فين داني زهري (تتمة)

الجزء 2

جاب ليا ريان لفريت انا وياها، و بركت ناكل و نفكر فهاد الروينة لكحلة لي انا فيها، اويلي على هاد السيمانة، واش حتا نفرح براسي مكيناش... اما خنساء فغير مضركة وجهها على داك رايان لي عينيه غيخرجو فيها، حتا نضنا انا وياها غنمشيو، يالاه غنخرجو و هوا يوقف ريان قدامنا، زعما قدام خنساء
ريان: خنساء عافاك عطيني النمرة و الله حتا خاطياني لتفلية و عارفك بنت الناس، و ريني غير داركم نجيك ليوم قبل غدا
اويلي على يجي ليوم قبل غدا، انا شفت فخنساء لي بقات غير كتشوف فيه ديك الشوفة ديال من نيتك اولد العبد، و يالاه غدوي احتا وقف علينا كريهها
ناصر: مال هاذا
كان كيخنزر فريان، شتي هاد ناصر انا قاشعاه، سيد مزعوط فصاحبتي، غير هوا علاش هي كتكرهو الله و اعلم، لمهم، غير شافت ناصر و هي تبسم لريان
خنساء: اه راه كنت باغا غير ندير نمرة و نعطيها ليك نتا اللول، و ملي تعيط ليا غنسيفط ليك العنوان
و ضد فناصر لي كيشوف فيها، جبدات ستيلو و ورقة و قيدات شي حاجة و لي انا متأكدة من انها مشي نمرتها حيت واخا تنشق الارض و تبلعها الى ريان، و يالاه مدات ايدها تعطيها لريان و هوا يشد ليها ناصر فايدها و زير عليها حتى حلات ايدها بزز و طاحت الورقة، و عرفت بلي ايدها ضراتها من شدتو و عرفتو طالع ليه لدم، ولكن معرفت مندير
ناصر: اش كتحاولي دير
خنساء: مشي شغلك ندير لي بغيت
ناصر: دابا غيولي شغلي، ملي وليتي كتحدايني انا لي غنوريك
منعرف اش كان باغي يدير، ولكن وقفاتو خنساء ملي صرفقاتو حتى كلشي دار كيشوف فينا
خنساء: منسمحش ليك تمد ايدك عليا، ولا حتى تقيسني، جمع ايدك ولا غندير ليك شي شوهة هنايا
مرضاش ناصر، و بينا غير خاف ليفوت فيها شي ضقة دخلها للانعاش جمع ايدو، ولكن هضرتو ركبات فيها الرعب
ناصر: باقا مكتعرفينيش ا خنساء، و الثمن ديال هاد التصرفيقة قريب غتعرفيه
خلانا و زاد، و خنساء غير تحرك و حسيت بيها نهارت نفسيا، واخا كنبانو انا وياها لبوات حنا راه غير مشيشات مقادين على والو، غير جبهتنا سابقانا ولسانا طويل...
رجعت للدار و يالاه غنتكا و هي دخل عليا ختي
لطيفة: ناري ا ديك الصكعة منين دبرتي علا هاد الراجل، ماما غطير بالفرحة لي جاك عريس بحال هادا، والله حتى كنت نحلف حتا غتزوجي خضار
انا: خرجي عليا خليني نعس
يوسف (من قدام الباب): زيدي خليها ترتاح راه غدا خارجا مع راجلها
انا: شمن راجل عوتاني
يوسف: باز ليه معاك، انا بعدا غير نتفك منك و دبري راسك نتي وياه
لطيفة: اه علا مسمعتيش ماما ملي قالت ليك غيديك غدا باش ديرو التحاليل و دوزو تشريو لخواتم
انا: اشمن خواتم يخوي ليكم الضراس، خليوني تجيبو ليا غير خبار الجراد
يوسف: نوضي ا لطيفة هاديك راه غير شافت راسها غتزوج براجل لاباس عليه و بدات تهز علينا نيوفها
لطيفة: ياك ا ختي غتنسايني من دابا
طلعو ليا الزعف و هزيت الصنادل و بديت نشير عليهم و هوما هربانين
انا: ينعل حسكم يا لكافارا بالله، خرجو عليا، خرجو
غير خرجو و انا نبرك فرق الناموسية و العيا ديال الدنيا مجموع عليا... تلاحيت على سريري و نعست و مشفت غير الكوابيس، وليت باغا غير نفيق...
صباح جديد و مضاربة جديدة، و كارثة جديدة
ماما: اويلي الراجل كيتسنا فيها و هي باقا راكدة
وليت انا و ماما كنتجارو على المانطة باغا بزز تنوضني نمشي لعندو و هوا جايني مع 8 مال هاذا واش سافابا
انا: و الله لا نضت انا دابا، سيري جري عليه حتا ل 10
ماما: اويلي و جاك راجل على مزيناتو و باغا طيريه حتا هوا، نوضي اديك المصيبة
و انا حلفت لنوض من بلاصتي و خليتها خرجات و رجعت كملت على نعاسي لي غير ديراه بلعاني اما راه ما ناعسة ما فيقة
[خرجات نعيمة عند آسر
نعيمة: سمح ليا اولدي راها صابحة مريضة و مقاداش تفيق دابا
آسر: مشي موشكيل انا ندخل نفيقها
اوا و مصابت ما تقول و هوا معندوش لوجه خلاتو ماماها دخل و حتا هوا دخل، ميمتي على لحكام، باقي حتا ما تكاتبو مخلينو داخل عليها حتا للبيت... دخل بعجاجتو و نعيمة بقات غير برا كتسنط. بيوتي غير سمعات لباب تردخ و هي تبدا تعير
بيوتي: بلا متحاولي ا ماما راني منيضاش من هنا حتى ل10، الى فيك النفس خليه مجرجر
تبسم و مشا للبلاكار ديالها جبد ليها كسوة خفيفة، و زيف ديالها، بعدا راه عندو الدوق داكشي اسوغتي، و لاحو فوق السرير و هيا باقا مخشيا تحتو... خسر عليها انه جر المانطا حتى عراها و هي لابسا بيجامة قصيرة، قصيرة بمعنى انها سروال و فوقاني ديالو قصير، و شعرها مخربق، و مع ديك لي غتنوض تعير حتا لقاتو، و جمعتها غوتا وحدا
بيوتي: و عتقو الروووووح وااااع وااااماما وااا وداخل حتا لبيتي وااااااا، واااماما واااا بابا و فينك اجي تشوف مرتك كدخل عليا الرجال، واااا متقيسنيش متقربليش واااا
هوا واقف بعيد و غير كيشوف فيها كتحير غير بوحدها، و بركت تغوت و ديرا حالة...
آسر: الى ساليتي الدراما ديالك نوض تكعدي بدلي و خلينا نتحركو راه مغنسهروش
و هي باقا كتغوت حتا دخلات ماماها و يوسف و شافو ديك الحالة لي ديراها على والو، و نعيمة حشمات قدامو ويلي...