ဤနှစ်တွေတစ်လျှောက်လုံး သေရည်ဝိုင်းတွင် အခြားသူများနှင့် တစ်ကြိမ်တစ်ခါသော်မျှ ပြဿနာမဖြစ်ခဲ့ဖူးဆိုသည်မှာ ထောင်ရှောင်တုန်း တွေ့ကရာပြောခြင်းမျိုးမဟုတ်ပေ။ သေရည်ဝိုင်းတွင် မဆိုထားနှင့်၊ အခြားမည်သည့်နေရာတွင်ဖြစ်စေ ထောင်ရှောင်တုန်းသည် အခြားသူများနှင့် ပြဿနာဖြစ်လေ့မရှိပေ။သူက တစ်ပါးသူအား အကြောင်းမရှိ အပြစ်ပြုခြင်းဆိုသည်မျိုး၊ အရှက်ရစေခြင်းဆိုသည်မျိုးက ကြုံခဲလှ၏။ သို့တစေ တစ်ဖက်သူ၏ အပြုအမူများက လျစ်လျူရှု၍မရနိုင်လောက်အောင် လွန်ကဲလာလျှင်မူ ချွင်းချက်ပင်။ သို့သော်ငြား ထောင်ရှောင်တုန်းသည် ထိုကဲ့သို့သော အကျင့်စရိုက်ရှိသည့်ပုဂ္ဂိုလ်များနှင့် ပေါင်းသင်းခြင်းလည်းမရှိပေရာ ပြဿနာဖြစ်ရသည်ကလည်း ခပ်ရှားရှားပင်။
ဤအခေါက် သူစိတ်အနှောင့်အယှက်ဖြစ်သွားခြင်းသည် ရှယွမ်နှင့် ထျန်းရိနှစ်ယောက်စလုံးကို အံ့အားသင့်စေခဲ့သည်။ ထောင်ရှောင်တုန်းနှင့် ထျန်းရိတို့သည် အလယ်တန်းကတည်းက တတွဲတွဲနေလာကြသော ငယ်သူငယ်ချင်းများဖြစ်ကြသည်။ ထိုစဉ်အခါကာလများတုန်းက သူတို့သည်အရွယ်ရောက်ကာစ ဆယ်ကျော်သက်ကလေးများဖြစ်ကြပြီး အချိန်ရှိသရွေ့ ပြဿနာရှာတတ်သော ကောင်ဆိုးကလေးများပင်။ 'ထုတ်မပြောရ' ဟူသည့်စည်းမျဉ်းဖြင့် ရန်ပွဲပေါင်းများစွာလည်း ဆင်နွှဲခဲ့ကြပေသည်။ နောက်တော့ သူတို့သည် တဖြည်းဖြည်းအရွယ်ရောက် လူလားမြောက်လာကြသဖြင့် ထိုအချိန်ကာလများကဲ့သို့ မိုက်မဲခြင်းမျိုးမရှိကြတော့ပေ။ သူတို့သည် သူတို့၏ဒေါသကိုလည်း ထိန်းလာနိုင်ပြီး တည်ငြိမ်ရင့်ကျက်သူများ တဖြည်းဖြည်း ဖြစ်လာကြကုန်၏။
ယနေ့ အနှီလူသည်ကား စိတ်အနှောင့်အယှက်ဖြစ်စရာကောင်းလွန်းလှသဖြင့် ထျန်းရိပင်လျှင် မနေနိုင်ဘဲ ဝင်ပြောတော့မလို့ပင်။ သို့ဖြစ်ရာ ထောင်ရှောင်တုန်း သည်းမခံနိုင်တော့ ဆိုသည်ကလည်း ပုံမှန်ပင်။ သို့ပါသော်လည်း ထျန်းရိကို အံ့အားသင့်စေခဲ့သည်က ထောင်ရှောင်တုန်း၏ ပြင်းထန်လှသောတုံ့ပြန်ပုံပင်။ ထောင်ရှောင်တုန်း၏ ပင်ကိုစရိုက်အရဆိုလျှင် သူသည် စားပွဲကို ခွက်အောက်ခံဖြင့် ခေါက်လိုက်ပြီး "ဒီလောက်ဆို လုံလောက်ပြီ။ တော်လိုက်တော့။" ဟုမျှသာဆိုပေလိမ့်မည်။ သူသည် ထိုအတိုင်းအတာမျှနှင့် တန့်လိုက်မည်ဖြစ်ပြီး အခြေအနေကို ထိန်းမရသိမ်းမရဖြစ်စေမည်မဟုတ်ပေ။
YOU ARE READING
燎原 (Myanmar Translation)
Romanceထောင်ရှောင်တုန်းတွင် မျက်မမြင်ညီလေးတစ်ယောက်ရှိသည်။ ထန်ဆော်ယန်သည်ကား သူ့ညီလေးအနှစ်သက်ဆုံးသော ဆရာ၀န်ဖြစ်သည်။ ထောင်ရှောင်တုန်းအတွက်မူ လူတစ်ယောက်ကိုနှစ်သက်လျှင် ၎င်း၏အိမ်ခေါင်မိုးပေါ်ရှိကျီးကိုပါ ချစ်ရတော့သည့်ပမာပင်။ ခပ်လွယ်လွယ်ဖြင့် ရရှိလာသည့် မည်သည့်အ...
