فين داني زهري (تتمة)

الجزء 14

حياة: فين خرج
بيوتي (كترقع فالضحكة): خرج ملي كنت باقا ناعسة
نعيمة: مالكي منضتي توجدي لفطور لراجلك
بيوتي (تسيفات عوتاني): شنو واش حتا النعاس غتحاسبي معايا عليه، و زيدون عندو ايديه يوجد لفطور، راه زعما هوا لي خاصو يجيبو ليا
هالة: اه عندها الحق، حسناء باقا عروسة و باغين دخلوها للكوزينة
حياة: لا لا، فين بعدا لعريس شفتو تعطل
عمرو طويل كنقولها و نعودها، غير دكروه و هوا يدخل للدار و معاه ناصر... اوا و شداتو حياة
حياة: ولدي آسر فين مشيتي و خليتي مراتك بوحدها
آسر: نتوما كاملين معاها و بوحدها
ناصر(نغز آسر): مقادينهاش
شاف فيه آسر بنص عين و رجع لمو لي منعرف اش باغا دير، اوا مشات بيوتي غادا لبيتها دارت السبة بعيانة عاد من حالتها بانت ليهم مسخسخة مسكينة و حتا واحد مداها فداك لي كتفو عاد خرج منو رصاصة، و حتى هوا خرج مع ناصر ليلتحقو بالرجال لي مجموعين فدار عصام... خليوهم شوية و نرجعو لناصر... اوا سعد بحث و بحث و بحث لكن ملقاش السيدة، مسكين تيق السلوكية لي طلقاتها بيوتي... حتا ناصر مدارش بالو مع هضرة سعد، حيت عارف بلي مادام بغا خنساء صافي خنساء غتكون ليه... لدا و بعد مشاورات طويلة و من بعد ما فقد سعد الأمل فانه يلقا بديعة و راجلها لي بارك كيتسركل دابا مع خطيبتو... قرر ناصر انه غيدير ما دار صاحبو آسر و يتزوج قبل ان تنقلب عليه الكفة... ولكن تم لكن هاذ لاكن مكتساليش، اوا لكن غيخلي شوية حتى يرجع كريم من شهر العسل، حيت باراكا غير محلف على آسر يولي حتى على ناصر... هناك ما هو اهم من هادشي دابا، هو خنساء لي نسات بلي ناصر خاطبها، او بيوتي لي كتناسا بلي تزوجات، اوا و الحياة تستمر... بقاو العائلة النهار كامل و بيوتي حلفات هي لتخرج من البيت بقات شادة غير التيلي و حاضيا ليدخل آسر و يهرسو ليها كيما لي سبقو... اما خنساء فغير دخلات للدار و هي تشدها ماماها و جراتها للبيت باش تدوي معاها، و سدات الباب عليهم
ماماها: عيطات مامات ناصر
خنساء (تأففات و بغات تزيد و تخليها): و من بعد
ماماها (شداتها): غير غيرجع ولد عمو و باغين يزوجوكم
خنساء (ببرودة): و بالطبع وافقتي
ماماها: مالني غنبقا نتسنا حتى تجيبي ليا شي كرش
خنساء: غير كتعدبي فراسك راه قلت ليك داك النهار غير كدب نتي لي باغا ديري فيها فاهما
ماماها: عندك ثلاثة د السيمانات غنوجدو فيها كلشي، و غنديرو خطبة و لغد ليه لعرس معنك ما تبقاي ديري هنا دار راجلك حسن ليك
غتكدب خنساء الى قالت بلي بقا فيها الحال ان ماماها باغا غير تفك منها، ولكن حتا ماماها خيفا ليعرف بابات خنساء، و ديك الساعة العواقب غتكون وخيمة كتر... خلات حتا خرجات ماماها و سدات عليها البيت و تكات كتشوف فالسقف و كتفكر بشي حاجة غتنتاقم بيها منو، بالرغم من ان زبل بيوتي عطلات الزواج ولكن مع دلك خاصها شي حاجة باش تنتاقم، صافي زواج تحدد يعني متقدرش تحبسو ولكن تقدر تدير من بعدو... خليوها دابا فالهدوء قبل العاصفة...
غير وصلا تسعود د الليل مشات بيوتي للكوزينة باغا تاكل حيت غتموت بالجوع و الدار كتصفر... دخلات للكوزينة لي واضح مزيان انه عمرو ما دخل ليها، و بركات تقلب فالتلاجة شوية فالبلاكارات لكن والو كين غير الريح
بيوتي (بكآبة): و فيا الجوع
سمعات الباب تحل و هي تمشي كتجري تلقات ليه مع الدخلة
بيوتي (مربعة ايديها): فين مشيتي من الصباح، من الصباح و انا كنتسنا، الكوزينة كتصفر و انا مفاطراش، واش غنصوم اولا
آسر: نسيتك]
انا غنموت بالفقصة و هوا مبرد ليا على قلبو
انا (معصبة): ديك نسيتك غناكلها انا
آسر: لا كوليني انا
انا: مكنضحكش راه فيا الجوع و ملي كنجوع راه نقتل ما نعقل
رجع مع الطريق و خرج و خلاني بااا نتلاح، بركت كنغوت و نتفقص غير بوحدي، و رجعت للبيت بدلت و تكيت باقا كنبركم، حتا تحل عليا باب البيت، درت لقيتو هوا لي رجع و حط ليا على الكوافوز شي حاجة
آسر: نوضي كولي الى بغيتي
نضت مشيت للميكة، لقيت فيها سندويتش شوارما و هامبرغر و سباغيتي، مالو هادا كيحساب ليه غناكل هادشي كامل، ولكن مفيها باس نرجع حق الصباح... بديت كناكل و دورت عيني خاطفة فيه شوفة و هوا يبان لي حيد التريكو على كتفو و بانو ليا الفاصمات، اويلي هادا مالو شكون ضربو، للحظة وحلات ليا حتا دار كيشوف فيا بدوك النضرات الباردة
آسر: مالكي
انا: مال كتفك عاد لبارح كنتي صحا سلام
آسر: باراكا غير لي عارفا العصابة باقا تابعانا و سادا باب الزنقة و مخلياني ليهم
انا (تخلعت): و الله ما قصدت انا غير بغيت...
آسر: اش بغيتي، كولي و سيري تنعسي مفيا لي نضارب معاك
وحلات ليا الماكلة، واعباد الله و نسيت انا اش غندير، صافي دابا كتفو ضرب و سالينا، ولكن انا السباب... كليت غير باش نسد جوعي، مالني غنبقا بالجوع... اما هوا غسل وجهو و مشا ديريكت تكا فالسرير عاطيني ضهرو... كملت ماكلتي و جمعت البقايا و تكيت حداه كنشوف فكتفو، وااااع وعلاش دابا عاد فاقت فيا الانسانية، خليه شكون قاليه دخل للمافيا... و مبغاش يجيني النعاس، و انا نوض قلت ارى نخوي فاليزتي...