فين داني زهري (تتمة)

الجزء 3

شافت بيوتي فيوسف
بيوتي: تبارك الله على الراجل ديال الدار فين النفس فيناهي الغيرة على ختك، زعما راه تنا لي غتحامي عليا
يوسف: عارف ختي فران و قاد بحوما
شيرت عليه بصندالة لي حداها، و كان هاز التيليفون ديالو
يوسف: شوفي تزيدي ضربة خرى غنخلط ختي و نقطع على آدم]
انا غير سمعت آدم نسيت بلي آسر هنا اولا ماما اولا حتا حالتي، و جريت خديت التيلي و جوبت
انا (و كنضحك حتا غتبان لي ضرست لعقل): الو
آدم: توحشتك، و فين هاد لغبور، فينما نبغي نعيط ليك نلقا تيلي مهرس اش هادشي
انا (عيني غرغرو): يا ولد لحرام ملي مشيتي و نتا جامعني و طاويني
آدم: علاه انا نقدر، نتي الحب نتي
انا: حلف مخنتيني
آدم: غير وحدا مدات ما جابت
انا: ياك، و حتا تجي
آدم: فين غنجي راني فالمطار الحاجة
انا: ربي ربي
آدم:و الله راه عيطت لالياس غيجي ليا حيت لوطو باقا موصلاتش
انا: شوف بقا تما انا نص ساعة و نكون عنك، و الله و نلقاك مشيتي يتا ندير ليك الضوبل ديال لي كنت غندير
قطعت و لحت التيلي و يوسف طاح باش يشد تيلي ديالو و ميطيحوش، و مشيت كنجري مبانوش ليا لحوايج لي فوق السرير، جبدت وحدين جداد و دخلت كنجري للطواليط حاشاكم بدلت و غسلت حالتي و مقاداني فرحة، واو آدم رجع للمغرب صافي ليوم ندير الزردة... خرجت كنجري من الحمام و معارفا ماما اش كتبلبل و انا غير كنجري و نجمع فصاكي، و آسر واقف كيشوف فيا اش كندير، و يوسف خرج مشا لبيتو... جريت لتحت و خرجت لا سلام لا كلام و كنسمع غير غوات ماما اما معارفاهاش اش كتخربق... شديت طاكسي و بركت نزرب فيه
انا: لمطار عافا خويا، سربي عافاك
تعرفو كنبان كيف دوك لي فالافلام الهندية لي كيكون حبيبها غادي و هي خاصها تشدو قبل و تعتارف ليه بحبها، و كاع الدرب كيتفرجو فيا، و نظمن ليكم حتا عرفوه راه غير آدم حيت عارفين اش كيطرا ليا ملي كيكون جاي... حسيت بالطريق طوالت، حتا وصلت عطيت لمول الطاكسي خلاصو و خرجت للمطار... دخلت و كيبانو ليا الناس جوقة و الدنيا غتفركع، و بزز باش دخلت و كيبانو ليا الناس خارجين و الناس كيتعانقو و انا غير كنقلب بعينيا، حتى حسيت بشي ايدين على عيني، درت بزربة لقيتو غير هوا، و تلاحيت عنقتو
آدم: ياه ليوم غنفلت من لعصا ياك
انا: كتحلم، بلاتي غير نبعد و تشوف
يالاه بعدت و انا نحيد الصندالة من رجلي و بركت نعطيه
انا: ياك غير شفتي الطاليان و قلبتي علا وجهك، زعما راه انا لي كرينتك و انا لي كنت كنلعب معاك و انا لي وريتك بلي كتعرف تمتل
شد ليا ايدي
آدم: صافي صافي باقا عزيز عليك الشوهة تكيسي غير البشار كيشوف
درت و بانو ليا كيشوفو
انا: مالنا لحلقة يالاه لي عندو شي غاراض يزيد ليه
بانو ليا الجقلة بدات كتفرق، و رجعت ليه هوا
انا: اوا عيان واقيلا خلينا نتحركو من هنا
شوية حتا وقف علينا الياس كينهج
الياس (حاط ايدو على رطابيه و كيتنفس و هز ايدو و هوا كيجمع الهضرة): سمحلي... راه... يالاه خديت لوطو
وقف و تعانق هوا و آدم
الياس: على سلامتك
آدم: الله يسلمك
انا: كون غير مجيتيش، كنت غناخدو للدار معايا
الياس: حتا دابا خوديه
غير للعلم، الياس عندو 25 يعني قدي و آدم عندو 26، لمهم مندخلوش بزاف فالتفاصيل... يالاه غندور حتا لقيت داك وجه النحس حدايا، واش كيتبعني هادا
انا: نتا اش كدير هنا عاد خليتك فالدار
شاف فيا بنص عين و عينيه كيقولو ليا كحلتيها، و وقف آدم و دور ايدو بكتفي
آدم: شكون الاخ ولا مغتعرفيناش
شفت فيه بديك الشوفا ديال سكتنا، اما آسر جرني من ايدي حتا بعدت على آدم و شفتو خنزر فآدم واحد التخنزيرة و دوا معاه بالطاليانيا و انا غير كندور فعينيا، و شفت آدم بتاسم واحد الابتسامة استفزازية و جوبو بالطاليانيا و انا و الياس كيف الامانات غير كندورو فعينينا بيناتهم و كيبان ليك الضو كيضرب بيناتهم، مال هاذو زعما راه يالاه تلقاو اول مرة... هاد آسر عزيز عليه المشاكيل علاش جا... شوية حتا جرني آسر و بغا يتحرك، و انا نسل ايدي بالجهد
انا: ا مالك الاخ كين شي موشكيل
آدم (جا دوا ليا فودني): راجلك ممعاهش اللعب
درت عندو مخنزرة و باغا نعير، كون ما دوا آسر
آسر: اما غتحركي راسك ولا غندير لي عليا
آدم (هز كتافو و دار ليا زعما سيري مشي موشكيل)
زعما معولة عليه هوا غيعتقني، ساعة حتا هوا غير سمع راجلي و دار ليا فيها محكومة، لا و الكارثة هي انني معارفاش حتا اش قالو بالطاليانيا... ضرت خنزرت فآسر و تحركت و هوا زاد حدايا، حتى وصلنا لوطو و ركبت طاعا ليا عيشة... تحرك بلوطو و مكسيري وليت خيفا غير لنديرو شي كسيدة، شفت فيه بانو ليه العروق غيطرطقو لو فراسو و عنقو، اويلي مال هادا معصب عوتاني
انا: مالك😕
فرانا على الجهد و دار شاف فيا و عينيه باغين يقطعوني
آسر (غوت عليا): مسوقكش، نتي مدخليش، خرجي، سربيني
خرجت و لقيت راسي قدام مختبر التحاليل... اهي😢 دابا باقي مصر على العرس هادا... دخلت و دوك التحاليل دازو بالزربة و قالو ليه يرجع ليهم غدا، غير المزيانة انهم غيقراوهم ليه تما حسن ما حتا يديهم لطبيبة، باش منتعدبش انا...