فين داني زهري (تتمة)

الجزء 4

مشينا لواحد المحل كبير ديال المارياج، و دخلنا و ستقبلنا واحد خينا كبير فالسن
الرجل: مرحبا بيك ولدي آسر
انا (همست لآسر): مولف تشري المرياج ياك، شحال خطبتي من وحدا قبل مني
آسر: بعدد المرات لي درتي فيهم عقلك
زاد و خلاني كنفكر، كيفاش زعما انا معنديش العقل... دخل و انا ملي شفتو سبقني تبعتو بالزربة بحالا غيهرب و غنتوضر... وقفنا قدام الفيترينا ديال المحل و شي ينسيك فلاخر، دكشي كيحمق...
آسر: سي عماد عطينا لعندك شي حاجة جديدة
شاف فيا داك الراجل الشارف، و دوى
الرجل: عرفتي تختار اولدي، زيدي ا بنتي قربي
انا بقيت غير كنشوف فآسر لي بتاسم ليا، و تحاز باش زدت و شد ليا داك الراجل فايدي ليسرا و بقا شحال و هوا كيشوف و انا غير كندور فراسي بين آسر لي باقي مبتاسم، و السيد لي بعد ايدو و تحدر كيقلب على شي حاجة، عاد ناض و هاز معاه واحد الخاتم ديال المارياج صداع و بينا عليه غالي، و مدو لآسر و هوا كيشير عليا بعينيه، و آسر حتا هوا مترددش يجر لي ايدو و لبسولي، ولكن صارحة جاني صداع، خطير و جاني الحد فالقد... بقيت كنشوف فيه، بينما آسر دار لعند السيد
آسر: عارف دوقك مكيخيبش ا سي عماد، جمعو لينا و انا غادي نخلص
مشا آسر يخلص و انا باقة كنشوف فالخاتم، دابا هادا هوا خاتم زواجي، صافي انا غنتربط بهاد خينا بسباب هاد الخاتم... فيقني غير صوت داك عماد
عماد: اري نجمعو ليك ابنتي راه باقي ليك الوقت باش تشوفيه و ملي غتلبسيه عمرك باقا غتحيديه
اي معلمك الله اسي انا موحال واش نكمل سيمانة غيرجعني لدارنا، اه كترت الهم كضحك... جمع لينا عماد الخاتم و واحد لآسر و تمينا راجعين فلوطو، و السقيل دير بينا حتا دوا هوا
آسر: واش عجبك
انا (بغباء): ا شنو شنهوا
آسر: الخاتم واش عجبك
انا (عاد فهمت): اااه الخاتم، اه عجبني واخا مغنفرحش بيه بزاف
شاف فيا بنص عين و كمل طريقو حتا وصلني لدارنا... يالاه غنزل و هوا يشد لي فايدي
آسر: آخر مرة تلبسي فيها التجين
انا: اشنو؟ كتسطا عليا
طلق لي من ايدي و ديمارا
آسر: انا لي عندي قلتو و الى بغيتي الصداع غتلبسيه مرة خرى
يالاه غنجوبو و هوا يتحرك و خلاني غنموت بلاصتي، مال هاذا حتا هوا مع التجين، زعما راني مستورة... دخلت للدار شاعلة و ماما من الباب مستقبلاني بالزغاريت و الصلاة عالنبي، و غير وصلت للصالون حتا كيبانو ليا صحابات ماما جايين يباركو ليا، و مع مفيا لي نبرك معاهم و نشدو النميمة فالجيران سلمت عليهم و درت السبة بعيانة و مشيت نطلع لبيتي حتا شداتني ماما
ماما (كدوي بشوية): راه صاحبتك جات من قبيلا و هي كتبكي طلعات لبيتك و بقات فيه
انا (مخلوعة): شكون صاحبتي
ماما: خنساء
خليتها و طلعت كنجري للبيت، مع دخلت لقيتها متكية ليا فالسرير، و كتمسح دموعها و تنخصص
انا: خنساء!
ناظت و هي تشوف فيا و تلاحت عليا و عطاتها للبكا
انا: خنساء خلعتيني مالك ا صاحبتي
خنساء: وصل حتا لدارنا ا بيوتي وصل حتا لدارنا
مفهمتش اش كتخربق، و جريتها حتا بركتها و بركت حداها، و عاد شديت ليها فايديها
انا: شرحي ليا علامن كدوي
خنساء: ناصر
[نرجعو شوية بالوقت ملي فاقت خنساء مع 9 و كتسمع الصقيل فالدار على عكس العادة لي كيجي خوها الصغير ينكد عليها نعستها... بقات بشوية عليها يموت لي بغا يموت و يحيا لي بغا يحيا حتى لبسات و قادة حالتها، و هبطات، و مع هابطة كتسمع الهضرة، و هاد الهضرة مريحتهاش عرفتها فيها ان... دارت زيفها عاد دخلات على الناس كتبان ليها واحد السيدة كبيرة فالسن و معاها نردين لي واخا تفقد الداكرة تبقا عاقلة عليها، و معاهم بارك سعد... دخلات سلمات و قلبها ممطمانهاش من هادشي، لا متقولوش ليها راه بغا يدير ليها بحال آسر و بيوتي، لا مغتقبلش الى كان آسر باغي يحمي بيوتي هاذا اش باغي يدير...
نردين ناضت بركات حداها، و خنساء غير كدور فعينيها، حيت الى دوات غتزبلها... حتا كتسمع ماماها كدوي
مامات خنساء: ها عروستكم الحاجة فاطمة
بدون وعي شافت فماماها
خنساء(بصدمة): شنو
فاطمة: خليني نبرك حدا عروستي و ندوي معاها
بقات حاضياها و عينيها غيخرجو حتا بركات حداها و نردين من الجهة لاخرى، و حطات فاطمة يدها على ايد خنساء
فاطمة: ابنتي معندي ما نخبي عليك، ليوم حتا جا عندي ولدي و قالك بغا يتزوج، و انا متيقت ولدي هداه الله و بغا يدير عقلو، و نفسو بغاتك و جابني حتا لباب الدار ناوي الحلال و الى قبلتي ا بنتي راه ميخصك خير
بقت خنساء غير كدور فعينيها كيفاش هاد القادية ديال نفسو بغاتها، لا و بغا لحلال، واش تسطا هادا، واش بغا يتزوجها غير باش ينتاقم علا قبل التصرفيقة، ياك كيقول ليها كتبعي راسها و منعرف اش اش طرا دابا، باغي يتزوج وحدا مشاركينها معاه على ما يضن، ياك مخلا باش عيرها شنو هوا معندوش موشكيل مرتو تكون مخلطاها رجال... لمهم عقلها بغا يتفركع و بقات غير كدور فراسها حتا قفزها صونيط ديال الدار، و ناض خوها باش يحل و مع ديك لي غتشوف ناصر داخل برد لها الما فالركابي، و بغات تنوض تضارب معاه قدامهم... هوا عرفها ممرتاحاش معاهوم...