شفت فناصر لي بينا فيه باغي يتلاح على خنساء، و فخنساء لي باغا تهرب منهنا حيت بدات كتصفار و وجهها تخطف، و ملي شفت فآسر عرفت بلي غيبات ناصر معاه هنا اليوم... مدويتش ولا زدت الهضرة، هوا فاهمني خليتهم و خديت خنساء ديتها معايا كان شيئا لم يقع... دخلت انا وياها للبيت و سديت علينا و بركت انا وياها ندويو
انا: اش طرا
خنساء: اش جاب هاا دابا
انا: و راه كيفما نتي صاحبتي راه آسر صاحبو و ولد عمتو
خنساء (غرغرو عينيها): لا مبغيتوش يجي، انا خيفا ليعرف، و الى بغا ياخد لي ولدي، انا مبغيتش نبقا نشوفو
انا (عنقتها): لا اخنساء متقوليش هاكدا، صافي راه كلشي نشاءلله غيكون بيخير
بقيت كنحزر فيها و دوينا شوية عاد حليت البيسي غدي نطل على الجروب راه شحال مدخلتش ليه، مربنا يكونو البنات سهرانات حتا لهاد الوقت، و غير حليتو و بدا داكشي كيف الدبان يتكجكج، ويلي وحزب هادا، هضرتهم فوق القياس، بركت كنشوف فايمان لي ليحا تصاورها هي و كريم فشهر العسل، و صاراحا بقا فيا لحال حيت انا ممشيتش لشهر عسل، ولكن كنصبر راسي بانني ممزوجاش بصح... مشت انا وديك القردة نعسنا كيف الايام الخوالي حدا بعضياتنا، و بت الليل كامل و انا كنتفكر تصاور ايمان، زعما كون مجبتش مصعب ليلة عرسي كان ممكن نكون بحال ايمان اولا بحال خنساء، واااع على افكار تشاؤمية، كون جبتو كون راني دابا كندب حيت غنطلق... لمهم منعست حتا للفجر و طحت دودا بحالا عمر عيني داقت النعاس...
[نمشيو لناصر لي من الاصل جا دير السبة بآسر باش يشوفها، هادشي باش ميتنازلش و يجي يردها للدار، و مباغيش يدخل العائلة حيت حتا واحد معارف، السيد غير تزوج و ضرب على كلشي حتا من ختو وولاد عمو، خلا غير آسر... آسر مسكين باقي كيفكر فشي حل باش بيوتي ترجع تسوق ليه راه تفقص و باغي ينحر خنساء لي دخلات عليه كيف الزلط، و دابا مشي غير هادشي لي كيفكر فيه، كيفكر حتا فانه صافي العصابة تشدات، يعني مبقاش كين سبب باش يبقا مزوج ببيوتي، خيفها لطلب الطلاق بحال صاحبتها، اش غيقول ليها ديك الساعة، ميقدرش يقول ليها راه كيبغيها، هوا اصلا مكيآمنش بالحب بحال صاحبو، واكلين من مغرفة وحدا هاد الجوج... دخل آسر لبيتو و تكا ولكن مقدرش ينعس، مسكين جاه السرير خاوي توحش المخدة😂 اما ناصر فخدا البيت التحتاني، ولكن مقدرش ينعس حيت باغي يمشي يقجها لي جاييا هنا و مخلياه هوا تما، مساكن عندهم عجز عاطفي هاد رجال آخر زمن...
ناضت خنساء مع الستة د الصباح و نزلات للكوزينة تقلب على ما تسرط، يا ناري هادشي غير الشهر اللول، كون التاني معرفت اش غدير... حلات التلاجة، و جبدات الشكلاط و الفرماج، و مشات كتحل الفرماج و تلوحو فقرعة الشكلاط و خلطات كلشي و بدات تاكل فيه، المهم تاكل خيلوطتها و صافي...
ناصر: اش كديري
قفزها حتا كانت غطيح القرعة، و دارت شافت فيه معصبة، حتا للماكلة و لا
خنساء: يعطيك ما تاكل، دير غير الحس، مناكلوش حتا على خاطرنا
ناصر: نتي لي ديرا كي الشفارا
خنساء: لهلا يحيك حتا نكون شفارا، مالك نتا وزير الداخلية جايا نشفرك
ناصر: داك اللسان عندك مكيقصارش
خنساء: و دوك التصرفات ديالك مكيتقادوش
ناصر: مالني كي جيتك
خنساء: ملكة جمال المغرب
ناصر (تعصب): خنساء حتارمي راسك، باقي متحاسبناش على ديك لي خرجتي من الدار زيدي هادي
خنساء: لا غير زيدها، راكا اصلا دير كلوندريا كتقيد فيها اش كندير انا من الصباح حتا للعشية
ناصر (غوت): خنساء هاظ البرودة لي كتصرفي بيها مغتخرجك فين
خنساء (كتعوج فيه): هاد البرودة مغتخرجك فين... و كون راجل و بلاصة متبقا تحل فمك جي وريني علاش قاد
و معودهاش معاك حتا عطاها ديك التمرميقة حتا دارت، و طاحت القرعة ديال الشكلاط و الفرماج تشتتات، دابا هي هتمات بماكلتها لي طاحت كتر من حنكها لي حمار، و جرها من ايدها
ناصر (باغي غير من ينحر): راه ملي سهلت معاك بغيتي تلعبي عليا، ولكن دابا غيرجع ناصر لي معرفتيهش
مسكينة ملي كانت مخففة كان ضريف حملات و هوا يقباح، مسكين واقيلا اثر عليه الحمل... هي غرغرو عينيها شي لي خلاه فعلا هاد المرة يتخلع
خنساء: ولكن ولكن الشكلاط ديالي
ناصر (زاد كرز عليها و تعصب): واش انا غنطرطق هنا و نتي كتفكري ليا فالشكلاط
خنساء (كتبكي): منسمحش ليك، انا صوبتو مشهياه من خاطري
نزلات بيوتي و آسر كيجريو على صوت الغوات، حتا كتبان ليهم خنساء كتبكي و حنكها حمر و ناصر هوا الشرير فالقصة و هوا لي ضاربها... بيوتي مشات شداتها، ولكن خنساء راه بصح قليلة صحا، مع بقا فيها الحال و مع ضربها فشلو عليها رجليها، و طاحت للارض، اودي و جاها الوجع و مع هي بوحاطيا بركت تغوت، هوا راه كيما مفيها والو غير خاصها طيح عليه الباطل... صاراحا ناصر تشطن ملي شافها هاكدا، و آسر لاحظ هادشي، اما بيوتي فناضت كتغوت عليه، و عارفينها ديما كتزبلها و مكتفكرش قبل ما تقول اولا دير شي حاجة
بيوتي: واش من نيتك، متمدش عليها ايدك، معندكش الحق، و عاد زيد انها حاملة باغي تقتل ولدك، نتا خاصك لي يعلمك درس فالأخلاق
اوا و انفجرت القنبلة.
أنت تقرأ
فين داني زهري (تتمة)
Roman pour Adolescentsسلام لبنات، مرحبا بيكم مع الكمالة من فين داني زهري، هنا غنكملو القصة من بعد نقطة تحول كبيرة، تابعو معانا الاحداث و نتمناو يعجبوكم
