فين داني زهري (تتمة)

الجزء 6

كريم: راك عارفة آسر و ناصر عندهم ما يدار من غير الشركة حيت عندهم بزاف د الالتزامات خاصهم يفكوها
ايمان: بحالاش متلا
كريم: نتي مكتعرفيش فهادشي، خليك غير فاللي كتعرفي، خلينا دابا نسدو هاد الموضوع غنجبدو الخدمة و غنرجعو نضاربو و انا عيان
ايمان: كيفاش غنضاربو، انا مكندوي حتا كتقلب عليا
ناض كريم كيمسح على وجهو بارهاق و باقا ايمان كدوي
ايمان: كريم اجي باقي مدويناش
شافها مغتسكتش و هوا يغفلها و هزها
كريم: كنقول ليك مباغيش نظارب معاك، صافي سالينا الموضوع، زعما راه حنا عرسان جداد
ايمان: غتنزلني و لا و الله حتا نغوت
كريم: يخليلي الحشمة، غير الدروج و نزلك نخاف طيحي
و تحرك و هي باغا تهبط و خيفا تكربع هيا وياه فالدروج... خليونا من هادو، نرجعو لخنساء لي مرجعاتش لدارهم، و عيطات بيوتي لماماها و قالتها ليها... ]
اصبحنا و اصبح الملك لله، فقت على الصونيط ديال داك المشقوف لي عاد شريتو عوتاني... باقا ناعسة هزيتو جوبت و انا معارفاش حتا النمرة تاعمن
انا: الو شكون معايا
الشخص: باقا ناعسة حتا لدابا راه التسعود هادي
انا: شكون معايا المرض
الشخص: آسر هادا
انا: شكون آسر
بالفعل انا معرفتوش، راني مشقلبة بالنعاس، و حسيت بيه طلع ليه الدم
آسر: بقا لينا يومين و نتزوجو و كتقولي ليا شكون
انا: و الله اخويا معرفتك راه النمرة غالاط
و قطعت عليه، ولكن مزيانا فيه نيت... لحت التيلي تحت لوسادة و رجعت باش نعس... لحت ايدي للجيهة لاخرى من الناموسية و حسيت بيها خاوية عاد رجع لي عقلي و تفكرت راه خنساء كانت ناعسة حدايا، و نضت قافزة نقلب عليها... عاد بانت ليا خارجة من الحمام من بعد ما دوشات
انا: بالصحة
خنساء: كنتي ناعسة و مبغيتش نفيقك و خاصني نمشي للخدمة
انا: نمشي معاك
خنساء (بابتسامة شريرة): شي بلان هادا
قلعاتني بنت الهم
انا (بادلتها نفس الابتسامة): تعرفي من بعد، خليني نوجد راسي دابا
بركات كتلعب ليا بالتيليفون، و انا دخلت بدلت عليا و لبست تجين، شتي دابا عاد غنولي نلبسو د بصح... لمهم خرجت عندها و شافت فيا
خنساء (كتصفر): وا ا صاحبتي مالكي باغا دبري علا راجل من غير آسر هاد النهار
انا (بشر): شكون يعرف الراجل هوا لي يدبر عليا
خرجت و خنساء تبعاتني مخلوعة
خنساء: بيوتي اش باغا ديري، شوفي انا ممعاكش فمهما كان لي باغا ديريه
مجوبتهاش و غير شدينا الطأكسي و انا نعيط لآدم، و خنساء كتسمع
انا: و فينك شنو جيتي و قلبتي عليا مجيتيش حتا للدار
آدم: كطيري يا ختي راني يالاه فقت، لبارح بيت سهران خرجت انا و خطيبتي وختها و الياس و بقينا سهرانين عاد فقت
انا: اوا دابا دابا تجي عندي، انا نسيفط ليك العنوان
آدم: بيوتي شي بلان هاذا رجعت عوتاني
انا: ا مالكم معايا ليوم، جي و صافي بلا هضرة
مخليتوش يرفض و قطعت عليه... وصلنا للمكتب و دخلنا... بركات بلاصتها و انا بقيت كنتسنا حتا صونا تيليفوني، واه عود عيط مرة اخرى
انا: اشنو بغيتي
آسر: دابا عرفتيني ياك
انا: متعيطش و انا ناعسة راه كنكون مقلوبة، بعدا اجي منين جبتي نمرتي
آسر: جبتها وصافي... راه ليوم مي عارضة على العائلة باش تعرفهوم بيك فالليل و غنجي باش نديك
انا: ولا وعلاش نتا فيك الكفاية
آسر: دابا عاد ولات فيا الكفاية، غنجي ليك مع الستة
وقطع و غلاني كنغلي... شوية حتا دخل آدم، و انا نوض كنجري عندو
انا: تعطلتي مالك واخا تكون توضرتي
آدم: اه توضرت خلينا دابا اش بغيتي
انا: دابا نتا ممثل ياك
آدم (بشك): بيوتي!
انا (بضحكة شريرة): بغيتك ت...
منقولش ليكم الخطة خليوكم حتا تعرفوها، اما خنساء مسكينة فعيات معايا بلاش غير تبتي و انا لي فراسي فراسي...
[وقفات ديك السيدة بنقابها الكحل و حداها داك الراجل اللحية و الجلابة، بينا عليهم شي اخواااانييين مع راسهم، كيبانو غير عينيها القهويين و هوا غير كيدور فعينيه و ايدو على كتفها... سولو السيكيريتي ديال الشركة
السيدة (بصوت رزين و رقيق): عافاك ا سيدي السي سعد كين هنا
السيكريتي: اه الالة اش حب الخاطر
السيدة(بدات كتبكي): عافا خويا خاصني نشوفو، عافا خويا عوني راه ليا غير الله فهاد الدنيا، خاصني ندوي معاه
السكيريتي تعاطف مع حالتها لي كتقطع فالقلب و داك الراجل لي عنقها و بقات كتبكي عليه
دوا السيكيريتي مع الاستقبال من واحد الجهاز لمهم وقال ليها تعلم السي سعد... بقات ديك السيدة كتمسح فدموعها حتى خرج سعد من الشركة بكل رجولة و ثبات حتى وقف عليها
سعد: كين شي ما نقديو
السيدة (بداو الدموع كيسيلو): سيدي انا جيت من بعد ما لاحوني، راه ملياش من غير الله و انا غير ولية وحيدة و راجلي مسكين ما يسمع ما يدوي، و جاياك على ود بنتي لي ماتت لي وهيا باقا مشافت من الدنيا والو
سعد: دابا شنو المشكل ا لالة فاش نقدر نعاونك
السيدة: مشكيلتي ا سيدي مع ولد عمك السي ناصر دعيتو لله... اه ا سي ولد عمك هوا لي دمر ليا حياتي هوا لي حرمني من كبدتي، هادي عامين باش جاني بسميت الحلال و قالي ناوي المعقول، و انا مديت ايدي للحنا... ضحك عليا ا سيدي...