فين داني زهري (تتمة)

الجزء 21

حلفو هوما ليخرجو، و انا بدا العيا كيدخل لي مع العضام، و وليت غير كنكمع و بان ليا آسر لاحض هادشي، و هوا يهز تلفونو و دار بحالا عيط ليه شي واحد
آسر: وي خويا كريم، اه صافي، اوك هاحنا نص ساعة و نكونو عندك، متخاف من والو منتعطلوش...
قطع و دار لعندي
آسر: هادا كريم قالك راهم وصلو و كيتسناو فينا
بيوتي(دارت عند سارة): اه ختي سارة سمحيلينا حنا غنمشيو، راه رجعات صحبتي و خو راجلي و خاصنا نمشيو عندهم حيت ديرين حفلة فالدار، لمهم ضروري نتشاوفو مرة اخرى الى بقيتي هنا
سربكناهم ضغيا، و غير خرجو و انا نطيح كاو فوق السداري عيانة
آسر (بارك قدامي): بحال هادو منبغيش نبقا نشوفهم
انا: مالني انا لي عرضت عليهم، يحساب ليك مشهية تامارا
ميك عليا و انا بقيت متكية حتا داني النعاس و مبقيت عقلت على والو...
[بركات خنساء قدام التلفازة كتفرج و كتاكل فالشيبس، و حاطة رجل على رجل فوق الطابلة، حتا سمعات صوتو نازل مع الدروج، و ميكات عليه... جا برك حداها، و هي تسوخر و دوات بنبرة جافة
خنساء: السداري طويل و عريض مالنا على الزحام
عرفها باغا تضارب معاه، و ميك عليها، كان متوقع ان ماماه غتجيب ليه داك الفرك ديال العائلة فالصباح، دكشي علاش عيط و قال ليهم مغيكونوش فالدار الصباح باش يهنيو راسهم، و حتا خنساء جاتها من الجنة و الناس، حيت مفيها لي دير الصواب اولا ضارب مع ماماها تاني...
ناصر: غدا غنمشيو لداركم
خنساء: لا مبغيت نمشي فين، اصلا انا خدامة
ناصر: مخديتيش كونجي
خنساء: لا مكين لاش، انا مباغاش نمشي لشي بلاصة، مشي اول او آخر وحدا غتزوج
ناصر: كديري الضد ياك
خنساء (شافت فيه بنص عين و رجعات تاكل و تفرج بحالا مسمعاتوش)
كرز على ايدو و ناض قبل ليصدق مكبر المشكل، و غير ناض و هي تمشي هزات تلفونها ووعيطات لبيوتي تعود ليها، و لقات بيوتي حتا هي ممسالياش، ناعسا، و هي تدير بناقص و مشات طلعات لبيت تكات... ناصر يحساب ليه الى تزوج بخنساء غيحكمها، و هي يحساب ليها غتقدر تنتاقم منو، ولكن حتا واحد فيهم مساهل، هي مبقاتش كتبرك فالدار وقتها كامل كدوزو فالخدمة و النعاس، و هوا فينما يدوي معاها كتنوض معاه الصداع، و المشاكيل ديالهم كلما كتكبر، و الجيران كيسمعو غواتهم منين و منين...
بحال كل نهار، متكية على السرير و كتلعب فالتيلي، ليوم الحد و معندهاش الخدمة، و ناصر خارج من الدوش مزروب حيت كينا كينا جلسة فالمحكاما بخصوص قضية رضوان، و هوا و آسر الى تشد رضوان غيخرجو اليوم من المافيا و ينساو الماضي، ربما مشي الماضي كامل، مي هوما باغين يامنو عائلتهم، حيت ميضمنوش اش ممكن يطرا من هنا للقدام... وقف قدام المراية باش قاد القاميجة و الكوستيوم، و دار كيقلب على مكانتو فالمجورا
ناصر: خنساء مشفتيش مكانتي
خنساء (ببرود): منعرف
ناصر: شوفي ليا التيلي من حداك
خنساء: دوز قلب عليه راسك
ناصر (تعصب و هوا يضرب لكوافوز حتا تقلب): لهلا يلقي بوه خليه ****
خنساء (مهزاتش عينيها على التلي و باقا مبردة): اوا صافي لهلا يلقي بوه
خرج معصب و ردخ الباب و هوا كيلبس فالساعة، و هي هزات عينها شافتو حتا خرج، و ناضت هبطات توجد ما تاكل، عاد دوز تخمل داك البيت راه غتولي عندها الحساسية حيت شادة معاه الضد و مباغاش تشقا... نمشيو لبيوتي لي باركا كتقلب مع آسر على الوراق لي ودرهم
بيوتي (كتقلب تحت السرير): و مكينينش، وتفكر فين حطيتيهم
آسر (كيجبد فالحوايج من الماريو): حطيتهم هنا، حيت كنت عارف راني غنحتاجهم ليوم، هشام كيتسناني بيهم دابا
بيوتي (ناضت حلات المجور كتقلب): ياك الملف حمر
آسر: اه
ملقات داك الملف حتا خوات كاع المجور
بيوتي: ها هوا، شد هاكا، يالاه سربي، و بشما كان علمني اش طاري
غتبان ليكم ان حياة بيوتي و آسر بحال اي زوج مزوجين عادي، مي لا باقين لدابا كيف الخوت فالدار، الفرق انهم ولاو كيوالمو بعضياتهم، مع الوقت و مع بيوتي لقات معامن دوي و يسمع ليها صافي ولات مرتاحة معاه، و هوا واخا كتفرع ليه راسو، مي كيسمع ليها غير باش ميضاربوش، حتا لقا راسو هوا كيجمع معاها، ولا هوا كيعود ليها، قدرو انهم يربطو بعضياتهم غير بالعفوية ديال بيوتي و قلة الحيلة ديال آسر... ملي خرج هزا تالتيلي و عيطات لدريات تشد معاهم الستون شوية... شهرين ديال الزواج، ساقت فيهم بيوتي الخبار لخطبو ادم، و مشات شوهتهم فالدرب، ريبات عليهم الدنيا، اما الياس فمن بعد لخدمة لي خدم مع لمافيا، خدا واحد الخلصة ولا في الاحلام، مشا ديريكت شرا محل و دار ميكانيك، ولكن باقا عندو الخدمة ممحركاش، ولكن آسية معاه، و مسانداه، الحب و ميدير... طيفة تحددات الخطبة ديالها من رشيد، اما يوسف و فدوى فدارو خطبتهم لي حيحات فيها بيوتي و خنساء... اما خنساء، فمخلات ما دارت معاه ديال الضد، مكتشقاش، و مكيدويش معاها، مكطيبش و مكيدويش معاها، مكتحتارمو و مكتكلم ليه و مكدير ليه قيمة ولا حتا كتعبرو، هادشي لي منوض بيناتهم الصداع، مكين غير المضاربات، و خنساء كتصرف معاه بواحد البرود... المشكل انه كيبغيها. اجي نعود ليكم على نهار هز عليها ايدو، و سطرو بالحمر على هز، غير هز عليها مضربهاش ولكن واااو واو...