روح تراني طايب النفس مابغاك حكم طغى ماعاد ينفع نظامه

البارت ٩

نزلت توق ورا رعد ووقفت مستغربه من المكان
توق : جايبني اصير نجارة ؟!
ضحك رعد بخفه : جبتك هنا لأنه مكاني المفضل
توق : كيف يعني ؟؟
خذ رعد نفس يزفرة وقال : انا شخص فاقد ذكريات من حياته بسبب حادث ذكريات طفولة مع بنت صغيرة ما اعرف منها الا شكلها بالصغر اما اسمها وعايلتها ووين هي كل شي نسيته تماما
كان يتكلم وتوق وراه وتتذكر طفولتهم انتبهت على نظراته لها
رعد عطاها ظهرة وهو يدخل المحل وقال : شامتها نفس شامتك وعيونها بعد
رمشت اكثر من مرة اما هو دخل
توق بهمس : ودي انك تتذكرني يا رعد بس لسلامتك الوقت مو مناسب
خذت نفسها تزفرة ودخلت المحل
ابتسمت لما شافت شخص مع رعد ومن طريقة كلامه استنتجت انه ابوه
مالك : حياك يا توق
ابتسمت بأستغراب من معرفته فيها ولاحظ عيونها الي تضيقت من تحت النقاب ونطق : قالت لي زوجتي عن كل شي
رعد : تعرفها ؟!
مالك : ايه توق حفيدة زيد ال رشيد الي رحنا لهم قبل فترة
ناظرها رعد وبدا يجمع كل شي ويحاول يستوعب
مالك : شكلك جايب لي تلميذة جديدة عشان تنحاش من التدريبات
رعد : افا يبه
توق : يعني انت تتعلم هنا وللحين ماعرفت تضبطها ؟!
مسك رعد المريله حقت الشغل ومدها لها : وريني شطارتك اشوف
توق : تم هات
خذت المريله تلبسها مع القفازات وهو سوا نفس شي
مالك : اجل كل واحد يستلم شغله توق شوفي الطاوله ذي ابهريني
توق : ابشر ماعليك ازهلني
بدو يشتغلون ورعد كل مرة يناظر توق ويحاول يستوعب الترابط الي بينها وبين ال رشيد
مالك : تعرفين ماشاء الله عليك
توق : يعني مو مرة يمديك تقول عندي خبرة سابقه
مالك : اجلسو ارتاحو
جلسو رعد وتوق قدام بعض على الكراسي وراح مالك يجيب لهم شاهي وجلس
توق : كم لك هنا ؟؟
رعد : انا يمكن من عمر ١٥ بس اذا عن ابوي من صغرة وهو هنا
مالك : المحل ذا اول بداية لي بالشغل والاعتماد على النفس بعدها انتقلت للشركات بس للحين مستمر فيه
توق : حلو تركض ورا شغفك وبنفس الوقت شغلك عاد هذا حلم التقاعد
رعد : يبه وش صار على البيت عشان توق
مالك : ممتاز بس المستأجر يبيله شهر وزيادة عشان يطلع
توق ابتسمت : عادي انا ببيت اهلي وادور بعد لاتتعبون نفسكم
رعد : انتي تبين تستقرين ببيت لحالك ولازم من بدري تجهزينه ولا ماخلصتي بتصيرين زي البدو الرحل
توق : مو مشكله مافيه شي ماينحط بالشنطه
ناظرها بأستغراب من كلامها
مالك بهدوء : انتي زي الشجرة الي مالها جذور
ناظرته توق وفهمت ليش قال كذا وابتسمت
_________________
نزلت توليب من فوق وكانت لابسه توب اسود وبنطلون بنفس اللون فوقهم جكيت صوف خفيف
راحت المطبخ تاخذ لها كوب مويه طلعت للصاله وشهقت لما شافت اسر بوجهها وطاح الكوب من يدها ينكسر
فز لها بسرعه وبدون وعي حملها يحطها فوق الطاوله المطله على الصاله
توليب : اسر انقلع ياخي
اسر بتجاهل لكلامها : وين اللزقات الطبيه ؟!
توليب : وش جابك روحح
اسر : اسمعي بحط عليه ثلج اصبري
فتح الفريزر ياخذ القوالب وشاف منشفة زينه خذها يحط ثلج فيها ويلفها
توليب : اسررر رجعها واطلع
اسر : ازعجتيني زي الببغاء اطلع اطلع ماني طالع جاي نتفاهم
توليب : مافيه شي نتفاهم فيه روح
اسر : ليش تسوين كذا ليش صدقتي اني سويت كذا برضاي مو انا اسرك الي توثقين فيه ؟؟
ناظرها وكانت ساكته يكمل بهدوء وغصه : كيف مات ؟؟
توليب : مين !!
اسر : ولدنا قالولي انه جا ميت شلون ؟!
توليب : مثل ماسمعت جا بالشهر السابع ميت ومانقدر نسوي شي
اسر : ليش ماقلتيلي ليش اعرف من اهلك انه انولد بدري وميت توقعت يا توليب انه من الشهر الاول او الثاني يمكن الالم بيكون اقل بس ينولد ميت هذا شي يعور قلبي ليش ما اهتميتي بنفسك
توليب : اسر لوسمحت اخر من يتكلم انت بسببك وصلت للحاله ذي بسبب حبي لك وعدم تصديقي انك خنتني دخلت بحالة نفسيه دمرتني واهملت صحتي
اسر : للحين عندك مشاعر لي ؟؟
توليب بعد مانزلت من على الطاوله : لا ماعندي وكل الي بقا منها تحول للكره يا اسر والحين اطلع برا العلاقه الي بينا الحين هي زمالة بس ولما تخلص القضيه كل واحد بطريقه وانت عيش حياتك معها
اسر : توليب بترجعين لي صدقيني برضاك او بدونه مستحيل اتخلى عنك
صرخت توليب بأنفعال عليه وحطت يدها على اذنها تنزل دموعها : اسر بس خلاص لاتتكلم اسكتت مابي ارجع لك انت دمرت حياتييي خلاصصصص مستحيل انسا انك سبب كل شي صار لنا
مسك اسر يدها الي على اذنها بس نفضتها تبدا تضرب صدرة وتدفه : لاتلمس اطلع لاتحاول تواسيني اقولك اطلع برا
غمض اسر عيونه بقوة وعطاها ظهره يطلع اما هي نزلت على ركبها تبكي وتتذكر كل شي بينهم وشلون صار حبها له اكبر عذاب
____________
مسك رعد جواله يرد على اتصال اسر
رعد : هلا
اسر بصوت مخنوق : وينك رعد ؟!
رعد : مكاني المعتاد وشفيه صوتك !
اسر : بجيك الحين
رعد : طيب طيب استناك
سكر منه يلف على ابوه : اسر بيجي يبه
توق : تمام استأذنكم انا ودي اروح عند توليب
مالك : فرصه سعيدة توق
هزت راسها توق وطلعت سيارتها تحط موقع بيت توليب بعد ماعطتها ميرال تتوجه لها