ကနဦး နှစ်ရက်သုံးရက်ခန့်ကြာပြီးနောက် ပုံမှန်အတိုင်းပြန်ဖြစ်သွားကြသည်။ အတူထမင်းစားဖို့ဆိုလျှင်လည်း စားလိုက်ကြသည်ပင်။ အတူလုပ်ကြရမည့်ကိစ္စဆိုလျှင်လည်း လုပ်လိုက်ကြသည်ပင်။ အရွယ်ရောက်ပြီးသူတို့သည် ဤသို့သောကိစ္စရပ်များကြောင့် အချိန်ကြာမြင့်စွာ ကသိကအောက်မဖြစ်ကြပေ။
နောက်ထပ်သုံးရက်ခန့်ဆိုလျှင် သူတို့အဖွဲ့လည်း ပြန်ကြရတော့မည်ဖြစ်ပြီး ထောင်ရှောင်တုန်းကို စောင့်နေသည့်အလုပ်ကလည်းတစ်ပုံတစ်ပင်ကြီးပင်။ အမှန်စင်စစ်မူ သူသည်ခရီးစဉ်ပြီးသည်ထိ မလိုက်ပါလည်းရ၏။ သူက ငွေကြေးပါဝင်အားဖြည့်ပါသော အလှူရှင်ဖြစ်သဖြင့် သူတစ်ဦးတည်းစောစောပြန်သွားပါကလည်း မည်သည့်ပြဿနာမှမရှိချေ။ သို့သော် မည်သို့သော အကြောင်းရင်းကြောင့်ပေမသိ၊ သူကား ခရီးစဉ်ပြီးသည်ထိ အရင်ပြန်မသွားခဲ့ပေ။ ထောင်ဟွိုင်နန်ကလည်း ခရီးတစ်လျှောက်လုံး လွန်စွာပျော်ရွှင်တက်ကြွနေသည်ဖြစ်ရာ ပုံမှန်ဆိုလျှင် သူ့ကိုအပြင်သိပ်မထွက်ခိုင်းခဲ့မိလို့များလားဟုပင် ထောင်ရှောင်တုန်းတစ်ယောက် တွေးယူနေရသည်။
အတူတကွ ခရီးထွက်လာကြသည်မှာ နှစ်ခေါက်ပင်ရှိပြီဖြစ်ရာ ထောင်ရှောင်တုန်းနှင့် အဖွဲ့တွင်းရှိဆရာဝန်များလည်း အတော်အသင့်ရင်းနှီးနေပြီဖြစ်၏။ သူတို့ပြန်ရောက်ပြီးကြသည့်အခါ သူတို့ဌာနကို အလည်အပတ်ဝင်ခဲ့ကြဖို့ပင် ပြောနေကြသေးသည်။
အားလုံးက အတူတကွစုဝေးကာ ထမင်းစားနေကြခြင်းပင်။ ထောင်ရှောင်တုန်း၏ အကြည့်များက သိပ်မဝေးသည့်နေရာတွင် စကားပြောနေပြီး ထမင်းလာမစားသေးသည့် ထန်ဆော်ယန်ပေါ် ကျရောက်သွားသည်။ "ခင်ဗျားဒီလိုပြောကြေးဆိုရင် အကြီးအကဲထန်က ကြိုက်ပါ့မလားဗျာ။ သူကဆေးရုံမှာဆို အရမ်းအရမ်းတင်းကြပ်တာဆိုဗျို့။"
"ကျွန်တော်လည်း ဒီတိုင်းပြောလိုက်တာပါဗျာ။ ခင်ဗျားအတည်ကြီးမမှတ်လိုက်ပါနဲ့။ ခင်ဗျားကလည်း ဒီလောက်အလုပ်များတဲ့ဟာကို။" တစ်ဖက်လူက ရယ်မောလျက် ပြန်ဖြေသည်။
ထန်ဆော်ယန်ကလည်း တစ်စုံတစ်ယောက် သူ့ကိုကြည့်နေကြောင်း အာရုံခံမိသဖြင့် လည်ပြန်လှည့်ကြည့်လာရာ ထောင်ရှောင်တုန်းနှင့် အကြည့်ချင်းဆုံသွားသည်။ သို့ဖြစ်ရာ ထောင်ရှောင်တုန်းလည်း သူ့ကိုလှမ်းရယ်ပြရင်း ဆက်ပြော၏။ "ဒါတော့ သိပ်မသေချာဘူးဗျာ။ ကျွန်တော်ဖြင့် အားရင်အားသလို ခင်ဗျားတို့ဌာနကို အပြေးလာရတော့မှာပဲ။"
YOU ARE READING
燎原 (Myanmar Translation)
Romanceထောင်ရှောင်တုန်းတွင် မျက်မမြင်ညီလေးတစ်ယောက်ရှိသည်။ ထန်ဆော်ယန်သည်ကား သူ့ညီလေးအနှစ်သက်ဆုံးသော ဆရာ၀န်ဖြစ်သည်။ ထောင်ရှောင်တုန်းအတွက်မူ လူတစ်ယောက်ကိုနှစ်သက်လျှင် ၎င်း၏အိမ်ခေါင်မိုးပေါ်ရှိကျီးကိုပါ ချစ်ရတော့သည့်ပမာပင်။ ခပ်လွယ်လွယ်ဖြင့် ရရှိလာသည့် မည်သည့်အ...
