"ကော ဒီနေ့ဘယ်သွားမလို့လဲ။" ထောင်ဟွိုင်နန်သည် သူ့ဘာသာ ခွေးခြေခုံလေးတစ်ခုကိုယူလာလျက် ရေချိုးခန်းရှေ့ ငုတ်တုတ်ကလေးထိုင်ရင်း သူ့အစ်ကိုဆေးကြောသန့်စင်သည်ကို စောင့်နေခဲ့သည်။
"သားက ဘာလုပ်မလို့လဲ မေးပြီးတော့။" ထောင်ရှောင်တုန်းက သူ့ကိုမေးလိုက်သည်။
ထောင်ဟွိုင်နန်က သူ့မျက်လုံးများကို တွန့်ကွေးလိုက်သည်။ "ကောက ဒီနေ့တော်တော်ကြီးကို သပ်သပ်ရပ်ရပ်ဝတ်ထားတာကိုး။"
"မင်းလေးကတော့ တကယ်ကို အတွေးများနေတော့တာပဲ။ ကောက ညစာသွားစားမလို့လေ။" ထောင်ရှောင်တုန်းက ရယ်မောလိုက်သည်။
"ဒေါက်တာထန်နဲ့လား။" ထောင်ဟွိုင်နန်က အနီးသို့ ပိုတိုးလိုက်သည်။
ထောင်ရှောင်တုန်းသည် ၎င်းကို ကွယ်ဝှက်မနေပါချေ။ "အင်း။"
"ဒါဖြင့် မြန်မြန်သွားတော့လေ။" ထောင်ဟွိုင်နန်က ရေချိုးခန်းတံခါးပေါ် ရှိအကွက်ကလေးများကို ဆော့ကစားနေရင်း ပြုံးတုံ့တုံ့ဆိုသည်။ "မြန်မြန်သွားနော်။"
ထောင်ရှောင်တုန်းသည်လည်း ညစာကို အိမ်၌စားမည်မဟုတ်ရာ ထောင်ဟွိုင်နန်က သူညစာကို စွပ်ပြုတ်သောက်လိုကြောင်း ချီချန်အား တောင်းဆိုလိုက်သည်။ ချီချန်က သူ့အတွက် စွပ်ပြုတ်ပြုတ်ပေးပြီး အချိန်အချို့ယူကာ ခေါက်ဆွဲကိုပါ ပြင်ဆင်ပေးခဲ့သည်။
"အခုဆိုရင် ခူကောချက်ပေးတာမဟုတ်ရင် စားကောင်းတယ်လို့ကိုမထင်တော့တာ။" ထောင်ဟွိုင်နန်က ဆိုဖာပေါ်သို့ထိုင်ချလိုက်ရင်း ခေါက်ဆွဲနံ့ကို နှာတရှုံ့ရှုံ့ပြုရင်း ပြောသည်။
ထောင်ရှောင်တုန်းက အပြင်ထွက်ရန် ပြင်ဆင်နေရင်းဖြင့် ဤသည်ကိုကြားတော့ လှမ်းပြောလိုက်သည်။ "ဒါဖြင့် သူများကို စိတ်ရှုပ်အောင်လုပ်တတ်တဲ့ အကျင့်ကို အရင်ဖျောက်လိုက်ဦး။"
"သားက အရှုပ်ထုပ်မဟုတ်ပါဘူးနော်။" ချီချန်က မီးဖိုချောင်ဘက်မှ ထွက်လာသည်ဖြစ်ရာ ထောင်ဟွိုင်နန်က သူရှိရာဘက်သို့ လှည့်ပြောနေခြင်းဖြစ်သည်။
ချီချန်သည် သူ၏စကားများကို မကြားသလိုသာနေလိုက်သည်။ ထောင်ဟွိုင်နန်၏ စကားများကို ဘယ်နားဝင်ညာနားထွက်ဆိုရုံမျှသာ နားထောင်လိုက်ပြီး အတည်အတံ့မှတ်ယူခြင်းမရှိပေ။
YOU ARE READING
燎原 (Myanmar Translation)
Romantikထောင်ရှောင်တုန်းတွင် မျက်မမြင်ညီလေးတစ်ယောက်ရှိသည်။ ထန်ဆော်ယန်သည်ကား သူ့ညီလေးအနှစ်သက်ဆုံးသော ဆရာ၀န်ဖြစ်သည်။ ထောင်ရှောင်တုန်းအတွက်မူ လူတစ်ယောက်ကိုနှစ်သက်လျှင် ၎င်း၏အိမ်ခေါင်မိုးပေါ်ရှိကျီးကိုပါ ချစ်ရတော့သည့်ပမာပင်။ ခပ်လွယ်လွယ်ဖြင့် ရရှိလာသည့် မည်သည့်အ...
