فين داني زهري (تتمة)

الجزء 25

نزلات خنساء للكوزينة بشوية مباغا تفيق حد... دخلات و حلات التلاجا و بركات قدامها كتشوف اش كين، و بقات شحال و هي كتفرج فيها، عاد جبدات المايونيز و ماطيشة و عمرات الخبز، جاها الوحم عليه اش غندير ليها... بركات تاكل فيه، و شحال عجبها داك المايونيز، المهم دوزات الليل كامل فالكوزينة لي لقاتها تجبدها... هابطة بيوتي مبوقة بالنعاس باغا تشرب، كانت يالاه الستة د الصباح، و غير دخلات للكوزينة و هوا يبرد ليها الما فالركابي
بيوتي: بسم الله الرحمان الرحيم، متآدينا منآديوكم
خنساء: راه باقي النعاس عاميك راني خنساء
بيوتي: يعطيك ما تاكلي يحساب لي غير الدار مسكونة، اش كديري
خنساء: و الله يا ختي ما عرفت، كليت و مبغيتش نطلع للبيت بقيت غير كنبقشش
بيوتي: وينييي، مخداماش ليوم
خنساء: راني واخدا كونجي 2 سيمانات على قبل الضرسة، باقي يالاه داز سيمانة و باغين تسيفطوني، باقا حتا ضرستي ما برات
بيوتي: خليك حدايا انا نيت ملاقيا ما ندير
مبقاتش بيوتي راجعا تنعس، و بركات حدا خنساء و بركو يجمعو، لمهم آسر مشا فخبر كان، مسكين مبقاش هوا محور المنزل ولات خنساء، بعدا مقالتش ليه بلي خنساء حاملة، حيت خنساء مباغاش ناصر يعرف... ولا آسر مسكين منسي، حيت بيوتي كتهتم غير بخنساء، ولف ينزل للفطور يلقاها موجداه، دابا كينزل كيلقاها هي و خنساء كيجمعو، ولف هي ملي يجي تلقا ليه، دابا كيتلقا لو البرد، لمهم من نهار دخلات ليه خنساء للدار، ولا بحالا محاتو الكومة... اما خنساء فدفعات وراقها باش طلق كتسنا غير يردو عليها فاسرع وقت حيت مباغاهش يعرف، و الخدمة دارت بناقص، ولا كلشي طاع ليها فالراس، و ولات على سبة، لي قاصها تبكي، عاد زيد الضرسة لي كتكمل عليها، المهم انها عرفات بلي داك الدوا كان مكيتقبلوش جسمها حيت حاملة، و مشات بدلاتو، بعدا غير يتكالما عليها الوجع... نهار الحد معول آسر غدي يلقا نفس الاهتمام من بيوتي كيف الحد لي قبل، حيت غيمشي للمحكمة، نيض لقيها باقا ناعسة، غير ناض و هي تحرك دارت شافت فيها و هي كتكسل
بيوتي: فقتي، اه نسيت اليوم كينا المحكمة
آسر: غنمشي نشوف غير القرار
بيوتي: اوا طريق السلامة
خلاتو و رجعات نعسات، هي مدارتهاش بلعاني ولكن راها عياااانة، ليل كامل و هي سهرانة كدوي مع خنساء على هاد قضية الطلاق، كتحاول تقنعها باش دير عقلها مي والو، راسها حجرة... شافها مغتنوضش، و تعصب، ولكن مبغاش يجبد الصداع، هبط شرب من العصير لي خلاتو لبارح، و مشا للمحكمة فين غيتلاقا بناصر لي باقي متقبلش ان خنساء باغا تطلق، و كون محبسوش آسر كون دخل فيها بشي راس غير الله يستر و صافي...
باقا خنساء ناعسة، ولات شاركا نهار و ليل، بالحق باقا ممشاتش عند الطبيب باش تعرف فاشمن شهر اولا اي حاجة، لمهم تشوف هاد حريرة الطلاق دابا... غارقا كتحلم براسها كتسرط و تندغ، حتا بدا التلي كيدخل ليها مع الحلم و حرم عليها ماكلتها... ناضت جوبات، و كان الاتصال من المحكمة
خنساء: الو سلام عليكم
السيد: ختي عيطنا ليك باش نعلموك بلي الجلسة ديال المحكمة ديال الطلاق بعد ربع ايام
خنساء: متاكد ا سيدي
السيد: ياك مدام خنساء ناصر العماري لي معايا
خنساء: خنساء شهير الله يخليك
السيد: اه ا مدام الجلسة ديال نهار الاثنين الجاي
خنساء: نشاء الله
يحساب ليها الامور كدوز كيفما بغات هي، ولكن الامور كدوز كيفما بغا ناصر، هاد الاخير دور مع القاضي باش يعكس ليهم فالطلاق، مبغاش يمشي ليها هي، ولا بغا يحاشيها ليها، ولا بغا يضارب معاها، ولكن حالف هوا تيخليها معاه بغات ولا لا، و الفلوس كدير اي حاجة... نهار طويل، و خنساء و بيوتي كيدوزوه غير هضرة، و الى الى عياو كيخرجو للجردة يشمو شوية الهوا... لاول مرة كتنسا بيوتي انها تسول آسر اش دار ملي رجع، دخل للدار و ملقاهاش ملقيا ليه، مشا للكوزينة ملقاهاش، و هوا يطلع للبيت، فين كان باركا حدا خنساء كتحزر فيها، حيت عودت ناضت عليها الضرسة و رجعات على سبة و طلقتها بكية وحدا... نمشيو لبلاصة اخرى، بعيدة تماما، فين بارك رضوان لي مخبي قبل ليلقاوه البوليس، دابا ولا مطلوب بشكل رسمي من قبل العدالة، اما عمر فمشا فيها مؤبد مسكين... قدر انه يهرب، ولكن باقي حاقد على بيوتي، من نهار دخلات عليهم، هي لي دمرات ليهم كلشي، وحدا معندها حتا علاقة بهادشي جات بغفل عينك طارت معزة، و دمرت ليه الخدمة لي سنين و هوا كيديرها، لي فنا عليها حياتو، كلشي من بيوتي و آسر، هوما لي ديرين ليه هادشي، آسر دمر ليه خوه الكبير، و جات مراتو دمرت ليه خوه الصغير، و دمرو ليه حياتو و خدمتو... اكيد مغيسكتش على هادشي، و محدو باقي متشدش غدي يدوز عليهم بالموس و المقدة... خلينا نرجعو لآسر لي طلع ليه الدم من هاد عدم الاهتمام لي ولا فبيوتي، و خلاها مع صاحبتها و خرج يتلاقا مع صاحبو ناوي غيصبنو باش يجي يدي مراتو عليه... تلاقاو آسر و ناصر و بركو فكافي على قهوة مرة و المعيار
آسر: جي دي عليا مراتك وليت كيف الضيف فداري
ناصر: مراتي انا لي جيت حطيتها ليك ياك مشات بوحدها و مراتك لي شداتها