فين داني زهري (تتمة)

الجزء 8

وقفت فواحد الزنقة خاوية و حدايا آدم لي مضارب مع ديك اللحية باش يحيدها، و انا بركت كنحيد فداك الخمار و لي لونتي لي ديرونجاوني فعيني، و كنتأفف
انا: عالله غير تصدق لينا و يبعد داك ناصر على خنساء
آدم: و دابا صاحبتك و خطيبها و انا مالي
انا: ياك نتا خالي الصغير اوا من واجبك تعون بنت ختك
آدم: الله يمسخك من ايمتا كتشوفيني خالك
انا: ديما، علاه باغي تنكر
آدم: صافي صافي غير سربينا خلينا نرجعو، باين ليا هاد المصيبة غتنوض عليها قربالة
انا: خاصها تنوض باش يتعلم يقرب لينا
آدم (كيضحك): المسخوطة عندك الدموع على سبة
انا: ويلي و ملي كنت غنقول سميتي بيوتي، ناري جاب الله قلت بديعة
آدم: دابا لمصيبة هي الى بغاو وراق كتبت بلي هو تزوج عرفي
انا: هادي ساهلة ياك الياس كيعرف يزور التواقيع، غنزورو شي وريقات
آدم: زعما مسخوط هادا لي غيطيح معاك
لحت داك الخمار فالطارو و لحت حتا لي لونتي، و قاديت زيفي و مسحت وجعي و عيني ليكون باقي فيه شي اتار ديال الدموع، و آدم صوب حوايجو و مسح لحيتو من ديك العزافة لي كان دير، عاد رجعنا كأن شيئا لم يقع، وزغير وصلت لعند خنساء لقيت داك المرض كيتسنا فيا
آسر: فين تعطلتي
انا: مسوقكش
آدم تسوخر لور و خلانا فالحرب، و خنساء بركت غير كتشوف فآدم باش يدوي و يعود ليها اش طرا...
انا: لاش جايني حتا لهنا
لاح ليا واحد البواطة فوق مكتب خنساء
آسر: لبسي هادي فلعشية و الى جيت و ملقيتكش لابساها حسابنا طويل
ميكت عليه و رجعت كندوي مع خنساء  هوا زعما باغي يتحداني ناض و خلاني، و انا بركت و آدم كنعودو لخنساء ما طرا و اشنو درنا و واخا شداها الخلعة مقدرتش مضحكش... لمهم دوزتها معاها، و آدم خرج من بعد ما عيطت لو ريتاج لي باقا لحد الآن مشفتهاش مباشرة حدو وراني تصاورها، لمهم خليت خنساء باش تكمل خدمتها وخرجت غنرجع للدار، و ديك لي غنتحرك حتا كيبان لي مصعب بارك فالطروطوار بوحدو، و وانا نمشي ليه
انا: مصعب اش كدير هنا
مصعب: قالي بابا سير عند خالتك بيوتي ولكن انا معرفتش الطريق
اويلي علا قاليه سير عندها، مقدرش يوصلو
انا: اجي يالاه نمشيو زيدي
هزيتو و ديتو معايا للدار، و مخلات ماما مدارت عليه حيت توحشات الدراري الصغار، لمهم طيبت ليه كيكة على الأقل كنعرف نطيب، و جات من داكشي و بركت انا وياه كناكلو و نتفرجو حتا غربات الشمش شفت الساعة لقيتها الخمسة و نضت بزز باش نوجد راسي ملي يجي لي آسر... خليت مصعب لي نعس و غطيتو و طلعت دوشت و ملي خرجت بركت كنقلب على ما نلبس، حتى تفكرت لبواطة لي جاب، مشيت حليتها و لقيت فيها واحد الكسوة صداع، صاراحا غنلبسها مي حيت عجباتني مشي حيت هوا لي جابها، عاد زيد انها صافي ولات ديالي دابا... جاتني زوينة، درت زيفها و حدي درت كحل و بارفان صافي و هزيت صاكي و خرجت من البيت و بركت حدا مصعب كنتسنا فآسر، و حلف هوا ليجي، و دابا غيخليني معلقة، الى مكانش جاي نمشي ننعس حسن ليا... عيت ما نتسنا، حتا ضربات التمنية و انا نبدا نخاف، اويلي ياكما طرات لو شي حاجة، غيقولو غير قتالة الرجال، وا خويا صبر غير حتا نتزوجو و موت... نظت كنعيط ليه و والو مكيجوبش، و نعيط و نعيط، حتا تقادا لي الصولد، و انا نعود نشارجي و عيطت و بقيت كنتسنا و كندعي حتا جوبني
انا (كنغوت): بغيت لك ضربة من الصباح و انا نتسنا الى مجايش خليني نمشي نعس، انا مساليا ليك غير نتا اش كدير من الصباح
آسر (غوت حتا قفزت): حسناء، حسن لك تجمعي فمك، راك معارفاش اش واقع، من الصباح و الدار مقلوبة و كلشي خارج ليه العقل كنقلبو على مصعب خرج من الصباح
انا (زبلتها و دويت): مصعب كين معايا
آسر: اشنو؟ كيفاش معاك واش كتسطاي عليا
انا: ولكن...
قطع عليا و انا عرفت بلي هاد موصعب دير شي زبلة و موحلني معاه... بركت و رجليا كياكلوني و انا نوض كنتمشا فالدار، و جات طلات عليا ماما لي عاد رجعات من العراضة هي و لطيف ، اما بابا فمسافر و راجع غدا
ماما: تي باقا ممشيتيش
انا: لا باقي مجاش
لطيفة: جاتك الكسوة صداع امتا شريتيها
انا (باغا نقليلها السم): شراها لي زماني
لطيفة (باغرور): اوا الله يطليكم ببعضياتكم، قالت لك زماني الى كملتي فدارو السيمانة انا غنقطع الكصة
انا: نتي اصلا باغا تقطعيها غير كديري فالسبة و دابا سيري عليا خليني نتسناه
ماما: هانتي الى رجع خوك و نتي باقا هنا حطي ليه العشا، انا غادا نعس
انا: و مال لطيفة
لطيفة: انا ممسالياش عندي اكزام غدا
مشاو و خلاوني بقيت كنتسنا حتى سمعت الصونيط، و مشيت كنجري حليت ليه، و كانو عينيه حمرين و العروق فعنقو غيطرطقو، و زرب عليا بالمعيار
آسر: ينعل طواصلك اش داك لمصعب، مو سخفات و الدار مقلوبة و نتي شاده هنا
انا (مخلوعة): غير كنت...
آسر(عير تحت انفاسو): ***** تفو
انا: هوا لي
آسر: ممحتاجش اعدارك
دخل للدار بلا شوار و انا غير تابعاه، و لقيت مصعب كيحك فعينيه فيق
آسر (مع مصعب): حسابنا فالدار
مصعب: بعد مني نتوما لي بغيتو ديوني لدار خالي و انا بغيت نمشي عند خالتي بيوتي
هزو آسر و تحرك و انا كنهدن فيه زعما...