ဤသည်က မေးခွန်းဟု မှတ်ယူနိုင်ပေ၏။
သူတစ်ပါးကို လက်ညှိုးထိုးထားခြင်းသည် မလျော်ကန်ဟု အသိဝင်သွား၍ထင့်၊ ထန်နင်သည် လက်ကိုပြန်ချလိုက်ပြီး ထန်ဆော်ယန်ကို မေးသည်။ "ခင်ဗျားတို့နှစ်ယောက် တွဲနေကြပြီလား။"
ထန်ဆော်ယန်သည် မည်သို့သောအခါကမှ ဤသို့လေသောဖြစ်အင်ကို အလိုမရှိခဲ့ပေ။ ဖြစ်ပျက်လာပြီဆိုပါက ပါဝင်ပတ်သက်သူသုံးယောက်အနက် မည်သူကမျှ ပြုံးပန်းဆင်နိုင်တော့မည်မဟုတ်သည့် ဤသို့လေသော ဖြစ်အင်မျိုးတည့်။ သို့ပါသော်ငြား ထန်နင်က နောက်ပြန်လှည့်လာဖို့ရာ ရွေးချယ်လိုက်သည့်အတွက် သူသည်လည်း မသိကျိုးကျွန်ပြုထား၍မရပါတော့ချေ။
ထန်ဆော်ယန်သည် သက်ပြင်းချလိုက်ပြီး မတ်တပ်ထကာ ပြောလိုက်သည်။ "အထဲဝင်ခဲ့၊ စကားပြောကြရအောင်။"
ထန်ဆော်ယန်ကဦးစွာဝင်သွားသည်။ ထန်နင်ကလိုက်မဝင်သေးဘဲ ထောင်ရှောင်တုန်းကို စိုက်ကြည့်နေ၏။ ထောင်ရှောင်တုန်းသည် ခပ်မှန်မှန်သာ အသက်ရှူနေပြီး ထန်နင်၏အကြည့်အောက်၌ပင် မည်သည့်မူမမှန်မှုမှ မရှိပါချေ။
ထန်ဆော်ယန်က နောက်တစ်ကြိမ်ထပ်ခေါ်သဖြင့် ထန်နင်လည်း သူ့နောက်လိုက်ဝင်သွားသည်။ အထဲရောက်သောအခါ ထန်ဆော်ယန်က တံခါးကိုပိတ်လိုက်ပြီးဆို၏။ "ထိုင်။"
သူကိုယ်တိုင်ကမူ ပြတင်းပေါက်ဘေးသွားရပ်ပြီး မှီလိုက်သည်။ "မင်းမှာပြောစရာရှိတယ်ဆိုရင် အခုပြောလို့ရပြီ။"
ထန်နင်သည် သူ့ကိုတစ်ခေါက်မကလာရှာပြီးဖြစ်ရာ သူ့ထံ၌ ပြောစရာအကြောင်းခြင်းရာတစ်စုံတစ်ခုကတော့ မလွဲဧကန်ရှိနေချေပြီ။ စင်စစ်မူ သူပြောလိုသည့်အကြောင်းအရာကို ထန်ဆော်ယန် ခန့်မှန်းနိုင်ပါ၏။ ထိုသည်ကပင်လျှင်လည်း သူရှောင်နေရသည့်အကြောင်းပေတည့်။ ထန်နင်စိတ်ဆိုးနေပြီဆိုလျှင် ပေါ့သေးသေးတော့မဟုတ်ပေ။ ယခင်ကဆိုလျှင် ထန်ဆော်ယန်သည် ထန်နင်စိတ်အဆင်မပြေရသည့်အကြောင်းအရင်းကို နားလည်လိုသဖြင့် သူ့ကို အချိန်ပေး၏။ ဖုန်းဆက်၏။ သူနှင့်ကောင်းကောင်းမွန်မွန် စကားပြောလို၏။ သို့သော် ထန်နင်က ထိုကဲ့သို့ အလိုမရှိခဲ့။
YOU ARE READING
燎原 (Myanmar Translation)
Romanceထောင်ရှောင်တုန်းတွင် မျက်မမြင်ညီလေးတစ်ယောက်ရှိသည်။ ထန်ဆော်ယန်သည်ကား သူ့ညီလေးအနှစ်သက်ဆုံးသော ဆရာ၀န်ဖြစ်သည်။ ထောင်ရှောင်တုန်းအတွက်မူ လူတစ်ယောက်ကိုနှစ်သက်လျှင် ၎င်း၏အိမ်ခေါင်မိုးပေါ်ရှိကျီးကိုပါ ချစ်ရတော့သည့်ပမာပင်။ ခပ်လွယ်လွယ်ဖြင့် ရရှိလာသည့် မည်သည့်အ...
