فين داني زهري (تتمة)

الجزء 16

ايمان عيشا لينا الحياة، مكين غير الرومانسية ثم الرومانسية، و مالها راه شهر العسل هاداك، بعدا شبعات عليا غير تحلاف حيت درت العرس لي مهوا عرس و هي مكيناش، قالت ليك درتها بلعاني، راه داروها بيا اختي انا مدرت لا بايدي لا برجلي... سالات الحيحة د الخطبة من بعد ما جا سيدهم حسام و برز حدا عروستو و لبسو الخواتم و انا و خنساء شبعنا غير سيلفيات، لمهم ملي تفرتكت الجقلة بركت كنقلب على نمرت آسر حيت ممدخلاهاش، لي عارفاه كتسالي ب 67... و من عند الله ولاو عندي بزاف ديال النوامر كيساليو بنفس الرقم و حتا وحدا فيهم معارفاها ديالمن، ملي لقيت راسي واحلة وليت كنعيط على كل نمرة باش نشوف شكون مولاها، و دزت عليهم كاملين خالتي و عمي و مرات عمي و الحاجة صاحبة ماما و ملقيتوش، شوية حتا صونا تيليفوني و كيبان ليا مكتوب 'راجلي لعزيز'
انا: شكون هاذ راجلي لعزيز عوتاني
درت نشوف فخنساء لي حابسة الضحكة، هاد بنت لحرام ايمتا مشات ليا للتيلي، على كل جوبتو
انا: الو
آسر: فين وصلتي نجي لك ولا مازال
انا: اه صافي سالينا غير جي
لمهم هوا جا ليا، و خنساء رجعات مع فدوى فالطريق، و هاجر قضاتها رومنسية مع حسام الى ان حن عليهم الله و زاد السيد لدارهم... غاديا مع آسر فالطريق و جاني الملل و انا نقول ندويو شوية
انا: آسر؟
آسر (مركز على الصوكان): نعام
انا: دابا كتفكر تخرج من المافيا
آسر: الى وصل داك **** و شديناه و درت لي فبالي، اه غنخرج انا و ناصر و غنعتازلو المافيا
انا: معاكم فالمافيا كينين لبنات؟
آسر (طل عليا بنص عين): اه كينين ولكن خدمتهم بوحدها
انا (بعفوية): مفهمتش
آسر (ضحكة جنب): حسن ليك متفهميش
انا: آسر
آسر (شاف فيا بنص عين): اشنو
انا(كنرقق صوتي): مغنمشيوش لشهر العسل
آسر (ببرود): غنديك لشهر النبك الى مسكتيش، تابعينا المافيا باغين يصفيوها لينا و هي باغا ليا شهر العسل
انا: واش انا مزوجة ولا مصاحبة
وقف لوطو قدام الدار و دار شاف فيا
آسر: متأكدة بلي نتي مزوجة
بيوتي (وحلات ليا الهضرة و شفت راسي غنغرق و انا نهرب): انا داخلا نشوف الى كين ما نطيب
[خلاها دخلات و خرج كيتنهد من موراها مهموم مسكين... خليونا نمشيو عند خنساء... غير قربات من الدار و هي تلقاه قدامها، و من عينيه عرفات راسها مشات فيه... حدرات راسها و دارت راسها مشافتوش و بغات دوز من حداه، و يالاه فاتو و هوا يجرها بالجهد من دراعها حتا دارت عندو، و شاف فيها باغي ينحرها
ناصر: هاد التحديات لي كديريها معاها معندها فين توصلك
خنساء (نثرات ايدها بالجهد منو و خنزرت فيه): و نتا هاد الحكام لي باغي دوزو عليا راه ممنوش
ناصر (كرز لها على مرفقها): فين باغا توصلي
خنساء (ضرتها ايدها): طلق مني ولا غنديرو شي شوهة هنايا
ناصر: يالاه وريني علاش قادة
خنساء (بدات كتغوت): و عتقو الروووح و باغي يتكرفص عليا واا النااااس
بداو الناس كيتجمعو عليهم و هي باقا كتغوت و حلف هوا ليطلق لها من ايدها، و حتا تجمعو الناس و هوا يشوف فيهم
ناصر: كين شي منقديو، ميضاربش الراجل و مراتو على خاطرهم
و تفرتكت الجقلة بحالا عمرها كانت
ناصر: انا كنت باغي نعطيك وقت ا خنساء ولكن نتي لي ضيعتيه من ايدك
طلق منها و زاد للوطو ديالو و كسيرا، و هي بقات كتمسد فايدها و كتبركم و هي غادا لدارهم... نقدرو نقولو بان احوال بيوتي و آسر مستقرة من غير الفعايل لي كديرهم بيوتي و كيخلص آسر، ولكن راه بعقلو ملي مكيديرش فيها راسو، و على الاقل مكيضاربوش بزاف بحال ناصر و خنساء، حيت بيوتي عزيز عليها الهضرة فاغلب الوقت كتبقا غير تبلابلي لآسر حدا راسو و مسكين كيبقا يسمعها... باقا بيوتي ناعسة و عاطيا لآسر بالضهر و بيناتهم ديك المخدة لي عيا ميحيدها و تعود هي ترجعها... حتا صونا التيلي ديال آسر، و ناض باش يجوب و بيوتي طالقا ودنيها
آسر: تاكدو من انه كيهربش، صافي هانا جاي...
ناض كيجري مشا جبد حوايجو من البلاكار و بيوتي عاطياه بالضهر
بيوتي: فين غادي
آسر: وصل الجوكر ديالنا و خاصنا نبداو الخدمة راه الجلسة مبقا ليها والو
بيوتي: آه و غتعطل
آسر: اش هاد المحنة فين عمرك سولتيني
بيوتي: و هانا دابا كنسول
آسر: معرفتش يمكن نبقا مع ناصر شوية راه مدة مشفتوش
بيوتي: اه اوك
خرج كيجري متوجه للمقر فين وصل زيد، و صافي ها هوما حيدو اول خطوة الى سهالة كلشي غيسهال... ناضت بيوتي و دخلات للكوزينة طيب شي حاجة شحال مطيباتش، و جبدات جاع لي عمرات بيه البلاكارات بركت تخدم بيه... اما خنساء فهاديك باركا فخدمتها كع هشام كيجمعو التقارير ديال قضية نردين لي بعد غدا جلستها اللخرة فالمحكمة... ممحتاجينش نعود ليكم التعديب لي داز على زيد مسكين، و الندالة ديال آسر و ناصر فالتعامل مع المجرمين... لمهم داك زيد مغيكملش النهار على هاد الوتيرة ديال العصا، و حتا هوا كياكل لعصا و يقول ليهم مغندويش علاش كيقلب... لمهم ملي سحف زيد و خافوه ليموت ليهم حبسو عليه العصا، و ربطوه معلق من رجليه فواحد العمود و سدو عليه الباب و خرجو يبركو مع بعضياتهم شوية بينما فاق...