فين داني زهري (تتمة)

الجزء 5

ناصر (شاف فخنساء): خنساء واخا توريني لكوزينة نحط هادشي
 و وراها لميكات ديال الحلوى و السكار و منعرف كاع اش داكشي... ناضت و هوا تبعها و حتا العائلة متبعوهومش زعما باش يدويو... غير شافت خنساء راسها وصلات للكوزينة و هي تسيف
خنساء (حابسة الغوتة غير بزز): واش مرضتي، كيفاش غير جي و تزوج، زعما انا مشريفاش على اشمن اساس خاطبتي... شنو زعما باغي تنتاقم على الضربة لي عطيتك، هادي هيا فايدتك... اوا ا سيدي انا مموافقاش و تلاح، مباغاكش و مباغاش بحالك اللهم نبير و لا نشوف فيك...
مكانتش عيقا بأنها كدوي و كترجع بلور حيت هوا كيزيد لقدام، حتا لصقات مع الحيط عاد عاقت، و هوا مد ايدو حتى حكم ليها على ايدها و كتفها، و ولات كتحس بانفاسو علبها و قرب راسو حتا لودنها باش يهمس بصوت خلا اطرافها تشلل
ناصر: معنديش موشكيل نوليو فالحرام الى مبغيتيش لحلال، غير نتي و اختيارك انا بعدا ممفاكش
بورش لحمها ملي حسات بلحيتو كتقيس لها حنكها، و هوا غير حس بيها بورشات و هوا يبتاسم
ناصر(كيكدب): كنفكر اش غتكون ردة فعل والديك الى عرفوك علا علاقة غير شرعية معايا
هوا ما جا فين قال هاد الهضرة حتى عارف بلي ماماها كتسنط عليهم من الباب،  و عرف بلي بهضرتو قاس الوتر الحساس، و مع ذلك معارفش اش غيوقع ملي هوا غيمشي...طلقها و هي باقا ممستوعباش الهضرة لي رماها بيها، و خرج من الكوزينة، شاف فنسيبتو المستقبلية و بتاسم و رجع للصالون برك حدا سعد و ايوب خو خنساء... دخلات مامات خنساء عليها للكوزينة و بركت تندب
ماماها: اويلي وعدي على الخانزة، اويلي و بعتي راسك، اويلي علا تربيت ايدي، اويلي علا كرشي و مولدت لي، ناري و يعرف باك، يقتلك يقتلك المسخوطة
خنساء: ماما هوا غير كان كيكدب...
سكتتها التصرفيقة لي عطاتها ليها ماماها
ماماها: ديري الفضيحة و جي قولي ليا كيكدب، انا لي حمارة خليت ليكم الحرية ساعا باغين تشوهوني...
جراتها من شعرها
ماماها: دابا غتوافقي عليه، زبلتيها زبلتيها اللهم يسترك، و الله و تخرجي كلمة وحدا ينهارك مطلعش فيه الشمش، و حسابنا ملي يمشيو الناس...
خنساء خانوها دموعها حيت هادشي فات قياسو، ولكن ماماها مرحمتهاش... ضطرات انها توافق و هوا كيبتاسم ليها ابتسامة نصر و معارفش العاقبة د هادشي لي دارو... بقا خنساء حاسة بقلبها كيخرج من بلاصتو و هي كتشوف الفرحة لي علا وجه عائلة ناصر و حتا عائلتها، الا ماماها لي كتواعدها بانها ليوم غترجع حساب سنين... قال لهم ناصر بلي حتا يعيط ليهم و غيتفاهمو على تفاصيل الزواج، و غير خرج و هي مشات لبيتها و هي تبعها... دخلات و سدات الباب من وراه، و هزات الكابلي لي سنين مجبداتوش و بدات هي و خنساء لاعبين بيه حبل و ينقزو، و رجعنا لأيام افتحي يا وردة، ولكن الصارحة خنساء تكزرات، و غير حلات ماماها الباب و هي تخرج فمرة غاديا عند بيوتي]
بقيت غير مصدومة من هادشي لي دار ليها، قالت لي كيهينها اه مي يوصل لهاد الدرجة زاد فيه... بقيت كنسكت فيها و انا قلبي كيتقطع معاها... شحال باش بكات خنساء من لي كنا فالسينكيام عمرني بقيت شفت الدمة فعينيها ولكن دابا هوا مشي غير بكاها، هوا جرحها...
[في بلاصة اخرى تماما، كان آدم بارك و قدامو حبيبتو ريتاج لي جابها معاه من الطاليان غير تعطلات مع ختها أسية لي جات معاها، و الياس بارك معاهم و حال فمو فأسية، و هي غير كتحاول تجاهلو
آدم (بالاطالية مع ريتاج): شحال باش مجيتيش للمغرب
ريتاج: يمكن شي ثلث سنين، من بعد ما بابا عيا بركنا فالايطالي
آدم (شد لها فايدها): انا غنعوضك علا كاع لبلايص لي مشفتيهمش
ريتاج: مرسي حبيبي
اسية: احم احم، زعما حنا هنا
آدم مسكين عقداتو أسية لي غير دور و دخل بينو و بين ريتاج، اش دار
آدم (لالياس): الياس اش بان ليك تخرج أسية دور شوية و انا غنبقا مع ريتاج
بغات اسية ترفض، و لكن سبقها الياس لي وقف
الياس: اه علاش لا، هاد الزين كامل و يبقا مخبي
بغات تموت بالفقصة حيت جرها الياس، و آدم بقا كيدير فيها دوك الشوفات ديال تلاحي...
الياس: انا الياس و نتي
أسية: انا اسية
الياس: عندي 25 عام
أسية: 23 عام
لمهم بقا الياس غير كيجبد فالمواضيع التافهة و يدوي معاها، و هي كتجوبو و تسمت... اسية بطبعها هادئة و مكديرش المشاكيل غير هيا معزيزش عليا آدم يبقا يتعنب على ختها قدامها... بقات كدوي هيا و الياس و لقاو بزاف د القواسم المشتركة بيناتهم و بداو المواضيع كيتحلو غير بحدهم و نساو راسهم بالهضرة حتا غربات الشمش عاد رجعو للدار...
نمشيو لعرسانا، لي باركة ايمان كتفرج و كريم كيخدم فالبيسي ديالو حداها، و مرا مرا كطل عليه واش باقي مسالاش، حتى عصباتو
كريم: امالكي كطلي من الصباح بغيتي شي حاجة
ايمان: زعما راه غدا غنمشيو لشهر العسل خاصك تكون متفرغ ليا
كريم: ياك باغا تخدمي خاصك تولفي منتلاقاوش بزاف، و زيدون راه ناصر و آسر مبقاوش كيجيو للشركة بزاف و حنا بدينا شراكة بيناتنا و خاصنا نساليو الخدمة و منقدرش نخلي عصام و سعد بوحدهم فالخدمة
ايمان: راك نتا الصغير زعما نتا لي خاصك متكونش كتمشي...