومنها اني بعلاقة مع امل وسبب طلاقها من زوجها الاول ماقدرت اتكلم والي صدمني اكثر امي من وقفت معهم واكدت كلامهم رمشت لقيت نفسي اوقع على ورقة زواجي منها
والوحيدة الي كانت قدامي انتي تذكرت كيف اخترتي لي ثيابي هذاك اليوم وناظرت الساعه الي جبتيها لي هديه هذاك قلت انتي طيبه بس الدنيا تخليك تشوفين اشياء مب زينه ، هذاك اليوم مستحيل انساه ولا بيطلع من بالي
توليب : مستحيل اي احد منا ينساه يا اسر
~~~
كانت ميس بالبيت ترتب الصاله وتتفرغ لشغلها بحكم عدم وجود تميم
طقت رقبتها من خلصت وخذت العود تحطه فوق الطاوله تروح غرفتها تطلع لها
تيشيرت من درجات الاخضر الغامق وليقنز اسود لبستهم وجلست قدام تسريحتها تشيل المنشفه من على شعرها الاشقر تبدا تنشفه ولما خلصت طلعت من غرفتها تبي تروح للمطبخ بس سمعت صوت عند الباب خلاها تتجمد مكانها تحاول تنكر الي تسمعه بس ماقدرت
صوت زوجها مساعد ومعه زوج امها كسار انتفضت من الباب الي شوي وينكسر سحبت جوالها بسرعه ودخلت غرفة تميم تقفل عليها حاولت تتصل على توليب بس معطيها مقفل
كتبت رقم ولاء وتستناها ترد واول ماردت انكسر الباب
ولاء : ميس وشذي الاصوات ؟
ميس : ولاء اللحقو علي مساعد ومعه زوج امي جو عندي تكفين
ناظرت ولاء رغد تأشر لها تقوم معها : طيب جايين وينك ؟ ... تمام
سكرت منها يركبون
رغد : كسر امر الابتعاد يعني ؟
ولاء : هذا الواضح دقي على انس اذا حولها يلحق عليها
طلعت جوالها تتصل على انس الي رد بالرنه الثانيه
انس : هلا رغد
رغد : انس بسرعه روح عند ميس مساعد دخل عليها
انس : رغد منجدك ؟
رغد : ايههه بسرعه اللحق على البنت
قفل انس السماعه يناظر فارس الي مستغرب منه
انس : امش امش بقولك كل شي جب تميم
هز فارس راسه يشيل تميم ويروح ورا انس
~~~~~~~
((لا استبيح القرائه بدون نجمه))
رايكم بالبارت وتوقعكم للقادم