Ang Amo at ang Driver

Ang Amo ( The Boss ) Part 24

Part 24 Unexpected

Alexander's POV

"Anong sabi mo?!" Ulit na tanong ko matapos maproseso ng utak ko kung anong naging sagot nito sa tanong ko.

"Ang sabi ko, ikaw. Ikaw ang gusto ko." Pag-ulit na sabi ni Kiko.

"Nagbibi--biro ka hindi ba?" Utal na tanong ko. Bakit ba ako nauutal? Tanong ko pa sa sarili ko.

"Seryoso ako Alex sa sinabi ko at hindi ako nagbibiro." Sabi pa nito at unang beses kong marinig na sabihin n'ya ang pangalan ko na walang kasamang Sir, sa ayos ng mukha nito totoo ngang seryoso ito pero bakit at paanong may gusto s'ya sa akin? Para na tuloy akong tanga pati sarili ko kinakausap ko.

"Pero paanong may gusto ka sa'kin?" Ang naitanong ko na lang sa kanya. Maging ako'y naguguluhan kung paano n'ya nasabing may gusto s'ya sa akin.

"Hindi na mahalaga 'yon, isa pa alam ko rin naman na may mahal ka ng iba, kaya mas mabuti pang kalimutan mo na lang na may sinabi ako." Ang naging sagot nito.

"So pagkatapos mong sabihin na may gusto ka sa akin, sasabihin mo na kalimutan ko na lang kung ano ang narinig ko?" Inis na tanong ko, para kasing ako pa ang may kasalanan na may gusto ito sa akin.

"Oo, kalimutan mo na lang." Huling sabi nito at iniwan ako.

...

Pagpasok ko sa bahay iniisip ko parin ang sinabi ni Kiko na may gusto siya sa akin. Kaya hindi ko napansin na kanina pa ako pinagmamasdan ni yaya.

"Hijo mukhang malalim 'yang iniisip mo? May problema ba?" Alalang tanong ni yaya.

"Wala ho ya, sige po aakyat lang ako sa kwarto." Ang sabi ko at tinungo ko na ang kwarto ko.

...

Pagpasok ko sa kwarto ko ay naghubad na'ko ng damit at habang ginagawa ito'y naalala ko na naman ang mga sinabi ni Kiko. Iwinaksi ko na lang kung anong naisip ko at tinungo ko na ang banyo para maligo.

Matapos makapag-bihis ay hinanap ko ang cellphone ko at kaagad kong tinignan kung may text o baka tumawag si Kevin na hindi ko alam. Pagtingin ko nga rito ay may dalawang messages ako, isa galing kay Kevin at isa naman kay pinsan. Una kong binasa ang text na galing kay Anne at ang laman ng text ay nakaalis na nga si Dave, nag-paalam din ito na sa magiging bahay nila ni Dave muna s'ya tutuloy ngayong gabi. Sunod ay ang text na galing kay Kevin at nangangamusta lang, tinanong rin nito kung naging successful ang presentation kanina. Matapos mabasa ang mga text ay nag-reply kaagad ako.

Maaga pa naman at 8 pm palang kaya naisipan ko na manood muna ng tv. Sa sala naabutan ko pang nanonood ng teleserye si yaya.

"Oh akala ko matutulog ka na? Nagugutom ka ba? Teka lang at ipag-aahin kita." Kaagad na tanong ni yaya pagkakita sa akin.

"Huwag na po ya, busog pa naman ako. Maaga pa kaya sasamahan na muna kitang nanood." Ang sabi ko naman.

"Siya nga pala nagpaalam si Kiko na kung maari daw ba na umuwi muna s'ya sa kanila. Sinabi rin n'ya na maaga naman itong babalik bukas para maihatid ka, kaya pinayagan ko na rin." Napatingin naman ako sa sinabi ni yaya.

"Ah ganun po ba." Ang naisagot ko na lang.

"Si Mang Jimmy po kamusta naman s'ya, masakit parin ba ang paa n'ya?" Dagdag ko pa.

"Ang sabi n'ya kanina hindi na raw masyadong masakit at sabi pa nga n'ya baka wala pang isang buwan ay makakapag-maneho na s'ya ulit. Mukhang mabisa ang mga gamot na binigay ng duktor sa kanya." Mahabang sabi ni yaya.

"Mabuti naman po kung gano'n. Oo nga pala ya, bukas ay kaarawan ni Kevin at baka sa kanila na ako tutuloy bukas." Paalam ko rito.

"Ganun ba? Pakisabi na lang na Happy Birthday sa kanya at sabihin mo rin na kapag may oras s'ya ay dito siya kumain ng hapunan at ipagluluto ko s'ya ng kahit anong paborito n'ya." Mahabang litanya ni yaya.