فين داني زهري (تتمة)

الجزء 1

لبست باش رتاحيت، و خرجت انا و خنساء كندويو و هابطين نشوفو الضياف لي معرفتهمش، و يالاه غندخل للصالون و انا نوقف باش نفهم اش طاري هنا... لا لا لا واش هادا كيضحك عليا، واش منعسش و جاي ليوم بوالديه، لا والواعرة هي مفيوزي و جيب والديه يخطبو ليه... و لا واش كيتسطا انا مبغيتش مبغيتش، انا باقا صغيرة، اويلي على صغيرة الناس قدي راه عندهم حفيد... واخا انا مباغاش. محسيت غير بايد ماما كتجرني لداخل و ديك الضحكة لي كتبين لها ضرسة لعقل فاقصاني، و بركاتني حداها، و انا غير كندور فعينيا بين خالتي حياة و السي معتز و هالة و عصام و... آسر... اش جابو، خليك نتا و هوما يخطبو ليك خاصني نبقا نشوف فيك...
ماما: بنتي بيوتي
عارفا هاد بنتي كيتبعوها غير المصائب، و المصيبة هي ملي دوا داك وجه الويل
آسر: سبق و فاتحتك بالموضوع ا بيوتي، و مكين لاش نطولو الموضوع
لا واعرة هادي، انابقيت غير كنضور فعينيا، و كيبان لي بابا و سي معتز واخدين راحتهم فالهضرة و يوسف و عصام توانسو، اما خنساء فغير كتخنزر فيا زعما ديك القاديا ديال علاش مقلتيليش...
بابا: واش موافقة ا بنتي
اول من شفت فيه هوا آسر، لي دار فيا شوفت القتالا، و من عينيه عرفتو كيقول و الله و تقولي لا يتا نلوحك من سطح داركم، و تلفات عليا الهضرة و بركت غير كنخربق
انا: نعام، اش قلتي
بابا: موافقة على العريس
تا اشمن عريس هاداك راه هريس... ولا ولا ولا ولا و مباغاش و ماباغاش، ولكن سبقني لساني من الخلعة
انا: اه لي بان ليك ا بابا
كيبانو ليا كولشي كيضحك و ماما و خالتي حياة كيزغرتو، و سي معتز بغيت نقول عمي معتز و بابا كيتعانقو و يباركو لبعضهم، اما آسر فكيدير فيا شي شوفات غير الله يحفظ... اوا قرينا الفاتحة و جات بركات حدايا خنساء اوا و عطاتها للقريص
خنساء (كدوي بشوية): يا الكلبة ياك، انا آخر من يعلم
انا: لا راك اي زكاي راك مفاهماش الموضوع، راه مبزز عليا
خنساء: شوهي بوه ولا غير باركا ديري فالسبايب
انا: و راه قالك باغين يقتلوني ولا منعرف، و هوا بارك عليا يحميني، و بغيت نرفض ولكن...
آسر (لفت انتباه الجميع): الى مكانش كين شي مانع، لي نطولوه نقصروه، و مادام بيوتي موافقة، فانا مكرهتش نتكاتبو هاد السيمانة و ندي مراتي لداري
ينعل بوك يا لحمار اشمن مراتك، لا اخويا انا ممرات حد
حياة: و عرسك اولدي منفرحوش بيك، و شفتك زربان
خنساء (كدوي معايا): اويلي يا لمسخوطة ياكما حاملة
انا: اسطغفر الله العضيم
شفت بلي كلشي دار كيشوف فيا، و انا جمعت راسي، و آسر كمل
آسر: لواليدا انا ماباغي عرس، و مبغيتش نبقا نتجرجر بهاد خاطب بلا والو، صافي نتكاتبو و ناخد مراتي لداري
شاف فيا ديك الشوفة ديال تقولي شي كلمة نغبرك، و انا مقدرت نقول والو
ماما: ضاروري نفرحو بيكم اوليدي
[عصام (تحدر على آسر): شفتك زربان اصاحبي غير بشوية و نتا غطير
آسر (فهمو اش كيعني): ديها فمراتك حسن ليك
بقا عصام كيشوف فيه ديك الشوفة ديال هاي هاي على خويا، و سي معتز دوا
معتز: مادام الدراري طالبين غير المعقول علاش نوقفو ليهم فطريقهم، صافي ا ولدي وجد لوراق و تكاتب نتا و مراتك
حياة: ولكن راه حتا حنا باغين نفرحو بيكم، تكاتبو و خليو العرس حتا نوجدو ليه
بابا: و منها نيت نعرضو على الناس
آسر طلع ليه الدم حيت باركين يعكسو ليه، و بيوتي حسات بلي غتعتق، ولكن كمل عليها عصام
عصام: قال ليكم راه مباغيش العرس، ديرو غير حفلة صغيرة نتجمعو غير حنا و يدي هوا مراتو و سالينا
بيوتي بغات تلاح على عصام تقجو و تبرد فيه لغدايد، اما آسر فكان ممتن لخوه
آسر: اه حفلة صغيرة بيناتنا قادو و زيادة
بابا (كيدوي معايا): اش قلتي ا بنتي]
اش غنقول واش خليتو ليا ما نقول، حياتي كاملة و انا نحلم بعرس اسطورس و بنشارك فلالة لعروسة و نضحك عليا الناس، و كنحلم بالحب و منعرف اش جايني هادا حتا هوا وااااه على زهر هاذا
انا: معنديش مشكيل لي درتوها مزيانة
ابلاتي اسي آسر الا ما نوريك شكوناهسا بيوتي شهد راني منتسماش، الا ما ندمك على النهار لي تزوجتيني فيه، اولا لي غتزوجني فيه راني مشي بيوتي...

خنساء: صافي زرب عليك، هادشي لي بغيتي يالاه فرحي و ديري العمارية، غادا تزوجي بلا عرس بلا خطبة، واش  هادا سميتو زواج، اويلي و انا لي معولة غنحيح فعرسك، اش خليتو لي ما نقول
انا: متزيديش عليا خليني عليك واش بان ليك انا عاجبني لحال
بقيت غير متكية و كنخمم و خنساء كتجدب عليا من فوق راسي... هادي واعرة هاجر و فدوى تخطبو قبل مني و انا غنتزوج قبل منهم، طاح عليا الفال، هوا راه طاح عليا آسر... شفت حتا عيت و نضت لبست تجين ديالي و فوقاني ديالو طويل و خرجت مع خنساء نتنفس شوية الهوا نقي، و بقينا انا وياها غادين حتا وصلنا لواحد السناك، هاد السناك قيدت فيه كاع دكرياتي، فيما نكون طالع ليا الدم اولا كنبكي كنجي ليه، بركت و هوا يوقف عليا داك الدري لي خدام فيه
ريان: ختي بيوتي اش خبارك، كيديريا خنساء
هاد ريان كيموت على خنساء، ولكن مكتعبروش حيت كيجيها مبنت، لا لحية لا فورمة خلاتها هي...