فين داني زهري (تتمة)

لجزء 23

بركات خنساء كتقلب فالمجور لعل و عسى تلقى لي كتقلب عليه، و ناصر حاضيها و كيسول فيها
ناصر: و غير دوي علاش كتقلبي
مجوباتوش، و بدا كيتعصب و هوا حاضيها كترعد و كتقلب، حتا مشا شدها بزز
ناصر: علاش كتقلبي
خنساء (كدوي غير بزز): الضرسة
عاد فهم ناصر بلي مقدرتش تدوي بسباب الضرسة، جرها بركها فالصالة
ناصر: انا غادي نقلب على شي مسكن، بقاي هنا
مشا هوا يقلب ليها و هي بفات ديرا ايدها على حنكها... مشا قلب حتا لقا واحد الدوا و جابو ليها و كاس د الما
ناصر: شوفي هادا
خداتو و مع ضاراها كلات تلاتة د الحبات باغا غير تفش عليها، مي عاد ما كملت على راسها ملي ولات كترد كاع داكشي لي كلاتو (حاشاكم) الدوا مقداش، و مشا مسكين طيب ليها القرنفل باش تشلل بيه فمها و بقا سهران معاها الليل كامل، غير لمبغاتش... بزز بزز حتا للفجر عاد نعسات فوق السداري، و نعس ناصر بارك فالفوتوي لي مقابل معاها و القرفة مشتتة فوق الطبلة، لمهم معندي ما نعود ليكم، الحالة حالة... فاقت الغد و حنكها كامل منفوخ، و سيفطات لهشام مساج بلي مغتمشيش للمكتب ليوم، و ناصر قالها يديها لطبيب... مشاو عند الطبيب لي كمل عليهم
الطبيب: منقدرش نحيدها ليها حيت عندها فيها القيح، خاصها حتا تفش عاد نحيدوها، دابا غنعطيها الدوا
خنساء (كدوي بشوية و بطرف فمها): العار لما حيدها، غير هنيني منها
الطبيب: سمحيلي ا لالة مي منقدرش نحيدها و الى غنوليو فشي مرض خيب الله يحفض
ناصر: دير لي عليك
عاطاها الدوا، و ولات على سبة، ميقرب ليها حد ميقيسها حد، غير لدارو بيها كتبدا تغوت، الصدا كيزنزن ليها فراسها كي الدبان، ولات باغا تبقا غير بوحدها فالبيت، و كملات ملي ولات الدوا لي كلاتو تردو بحالا مدارت والو، و تعود تاكلو و والو...
ناضت بيوتي كتجمع فالطبيلة بالزربة و كدوي مع آسر
بيوتي: يالاه سربي باش منتعطلوش، حيت باغا نبقا معاها راه شحال مشفتهاش
آسر: انا واجد كنتسنا فيك غير نتي
خوات الما على الماعن و تبعاتو من بعد ما قادات حالتها و لبسات زيفها... غير عرفات بلي خنساء ضاراها الضرسة و عرفات الوضع صعب... دوزو الطريق كلام فارغ، و ملي حل ليهم ناصر الباب بيوتي مسلمتش عليه خنزرات فيه و زادت، حيت بيناتنا ديراه هوا السباب حتا كلات العصا... دخلات عند خنساء لبيتها كيف الرعدة
بيوتي(و هي كتردخ حداها على السرير): خنوستي بقرتي حبيبتي، مالكي قالو ليا ضاراك الضرسة
خنساء (كتعصر الهضرة و مباغاش تحل فمها باش ميضربش ليها البرد فالضرسة): سيري انا بغيتلك الكرض فدوك الرجلين
بيوتي: و صافي حتا نتي راه غتفوتك
خنساء: نتي حيت محاساش بيا
و بداو عينين خنساء كيغرغرو
خنساء: حتا واحد فيكم محاس بيا، انا كنموت هنا و هوا عارض على صاحبو، و نتي جايا كتردخي عليا
بيوتي (تخلعات): اويلي خنساء مالكي، راه و الله ما درتها بلعاني بغيت غير نضحك معاك
خنساء (كتبكي): مضحكيش معايا، خليوني عليكم، بغيت نبقا بوحدي
بيوتي غير مبغاتش تقل عليها حيت عرفاتها خاطرها ضاراها، و خرجات مشات للكوزينة توجد ليها غير ما تاكل... دوزات معاها العشية كاملة باغاها غير تاكل، والو مبغاتش، حتا ولات بيوتي راجعا لدارها و مخليا خنساء ترجع تنعس عوتاني، و اشمن نعاس هادا و هي ناضت قربلتها مع ناصر...
ناصر: كيفاش كضايقني واش انا حتا بيتي تجري عليا منو
خنساء: خرج عليا، خليني عليك، مبغيتش نشوف كمارتك،عطيني غير التيساع
ناصر: مشي ديري السبة بالمرض و تبداي تجري عليا، هادشي فات قياسو، نتعايو نتسابو نتخاصمو تنخليني، ولكن باش تولي تجري عليا هي لي متكونش ليك
خنساء: انا مجارياش عليك، خليت ليك دارك غمل نتا وياها
و خلاتو و خرجات، كانت 9 د الليل، و هوا مقدرش ميتبعهاش غير يحضيها، حيت مغيحزرهاش بطبعت الحال... معرفات فين تمشي، بقات غير غادة فالشارع و كتبكي و ايدها على ضرستها، حتا وصلاتها رجلها لدار بيوتي، هي لي طاحت عليها، اما حتا ماماها باقا قاطعا هضرتها... غير حلات بيوتي الباب و هي تخلع
بيوتي: خنساء ياك لاباس اش طاري
خنساء: الى معندكش موشكيل نبات معاك حتا لغدا و نخرج نقلب على الكرا
بيوتي: اويلي على لكرا، و كتسوليني انا وياك واحدة، دخلي و عودي ليا مالكي، و ناصر فين
خنساء: فالاخرة نشاءلله
دخلات، و شافها آسر و هوا يشوف فبيوتي زعما مالها صاحبتك، و حتا هي دارت فيه ديك الشوفة ظيال منعرف، لمهم تقول مقرصين بعضياتهم كيدويو غير بالعينين... خنساء مدواتش مع آسر، صافي كرهات بنادم كامل، و مشات مع بيوتي لواحد البيت، و بركات قدامها
بيوتي: دابا شرحي ليا اش وقع
خنساء: كلشي وقع، انا باغا نطلق
بيوتي: اويلي على طلقي، اش كتخربقي ا صاحبتي
خنساء: و الله لا بقيت معاه، اصلا انا زوجوني ليه غير بزز، و ولا يتهز و يتحط عليا و باغي يضربني
بيوتي: باغي يضربك اش نقول انا لي كليت الطيب، و نوضي راكي طالعاك السخانة
خنساء: لا هي لا، انا غندفع وراقي باش ناخد الطلاق، مبغيت لا فلوس لا زبل، نمشي نكري و نعيش بعيدا على الزبل كامل
بيوتي: نعسي حتا للصباح و نهضرو راكي مريضة ]