فين داني زهري (تتمة)

الجزء 29

انا: اوا اش درتي مع المافيا
آسر: صافي خرجنا منها بشكل رسمي، و الخبر راه وصل للاعلام دابا
انا: و المافيا اش دارو
آسر: حكمات عليهم المحكمة مؤبد، غير باقي مشدوهمش كاملين
انا: هي صافي خاصنا نوجدو وراق الطلاق
راه قلت ليكم مكنفكرش قبل ما نقول شي حاجة
آسر (كيغوت): اش هادشي مطيباه، مكتعرفي ديري والو
و ضرب الطبلة و زاد، اويلي هادا مالو، دقت من اللزان جاتني مزيانة... و الله يستر... مشيت لحقت عليه للبيت و دخلت بركت قدامو على السرير
انا: مالك معصب، شكون دوا معاك عاد كنتي مزيان
آسر: خليني عليك جيت نعس
انا: ولا ودوي المرض، اش طاري
آسر (كيغوت): قتلك والو، خرجي خليني نعس
انا: و بلا تنفاخ، راه حتا انا كنعرف نغوت، زوينا هادي...
خليتو و خرجت حتا انا طلع ليا الدم هاد الزمر... مشيت جمعت الكوزينة و رجعت نعست بلا منقوليه حتا شي كلمة...
وليت كنلاحظ بلي كيتجاهلني هاد الايام، مكيبغيش يدوي معايا، مكيبغيش يبرد معايا، مال هادا... وليت ملي كنقنط، كنمشي عند خنساء...
[دخلات خنساء فشهرها الثالث تبارك الله... واقفا كيف ديما فالكوزينا باش تطيب ما تاكل، هاد المسخوطة غادا و كتغلاض، عاطياها غير للماكلة و النعاس... دخل ناصر لقاها واقفا
ناصر: ياك كنقولك متبقايش توقفي، بركي للارض اش بغيتي
خنساء: فيا الجوع
ناصر: انا غنشوف نطيب ليك شي حاجة
خنساء: بغيت جناوح الدجاج بالبيض
ناصر: اش هادشي
خنساء: معرفتش لمهم طيبها
صاراحا هوا لي مفششها، متنوضيش متحركيش، اش خاصك بغيتي شي حاجة، و حتا هي عاجبها الحال مبقاتش كدير المشاكيل، شتي ها هوما توالمو شوية... حط ليها الطبسيل قدامها، و برك، و هيا دخلات فيه طولا و عرضا
خنساء (كدوي و فمها عامر): شتك بركتي مخدامش
ناصر: حتاوكان وونمشي، ملي تنعسي انا غنخرج
مع ولا حافض ليها البروكرام، خاصو ملي تكون فيقا يكون فالدار، واخا مشي ديما، مي فينما تاحت ليه الفرصة...  خلاها مشات نعسات، و خرج للخدمة، ملي رجع لقاها مدورة بيها واحد المشة و باركا فالارض
ناصر: شكون مدخل هاد الزبل للدار
خنساء: انا، علاش
ناصر: خرجي عليا الزبل
خنساء: لا انا بغيت هاد المشة
ناصر: قتليك خرجيها
خنساء: و انا مغنخرجهاش يالاه
تمالك اعصابو، و برك كيصبر فراسو بلي راها حاملة... دابا المشكل مشي غير هنا، خاصكم تشوفو ملي كيشدها الوجع، و خنساء عزيز عليها تزيد فيه...
ناصر: نديك للطبيب
خنساء: لاااااا
ناصر: يالاه غير فين الدوا
خنساء: تقاااادااااا
ناصر: نجيب ليك كاس د الما
خنساء: ولاااااا
هوا مخلوع و هي كتزيد تكمل عليه، شكون قال بلي شي حاجة ساهلة...
باركا بيوتي كتسنا غير يدخل و دوي معاه، مغتبقاش كتسنا فيه و ه ا كيعطل فيها هاكدا... غير دخل للدار و بغا يمشي للبيت و هي تشدو
بيوتي: اجي نتا خاصنا نهدرو
آسر: حتا لغدا
بيوتي: مكينش غدا، صافي سالينا، او غتبقا كتنخلني، صافي وجد لوراق و نطلقو و الله يعون
آسر (كيغوت): مشي نتي لي غتجي تملي عليا اش غندير
بيوتي: ولا حتا نتا غتبقا معلقني بحال الحنش مقطوع الراس، ايما نطلقو اولا نتزوجو، ولا باغي تبقا تلعب بيا
ميك عليها و طلع للبيت، و هي تابعاه، و يالاه بغات دخل من موراه البيت هوا يسد ليها فوجهها... تنهدات و مسحات وجهها عاد نزلات بركات كتفرج حسن ليها... هي عارفا اش غدير، هي غتوجد الوراق، مغتبقاش تسنا فيه، المحامي كتعرفو، و الوراق كلهم عندها، اش خصها عاود... لغد ليه فاق ملقاهاش، و مبغاش يلقاها باش متعودش تجي تبرك عليه طلاق ولا مطلاق، حيت اصلا مباغيش يطلق...
ناصر بارك يدق فباب الحمام
ناصر: و سربي خرجي
خنساء (باركا كتكونيكطا لداخل): بلاتي ربوع ساعة ووانا معاك
ناصر: واش مغنمشيش انا، عطيني غير زبلي لي نسيتو لداخل
خنساء: بلاتي نخرج، و خودو ديك الساعة
مخرجات حتا بغا يسخف، و خارجا و وجهها فالتيلي
خنساء: ملي دخل كرط الارض راه وخوا ليا الما و مشفتوش
خلاتو و زادت تكات، و هوا دخل هز حوايجو و خرج غادي لخدمتو كيحاول يتكالما... و الله الى ناصر صبار، و كون شي وحدا من غير خنساء ظابا راه كياكل فيها الدود تحت الارض... اما بيوتي مبقاتش مسوقة اش كيدير، المهم انها وجدات لوراق، و باقي غير يوصلو ليها للدار، يسنيوهم و يدفعوهم للمحكمة و سالاو...
باركا فالدار كتسنا على احر من الجمر ايمتا غيوصلو الوراق، حتا دق الباب، ناضت كتجري حلات الباب للفاكتور، خدات الوراق و دخلات للدار، نازل مع الدروج كيشوف اش دكشي لي فايدها
آسر: اش دكشي
بيوتي: صافي ها وراق الطلاق وجدو، قلت بلي كنتي مشغول دكشي علاش وجدتهم راسي، اجي باش تسني باش حتا انا نسني عليهم
آسر(وقف قدامها ببرود): سني نتي و عاد عطيهم ليا
بيوتي (متوترة): لا نتا اللول عاد انا ديما كتكون نتا اللول
آسر: اه و بغيت ليوم نكسر هاد العادة، غير بداي نتي
بيوتي: لا انا مبادياش، بدا نتا
آسر: انا مباديش بداي نتي
بيوتي: حتا انا مبادياش
آسر (تعصب و جر الوراق): ينعل بو هاد الزبل هادا
شدهم داهم للبيت و سد عليهم فالبلاكار، و بيوتي تابعاه
بيوتي: و دابا اشنو...