فين داني زهري (تتمة)

الجزء 7

شاف سعد الموضوع غيتشوه خاصتا ان الصحافة كتسنا غير تقنقينة، و هوا يدخلها هي و راجلها للبيرو ديالو، و باقا ديك السيدة دموعها يقطعو فالقلب... دخلو و سد سعد الباب و برك فالبيرو ديالو و هي و راجلها مقابلين معاه، و باقا كتحاول تمسح دموعها لي سردو لها نقابها
سعد: اش طاري ا لالة
السيدة: انا اسيدي سميتي...بديعة سميتي بديعة و راجلي سميتو نور الدين... هادي عامين دابا باش تعرفت على السي ناصر، و درت فيه التيقة و هوا قالي باغي المعقول و قلت ما كين باس، شوية و هوا يقولي راني منقدرش نتسنا نتزوجو عرفي و حتا نتهنا من الخدمة لي مكتساليليش هاد الفترة و الضغط العائلي و ندير ليك عرس يحلو فيه الناس فامهم فيه، و انا تقت و تزوجتو عرفي و كنا بيخير، حتا عرفت راسي حاملة، و قلتها ليه زعما باش نتزوجو و هوا مبغاش و ولا باغي ينكرني، و باش يسكتني زوجني من هاد ولد الناس، لي مسكين ملاقي ما يكال فنهارو عاد يوكلني معاه، و صبرت و قلت هادشي لي مكتاب لي ولكن ملي يوصل حتا يسيفط لي لي قتلي بنتي لي عاد تزادت حرام عليه
بدات كتبكي و راجلها كيمسح لها على ضهرها مفاهم والو
السيدة: راها بنتو حتا هوا زعما، حتا القانون واقف معاه، شنو حيت هوا عندو الفلوس، حيت زعما كيحساب لو راسو قوي راه القوي هوا الله و سوا اليوم سوا غدا غياخد لي ربي حقي منو
سعد مسكين مصدوم من هاد الفعلة لي ديرها ولد عمو، و مصاب ما يقول للسيدة
السيدة: انا جيت غير باش نطالب بشي حل، ملقيتك غير نتا ا سي سعد، و الى بغيتي توقف مع ولد عمك راه ربي معايا... صافي بنتي مشات، و كبدتي تقطعات... انا عرفت بلي باغي يتزوج، و منقدرش نخليه، حيت من شحال و هوا كيراقب ديك البنت و انا كنشوفو غير بالسكات، انا مبغيتوش يدمرها كيفما دمرني، انا شفتها نهار صرفقاتو ولكن منبغيهاش تعيش معاناتي على قبل تصرفيقة، انا هادشي لي كنطلب ا سي سعد حسبني بحال ختك، اولا خطيبتك لي كانت غتغتاصب، اما انا راه فقدت حياتي شحال هادش، و حن فديك البنت لي مليها لا حنين لا رحيم و ديرا النية
ناضت وقفات و دموعها كيف الشلال فعينيها، و راجلها شاد لها فكتافها لي كيتهزو معاها، و سعد وحلو لو الكلمات فحلقو، و حس بانه فعلا حكرها، و بغات تخرج و وقفها سعد
سعد: خلي ليا نمرتك الالة لبغيت غير نعونك
السيدة: غتعاوني الى عتقتي ديك البنت قبل لا يفوت الفوت، اما الفلوس راه ربي كبير
خرجات و خلاتو بارك شاد فراسو اش غيدير فهاد الكارثة دابا... ولكن ضغيا تدارك الوضع و عيط لناصر حيت هاد الموضوع اخطر مما كيتخيل، و تقدر الصحافة تعرفو فأي وقت، اضافتا الى ان سعد ميبغيش الضلم، حيت كيفما معجبوش داكشي لي كان غيطرا لنردين مغيبغيش يطرا لأي بنت اخرى...
فبلاصة اخرى بعيدا تماما على الشركة، فدار خال بيوتي بارك الياس و آسية كيدويو و ريتاج كتراقبها حيت شكات بلي بيناتهم شيحاجة... هوا لحد الآن بصح مبيناتهم والو، ولكن ريتاج باغا يولي بيناتهم باش تفك من ختها الصغيرة لي غير لاصقة فيها فيها... وخاصها شي خطة باش تجمعهم و تهني راسها...
اما واحد فدوى و هاجر فشحال مدوينا عليهم، عندك هاجر بعد يومين خطبتها راكم عارفين من بعد عرس ايمان، اما فدوى هي و يوسف باقين قادينها غير تزنديق و تعناب الله يهديهم... بركات هاجر و فدوى كيتساراو لمول باش يشريو لخصهم شي حاجة، هادشي طبعا باقين مساقوش خبار خطبت بيوتي اولا خنساء و يحيحو، عندك ايمان فخبارها غير هيا فشهر العسل حسن ليها...
هاجر: فدوى ختي، تعرفيني معنديش مع التشطار اش بان ليك نعيطو لخنساء و بيوتي
فدوى: تعرفي شحال مهضرت معاهم، ملي تزوجات ايمان و انا مكنحكش راسي من الخدمة ليوسف و من يوسف لعندك
هاجر: انا غير القربالة لي فالدار ديال الضياف قالبا لي راسي، عاد زيدي ملي كنخرج انا و حسام باش نشري الفراش ديال البرطمة
فدوى (بصدمة): علاه حسام شرا
هاجر: اه علاش مقلتهالكش، شراها شحال هادا ملي قرب عرس ايمان، و مشينا ليها مع واليده و والديا
لمهم بقاو كيجمعو، و برد الخدايد فالشوبينغ النهار كامل مخلاو ما شراو، المول كامل حطوه و عكزو باش يعيطو على بيوتي و خنساء، كيف شفتيهم هوما بعدا مساليين، راه كل وحدا همها فشكل...
قربات تاني جلسة في المحكمة ديال نردين و كيحاول ناصر و آسر انهم يلقاو زيد فأقرب وقفت، و غير قالو ليهم الرجال بلي هاهوما جاين، بداو الشياطين ديال آسر و ناصر كيخدمو، و زيد ان آسر غيخدم معاه واحد الشخص و خاصو يدوي معاه، ولكن مشي دابا حاتا يحين الوقت... آسر مشا باش للمول حيت باغي يشري لبيوتي ما تلبس قدام عائلتو تقول معندها ما تلبس، ولكن هوا باغا يشريلها و صافي، اما ناصر فعيط ليه و سعد و كان طالع ليه الدم فخلا آسر يمشي و مشا ديريكت للشركة باش يشوف اش طاري...
نرجعو لخنساء لي من الصباح و هي مقادراش تركز على خدمتها حيت كتفكر فالزبلة لي مشات بيوتي و آدم يديروها، و بقات غير ديف المستوهة كدور فعينيها فداك الملف لي فايديها، و واخا كتقرا الحروف حتا حرف مكتستوعبو...]