فين داني زهري (تتمة)

الجزء12

بقيت باركا و هالة حدايا و خالتي حياة كتجري مع الضياف و التوجاد، و انا غير كندور فعينيا على صحاباتي لي كل واش كدير...  لمهم غير ضربات 12 د ليل و هوا يقرر راجلي حبيبي بلي صافي سالات الحفلة، و حتا واحد مقدر يعارضو، ولكن انا عاد سرات معايا بلي غنمشي معاه، ويلي ويلي كحلتها خاصني نلقا شي حل...
[عدا بيوتي دابا مكتفكر غير فأنها ليلة عرسها، داكشي علاش مبكاتش، اولا ربما حيت شافت الجانب المشرق و هوا انها غتبعد من دارهم لي كانت و باقا باغا تعطيها شبر د التيساع... تعانقو و باقي عقل بيوتي خدام كيقلب على حل... تعانقت بيوتي و خنساء و هي تبرد ليها خنساء الما فالركابي
خنساء (كتهمس ليها): مشيتي فيها الصكعة
غير دارت بيوتي و وجهها صفر، اول شخص بان ليها هو مصعب لي باقي منعسش، و هي دير آخر حاجة غيتوقعوها منها... مشات هزات مصعب من عند هالة و شدات فيه بايديها و رجليها
بيوتي (كتلحمس على هالة): هالة ختي حبيبتي واخا ندي معايا مصعب للدار راه ولبارح مسخيتش بيه
هالة (حشمات و بدات كدور عينيها بين آسر و بيوتي): ولكن...
آسر: حطي الدري لمو و تحركي
بيوتي (خنزرات فيه): مدخلش نتا(و رجعات لهلة ببرائة): عافا ختي غير ليوم
مصعب: علاش غنمشي معاك ا خلتي
بيوتي (همسات ليه فودنو): حيت الى ممشيتيش معايا ليوم غنلوحك من السطح
مفهم مسكين والو، و لكن فضل انه يسكت... اما بيوتي بقات شادة فمصعب و مزيرة عليه... عصام شداتو الضحكة و حياة و نعيمة فحشمو من انهم يقولو شي كلمة، و خنساء تخبات فواحد القنت و بقات كضحك حتى يالو الدموع من عينيها، و فدوى و هاجر جاو حدا بيوتي
فدوى (كدوي بشوية): اويلي الصكعة واش ليلة عرسك باغا دي معاك البز
هاجر: كيبان ليا آسر غيقتلك فهاد اللحظة
ميكات عليهم و رجعات كتشوف فهالة بنظرات البرائة، و دابا المشكل مشي ان هالة مباغاش، المشكل ان هالة حشمانة توحل مصعب فيهم، و حشمانة لترفض فوجه بيوتي لي عاد بلزتها معاها هاذي يومين... قرب عصام حدا آسر و غالباه الضحكة
عصام: باز ليك ا خويا، شافوك زربان بغات تنكدها عليك
آسر (مزير على سنانو): الى مشديتيش ولدك غنسا راك خويا
عصام(حمحم باش دارت عندو بيوتي): ولدي غيبات فدارهم
بيوتي: مسولتكش سولت مو
خلات عصام مسكين كيصرفق فيه البرد د القمعة، و آسر زير على ايدو
آسر: واش مديريش شي حاجة بلا مشاكيل، ايما غتحركي و تحطي مصعب و اما غندير شغلي بايدي
بيوتي (تربعات فالارض و شادة مصعب قدامها): و تا انا و الله ما نتحرك من هنا الى و رجلي على رجل مصعب
حياة: يهديك الله ا بنتي واش كينا شي عروسة كتبغي الدراري الصغار فليلة عرسها
نعيمة: طلقي الدري حتا لنهار آخر و ديه معاك
بيوتي: قلت ليوم يعني ليوم و سالينا، و الى راسكم قاصح فراسي قصح منكم
معتز: صافي ا ولدي عصام خليها ديه معاها
بيوتي: شتي ا عمي كلهم باغين يتحاماو عليا
معتز: يالاه نوضي ا بنتي تمشي لدارك
عز عليها هاذ السيد، راجل الله يعمر ليه الدار... وقفات و هي هازة مصعب لي تكا ليها جدا ودنها و دوا
مصعب: ولكن انا مباغيش نمشي معاك ا خالتي
بيوتي(حتا هي همسات ليه): و كون معانا رجولة ا صاحبي و تحرك بلا هضرة
ودعاتهم بينما خنساء باقا غتسطا بالضحك ورا باب الدار حتى الدموع مبقاوش باغين يحبسو لها من عينيها... اما هاجر و فدوى فتأثرو و عينيهم غرغرو و بيوتي غادا... طلع لآسر الزعف، و مشا ركب فلوطو، حتى جات هي و ركبات لور، ووهوا يشوف فيها من المراية القدامية
آسر: شيفور تاع باك انا لي باركا لور
بيوتي: معايا دري تحت السن القانوني
آسر: شفت ولاو عزاز عليك الدراري الصغار اليوم
بيوتي: انا ديما عزاز عليا
آسر(ديمارا لوطو): مزيان باش تبغي دوك لي غتولديهم
بيوتي (بعفوية): اه غنبغيهم
ملي دارت لها الهضرة لي قال فراسها و عاقت بلي لوطو تحركات و هي تبدا تصحح هضرتها بالغوات
بيوتي: لا لا انا مكنبغيش الدراري الصغار، انا مكنحملهمش، ولادي غير غنعدبهم...
لكن لا حياة لمن تنادي... شدات فمصعب بحالا غيعتقها، ساعة داك لي عولات عليه نعس... غير وقفات لوطو و هوا يبرد الما فركابي بيتي، و خرجات كتجري هازة مصعب، ولكن خسارة هاذي معندهاش ساروت بحال ايمان... لمهم جا حل لباب، و الدار غاملة ا عباد الله تقول ساكنين فيها الجنون، دخلات هازة مصعب و كدور فراسها و بدات كتعطس مع الغبرة
بيوتي: نتا بنادم نتا لي عيش فهاد الغبابر كاملة
مجوبهاش و خلاتو و بركت كتستكشف فالدار، ملي شافتو سبقها و طلع فالدروج و هي تبعو حتى دخل للبيت... دشات حطات مصعب فوق الفراش على الاقل البيت نقي... ديك لي دورات راسها بان ليها السيد حيد القاميجة و مبقا بوالو، و كان عاطيها بالضهر و هي ضور على غفلة لجيهة الحيط و وحلات ليها الهضرة
بيوتي: اسطغفر الله اش كدير ا خويا
دار شاف فيها باستغراب، دبك القادية ديال من انت من اين انت و ما هدا الكائن العجيب...
آسر: انا داخل ندوش
مسكين يالاه غيقول ليها وجدي راسك بينما نخرج و هي طير عليه و جرات شدات من باب الحمام، و نسات السيدة بلي احم احم فهمتوني...