فين داني زهري (تتمة)

الجزء 32

يالاه البنات قولو بسم الله الديسير جاي، البارت اللخر

بيوتي (دفلات عليه): تفو عليك الشماتة
رضوان (رجع وجهو بلور و باقي كيضحك و كيمسح وجهو من الدفال، حتا غفلها بطرشة): ديلمك داك **** ديال راجلك مرباكش
بيوتي (مكرهاتش تحك ديك الضربة ولكن مربوطة): راجلي بزاف عليك ا عيفت الرجال
رضوان (بدا كيلعب ليها بالموس حدا وجهها): عرفتي شحاال مهزيت الماس، اش بان ليك نستعرض عليك مهاراتي
كيبان ليها مشي بكامل قواه العقلية، خصوصا بديك اللحية لي حالتها، و دوك العينين الحمرين و وجهو لي كحال و توسخ، و ضعاف بحالا مبقاش ياكل النعمة...]
هز داك الموس و بدا كيدوزو ليا على عنقي، زيفي تشرك بعدا، و تبهدلت، و الله ما عاقلا كيفاش حتا وصلت هنا، خرجت حتا حسيت بضربة فراسي و طحت معاقلاش... حط ليا طرف الموس على عنفي، و شوية حتا هز ليا بيه راسي
رضوان: عارفا راسك زوينا... ولكن معندك زهر... متخافيش انا اليوم غنهنيك من هاد النحس نتي و راجلك، نبداو بيك نتي بعدا
كنقسم بلي شفت الموت قدام عيني ملي جبد داك الفردي، و شهدت و لي ليها ليها، آخر حاجة انني نادمة عليها، هي كون فعلا عطيت لآسر فرصة، كون من اللول حاولت نبدا حياتي معاه بشكل طبيعي، خنساء لي مكتحملوش و مدارتش لي انا درتو... كون غير يرجع الزمان بلور و نعتادر ليه... راني غير كندوي عارفا راسي منديرهاش، مي على الاقل نصحح افعالي... واااع و فيناهوا داكشي ديال الافلام الهندية، خاصني فبحال هاد اللقطة يدخل آسر يدافع عليا، واااع واش غنموت ديال بصح... يالاه بغا يتيري، و غمضت عيني مع ديك لي ورك على الفردي، ولكن عندي الزهر الفردي خاوي
رضوان: متفرحيش بزاف، راه عندي باش نعمرو
بغا يجبد داك الزبل من جيبو، ولكن قفزني صوت التفركيع، واه يا ناري واش مقدنيش هادا يجيوني الارهاب حتا هوما... صافي مشيت فيها... خرج رضوان غيشوف اش طاري، حتا حسيت بشي واحد كيحل لي ايدي من الحبل
آسر: و الله يا دلمك و باقا تخرجي من الدار يتا نفصلك، غير حتا نرجعو و نتفاهمو على هاد الخرجة ديال ليوم
واااع و غير خليوه يعير، انا نضت عنقتو و بركت نبكي
انا: وااااع و نتا لي درتي هادشي، كون حزرتيني منخرجش، على الاقل غير قوليا شي كلمة زوينة
آسر (عنقني): من اليوم عمرك مباقا تبعدي عليا ولا غنوريك وجهي القديم
انا: حااااضر
آسر (مبتاسم): وليتي مأدبة
رضوان: يمكن عرفات راه آخر نهار فحياتها...
خباها آسر من موراه
آسر: كنت عارف بلي غنتلاقاو، مي مشي هاكدا
[رضوان: كان خاصك توقع
حتا قفز بيوتي صوت الرصاص، و شوية حتا طاح رضوان قدامها و بان ليها ناصر لي تيرا فيه و خنساء مصدومة موراه... صافي الرصاصة زوقات لرضوان راسو، و مشا يتحاسب على لي دار و لي ما دار، لمهم، ناصر بانو ليه بيوتي و خنساء كيشوفو فيه بصدمة و هوا كيرجع الفردي
ناصر: شنو؟ حتا هوا كان خاصو يتوقع
خنساء (كضرب فيه و كتكيس): و محشمتيش تقتلو قدامي و انا حاملة بغيتي ولدك يخرج بحالك واااع واااع
ناصر: و الى خرج بحالي اش طاري
خنساء (شدات من كرشها و بدات كتنقز): اوعدي انا واااع و غنولد
ناصر: من نيتك، واش هادا وقت الضحك
خنساء (شدات ليه من الكول ديال القاميجة): شوف راني مكنضحكش، و والله و ما تعتقني دابا، يتنسا راني كنبغيك و نشتف عليك قدام صاحبك
ناصر (ضحك ليها فوجهها): كيتبغيني ياك
خنساء: واااااع و والله تا نقتلك ليوم سربيني
ناصر: هاد الدري حتا هوا ملي بغيناه يخرج مبغاش، و ملي مبغيناهش بغا
خنساء: شابه لباه شاد العكس
ناصر(كيضحك مع خنساء): كون شبة لمو كنت غنبغيه كتر
هزها ناصر و خرج ناسي هوا كاع بلي آسر كين هنا... دار آسر شاف فبيوتي بنص عين
بيوتي: اشنو تاني
آسر: تحركي قدامي حسابنا فالدار
بيوتي: تكون فيك شوية ديال الرومانسية، قولي راه الى مرجعتيش الدار كنحس بيها خاويا، اولا ملي تخطفتي حسيت بقلبي تخطف معاك
آسر: اولا غتزيدي قدامي ولا غنوريك قلبي لاواه معدتي
بيوتي: واااع و مفيكش حس الرومانسية(عنقاتو): مي مع دلك انا كنبغيك
آسر(حتا هوا عنقها): انا مكنقولش انا كندير
شد ليها من ايدها و تحدر ليها على ودنها
آسر: ملي نوصلو للدار غنوريك انا شحال كنبغيك
بيوتي: حمار
آسر: مالنا انا مقلت والو نتي لي عقلك مشا بعيد
بيوتي: تفو غتبقا تحطني فمواقف بحال هادي
آسر: و شكون عرف...
بيوتي: احياني انا فين داني زهري
آسر: انا لي خاصني نقول هاد الهضرة
**************[بعد 5 سنوات]
مدات بيوتي ايدها فوق السري للجيهة لاخرى، حتا بركت كتقيس ملقات حد، و هي تنوض مخلوعة... حتا بانت ليها خنساء لي هازة الدريا... مبقاتش كتنوض مشقلبة الدراري كيديرو العجائب...
بيوتي: بغيتلك ضربة، تخلعت يحساب لي غير ودرتها
خنساء: يا ختي كتحمقني، خارجا نيت اجمل من النجمة
هزاتها بيوتي من عندها
بيوتي: شابها لمها، اجي بعدا نتي اش كديري هنا، و فين جوزيف
خنساء: راه جيت انا و ناصر واش نسيتي راه اليوم الافتتاح، و جوزيف بقا مع باه مبغاش يجي معايا
بيوتي: خارج نسخة طبق الاصل من باه هاد الدري
خنساء: خليلي غير توفيتري ديالي
قفزهم صوت جوزيف الصغيور
جوزيف: و تعطلتو...
خنساء: و مالك كتنفخ راه باقا خالتك مبدلاتش، و باقا توفيتري ناعسا
جوزيف: انا مشي شغلي راه من اللول قلت ليك خليني فالدار نتي مبغيتيش
خنساء: هبط عند باك حسن منجي ندخل ليك
جوزيف: متقدريش راني عارف راسي عزيز
خنساء: واااع و غتهبط ولا غنجي ليك
دخل مشا لعند توفيتري لي ناعسا فايدي بيوتي و باسها عاد خرج، الحب مند الطفولة شتو شتو... ولكن للاسف عندو منافس صحيح...]
شدات ليا خنساء توفيتري حبيبتي بنتي كبيدتي لمهم، دخلت وجدت راسي، ليوم يوم مهم بزاااف، هادي 5 سنين باش واعدني آسر بلي غيحل ليا باتيسري حيت كنعرف نطيب و... لمهم ولكن من بعد جات الحماللة اللولة لي طاحت ليا حيت تزاد قبل وقتو، و مجيت فين نخرج من الصدمة حتا حملة بتوفيتري... ملي تزادت ضارب كلشي اش غيسميها، كانت ماما باغا تسميها نزهة، و بابا باغي يسمي ريتاج، و خنساء باغا تسمي امنية و هاجر و فدوى قالك دعاء، جدات آسر الله يرحمها قاتلك انا غنموت بغيت نسميها توفيتري يعني اجمل من النجمة، لمهم من بعد ما تولدات آسر وقف على المحل شخصيا ، و انا كنت مدهية مع توفيتري و تربيتها، مي دابا دارت عامين، و خنساء قاتلي بلي تشدها ليا الى بديت الخدمة... لمهم بدلت حوايجي و لبست تجين و قميجة طويلة، و لبست بنتي كسيوة... سبقاتني خنساء حيت عصبها جوزيف... ديك لي خرجت لقيت حبيبي قدامي
آسر: حسناء ياك كنقولك متلبسيش تجين
انا (تعلقت ليه فايدو ): و انا عندي راجل بحالك و نخاف، لاواه حشوما ملي نكون معاك حتا واحد ميقربلي اولا
تعلمت نغلب عليه و نرطبو، اودي تعلمت بزاف ديال الحوايج... مشينا للافتتاح ديال الباتيسري، و لقينا كلشي مجموع، نردين و سعد ولدو بنت غزالة كيموت عليها مصعب سميتها آية، و هالة ووعصام زادو لمصعب خوه اخر قد جوزيف سميتو منصف، و ايمان يالاه ولدات غير من مورايا بنت كيف القمرة سماتها وئام، و فدوى و خويا الزوين غير خليوهم باقين باغين يطوطحو مازال، اما هاجر راه سرسب دوك التوام حداها، خالي الزوين آدم و ريتاج تزاد عندهم ولد سماوه نزار، و آسية يا آسية، هي و الياس راهم مضاربين مع خولة لي مكتبركش، ياكما نسيت شي واحد؟ آه حكا ختي لطيفة تزوجات برشيد، و ولدات بنت سماتها سناء، و تبعتها ولد سماتو صهيب، اما سارة فباراكا عليها غير الهام... سلمنا عليهم و ناري شحال ولات العائلة كبيرة... دوينا و جمعنا، و جا وقت نقطع السينتا الحمرة و نفتاتح المحل، عطيت توفيتري لماما تشدها، و عطاني آسر لمقص، و جيت باش نقطع السينتا مبغاتش تقطع، حاولات معاها و مبغاتش، و ناري مال المقص حفا معايا، وااااع تعصبت و انا نجر مها حتا طاحت و دخلت معصبة... و آسر برك يضحك و دار ايدو على وجهو، و تبعوها العائلة كاملة... و مشات حكايتي من واد لواد و انا بقيت معا ولاد الجواد...

وواخيرا سالات فين داني زهري، البنات بصارحة بصارحة كيجاتكم القصة، و النهاية خصوصا، كنتما منكونش طلعت ليكم فالراس، و متكونش قصتي تقلات لكم على القلب و المعدة😊 يالاه نتلاقاو فالجديد ديالي (مفيوزية في قلب الحدث) باي باي