فين داني زهري (تتمة)

الجزء 20

انا: الو سارة حبيبتي غبرتي، كيديرا اش خبارك
سارة: لاباس الحمدلله و نتينا الزاين ديالي
انا: مكينش محسن
سارة: سمعت بلي تزوجتي و كنت باغا نجي لعندك، مي و الله الهام مكتخليليش الوقت
انا: اه الله يحسن عوانك، راه الدراري هاد الايام صعاب، اوا كيدير جاد
سارة: لاباس عليه، عاد لقيتيه كان مخرجنا للمول
انا: اه، اوا اش كتعودي
سارة: والو هاد الساعة عيطت ليك باش نقولك راني غنجي عندك الى كنتي فالدار
وجهي حمار و خضار و صفار و انا كنشوف فالبيت لي مقلوب سفاه على علاه و الدار لي مشقلبة، و نيضا كنجري و كنضحك معاها
انا: هاد الصباح مغنكونش غنخرج انا و راجلي نتغداو برا
سارة: اوا نجي عندك فالعشية
انا: ا ا ا اه صافي مرحبا بيك و جيبي معاك ديك الكتكوتة
سارة: ضروري، يالاه نخليك دابا توجدي راسك باش تخرجي
انا: اه اوك باي زين
غير قطعات و انا نبدا نصرفق فراسي
انا: اويلي كون جريت عليها حسن ليا، اويلي اش غندير دابا
نضت كنجري حيدت تكشيطتي لي باقا لابسعاها، و طالون و الزيف، و بركت نخمل فالبيت من اول و جديد، و حليت كاع شراجم الدار و غسلتهم، سيقت الدروج و الدوزيام، و لحت المانط يتشمشو، و طلقت معطر الجو فالدار، و هبطت للبروميان، دخلت للكوزينة مقلوبة كتر من الدار، وليت كنغسل و حالتي حالا، لمهم ملي كملت جميع الكوزينة، رديت الحلوى و درت كيكة فالفران، و درت الكرص، لمهم مخليت مدرت منعودش ليكم، و خرجت كملت تسياق الدار، و آسر لي ناض كتبان ليه الدنيا شاعلا، و انا كنطير من هنا لهنا، و متحركش كيبان ليا مسكين رجع لبيتو و سد عليه، اصلا ليوم لحد مخدامش... مكملت حتا لقيتها الثلاثة د العشية، و انا نمشي نجري زوقت الكيكة و دخلتها للكونجلطور و دهنت الكرص و وجدت الطبلة، و طلعت كنجري عند آسر، ميمكنش بعد هادشي كامل يخصر ليا الخطة، دخلت عليه بعجاجتي
انا: آسر حبيبي
ديك حبيبي خرجات بوحدها و الله، و هوا شاف فيا بالستغراب من لبيسي ديالو، انا مشيت بركت حداه، و وليت ضريفة، ملاك نازل من السما
انا: راجلي العزيز
هز ايدو قاس ليا جبهتي
آسر: حسناء، مرضتي ليوم ياك، ولا باغا تلعبي دور الزوجة الصالحة
انا (وليت عنيبة): لا متقولش هاكدا، انا كنبغيك من شحال هذا... نتا نتا بحال خويا
آسر(بان لي طلع ليه الدم): اش بغيتي دابا
انا: شوف بنت خالي جايا عندي، و شبعانة عياقة، و كتبقا عليا راجلي كيدير و راجلي كيدير، عافاك غير ليوم دير راسك الزوج الصالح لي كيبغي مراتو عافاااااك
آسر (بان ليا بقا غير كيشوف فيا): مرضتي لا
انا (كنتبوحط): عافااااك، غير ليوم، عمري باقا نطلب شي حاجة، عافاك عافاك عافاك عافاك
فرعت ليه راسو، حتا ناض خرج و خلاني بوحدي، و نضت كنجري تابعاه
انا: آسر، عافاك، غير شوف و كان
آسر: سيري تبركي
لا لا لا مخاصش يطرا هاكدا، واخا نضطر نحبسو فالبيت و منخليهش يدير ليا هاكدا، غير خرج، و انا نمشي لبيتي و جبدت كسوة ديالي لبستها و درت زيفي، و بركت كنتسنا حتا دق الباب...
مشيت كندير النفاق، يختي شلا مورتنا من مواتنا هي و انا غير النفاق
انا: اهلا حبيبا ديالي توحشتك
سارة: مسقسيتي فيا ما قلتي نشوف هاد العايلا اش عاملا هي
انا: و ختي كنسول خالي، و هاد اليامات التيلي كان خاسر ليا
سارة: اوا ماشي مشكل
انا (كنطل من الباب): فين جاد و الزينونة ديالي
سارة: اه مقلتلكش، راه تلاقينا مع راجلك و وقف يدوي مع جاد و خليت معاهم الهام
انا (ويلي كحلتها دابا يدير ليا شي فضيحة): دخلي دخلي مرحبا
اوا دخلت انا وياها، و بركات تدور راسها فالدار، و عارفاها عجباتها ولكن مخاصهاش تبين ليا... اوا جمعنا حتا دخل آسر و معاه جاد، و انا غير شفت ديك الزينة حليت لا ايدي
انا:زينونتيييي
جات كتجري عنقاتني
آلهام: خالتي
انا (سلمت على جاد): مرحبا بيك خويا جاد
جاد: شكرا
مشا برك جاد حدا سارة و انا شديت الهام قدامي، و جا آسر برك حدايا
انا: اوا اسارة اش خبار طنجة
سارة: والو يا الحبيبا غير الروتين
انا: كلنا هاكداك
لمهم دوينا شوية و حتا آسر و جاد، و بان ليا آسر ولا ضريف، زعما متافق معايا، لا و المصيبة ملي بغيت نوض نجيب صينية القهوة
آسر: انا جاي نعونك
لا انا براسي متيقتش، و خصوصا ملي مشا معايا للكوزينة
انا: آسر، ما هذا يا هذا
آسر: يا غتسربي ولا غنقلب ليهم هادشي فوق ريوسهم، محملتش داك خينا...
بغا يكمل هضرتو، مي بانت ليا سارة طالقا ودنيها قدام الباب، و درت اسوء حاجة ممكن نفكر بيها ملي سديت لو فمو بحال داكشي ديال الافلام
انا: شوو غيسمعوك الضياف
حتا هوا منخافش عليه ضغيا فهمني، و جرني حتا قربت ليه، واه السيد دخل فالدور
آسر: و يسمعو، هادا راه شهر العسل ديالنا، خاصنا نبقاو بوحدنا اولا لا
انا (عفطت عليه و شديت ليه من القميجة و ديرا ديك الضحكة الصفرة): لا حشوما، بنت خالي و راجلها هادوك
آسر: كوم ما هاكا كون جريت عليهم...
غير بانت ليا ديك الحمارة مشات، و انا نبعد عليه
انا: ناري يا خويا هادو مالهم عزيز عليهم التبركيك
آسر: كتسوليني انا، سربي وكلي الباشار خلينا نحيدوهم من الطريق..