فين داني زهري (تتمة)

الجزء 30

مجوبهاش، و زاد و خلاها باركا كتفكر فاش غدير... الوقت مكيتسنا حتا واحد، و هاكدا اليام كتجري بداك الهدوء الغير طبيعي ديال آسر و بيوتي، و بداك الاهتمام ديال ناصر لي كيخرج معيار مع خنساء، بعدا نسااو قديت الطلاق... لمهم باركا خنساء كرشها لفمها حيت وصلات لشهرها التامن كتفرج، حتا دخل ناصر عيان مع الخدمة، و تم غادي لبيتو
خنساء: اجي فين غادي برك
جا برك حداها، و مد ايدو هز من طبسيل الشكلاط لي باركا تسرط فيه، ولكن مدواتش معاه
خنساء: شفتك تعطلتي ياك لاباس
ناصر: لخدمة مزيرة هاد الايام و سعد ممساليش كيوجد لعرسو هو و نردين، و كريم كيدير لي عليه، اما آسر معرفت مالو، ولا غير ساهي، معودتش ليك صاحبتك شي حاجة
خنساء: لا، انا اصلا مبقيتش كنشوفها بزاف، بيناتنا غير التيلي
ناصر(حط ايدو على كرشها): و هدا مباغيش يخرج
خنساء(كضحك): دوي معاه نتا نيت
يمكن جاتها غريبة، ولكن تحدر ناصر حتا وصل لكرشها و دارها بصح
ناصر: باقي مبغيتي تخرج و تهنينا، راك صدعتيني، كل مرة ماماك ديرا ليا مشكل
خنساء: ياك، واخا شكرا
ناصر (كمل هدرتو مع ولدو): ماماك ولات على سبة ياك
خنساء: راك نتا لي على سبة
ناصر (شاف فيها): خنساء، باقا كتفكري فالطلاق
ملقاش جواب، حيت معندهاش، اش غتقول ليه، بلي سمحات ليه...
باركين بيوتي و آسر فالطبلة كيتعشاو بهدوء، و بيوتي غير كتحرك الماكلة بالمعلقة معنهاش شهية، حتا طلع ليها الدم و تنهدات
بيوتي: آسر واش غنبقاو هاكدا، راه داز 5 شهور
آسر: و اش بغيتيني ندير
بيوتي: صافي سني على الوراق و خليني نسني حتا انا
آسر: هاني محابسكش، الى بغيتي سيري سني و العيب عليا الى مسنيتش موراك
بيوتي: ولا و مديرش هاكدا
وحلاتها ليه، و هوا يلوح المعلقة و ناض مشا لبيتو ينعس حسن ليه... ولكن مبغاش يجيه النعاس، هضرتها غتحمقو، ولا نادم على النهار لي شافها فيه، و الشيطان كيدير دورو، و بدا كيسترجع هضرتهم قبل 5 شهور (  ...صافي سالينا، او غتبقا كتنخلني، صافي وجد لوراق و نطلقو و الله يعون
آسر (كيغوت): مشي نتي لي غتجي تملي عليا اش غندير
بيوتي: ولا حتا نتا غتبقا معلقني بحال الحنش مقطوع الراس، ايما نطلقو اولا نتزوجو، ولا باغي تبقا تلعب بيا)
و بلا ميحس طاحت عليه اسوء فكرة ممكن يشوفها، و بين ليا ان الادوار غتقلب و بلاصة مدير بيوتي المشكل و آسر يوحل فيه، ولا آسر لي غيديرو...
دخلات خنساء للكوزينة فنصاص الليل، باقا الفجر مادنش، و باركا كتقلب، ناصر ملي حل عينيه و ملقاهاش حداه عرفها فالكوزينة... ناض هبط تابعها، و لقاها باركا كتقلب على شي حاجة
ناصر: اش طاري تاني، علاش كتقلبي
خنساء: مبقاش الجبن
ناصر: فين عمرنا دخلنا الجبن للدار بعدا
خنساء: لا راه داك النهار جبت ميكة، ولكن ملقيتهاش دابا
ناصر: صافي دابا يالاه تنعسي حتا لغدا و نجيبو ليك
خنساء: لا انا غنقلب عليه و الى ملقيتوش غنخرج نشريه
ناصر: فين غتخرجي فهاد الليل
خنساء: معرفتش لمهم نلقاه و صافي
دخل كيقلب معاها مربانا تلقاه، ولكن والو مكينش تسرط
خنساء (بركات تبكي): نتا لي غتكون كليتيه ليا ياك
ناصر: غنلصقك مع داك الحيط الى مسكتينيش، انا مفخباريش حتا راه كان عندنا
خنساء: طغا عليا بالهضرة، ياك شفتيني ولية و معندي حد
ناصر: من ايمتا و نتي ولية
خنساء (مبقاتش باغا تسكت): نتا لي دير هادشي كامل
ناصر (حط ايدو على وجهو): فين طحت انا... زيدي قدامي يالاه نمشيو نقلبو على هاد الزبل
خنساء: بصح بصح
ناصر: تحركي قبل ما دور ليا فالخوا
ناضت كتجري لبسات كسوتها و خرجات تابعاه و مقاداها فرحة... داها لواحد الريسطو كبير هوا لي حال فهاد الوقت، و مشات خنساء بركات شادة بلاصتها
السرباي: اش حب الخاطر ا سيدي
ناصر: جيب لينا كاع الجبن لي عندكم
سرباي مفهم والو، و هي دوي خنساء معصبة
خنساء: واش مسمعتيهش، قالك كاع الجبن لي عندكم
مشا السرباي مسكين غيشوف اش هادشي لي طالبينو، و خنساء غير كتفرنس و دور فراسها
ناصر: تبتي و نتي وليتي كيف الدراري الصغار
خنساء: كون كنت عارفا ملي غنحمل غدي ناكل لي عجبني كون درتها شحال هادا
ميك عليها ناصر، حيت ولات غير كتخربق فهاد الليل، و جا داك السرباي جيب ليهم بلا ديال الجبن، و خنساء متسنات حد دخلات فيه طول و عرض كتاكل كيف الدراري الصغار، و كطيح على حوايجها المشكل كتاكل فالجبن بالمعلقة... و دازت كيف العادة بشما عطا الله...
ولات بيوتي كيبان ليها آسر فشي شكل، بعد الخطرات كيكونو كيدويو حتا كيغيب، اولا كيبقا يشوف فيها حتا كتقوليه مالك، لمهم ولا السيد فشي شكل... راجعا من عند خنساء، دخلات حتا لقاتو فالكوزينة، و موجد لعشا و الطبلة
بيوتي: اش هادشي ا آسر، ياكما مريض
آسر: لا، دوزي تاكلي راني يالاه كنتعلم
بيوتي (مشات بركات): انا غندوق و نحكم
هزات الفورشيط و بدات بسباغيتي
بيوتي (كدوي و فمها عامر): شكون لي وراك هادشي
آسر (برك قدامها): حتا واحد، جربت راسي
بيوتي: مزيان راكا غادي
بركات كضحك عليه، و هوا غير هادئ بحالا شي حاجة تحت راسو... كلات بيوتي مزيان، و آسر غير لقم من الطبسيل..

اش بان ليكم نوقفو هنا حتا لمنبعد😊