فين داني زهري (تتمة)

الجزء 26

آسر: الى مراتي شداتها نتا لوح مرتك
ناصر: انا مليحهاش، غير داكشي لي هيا باغاه مغيكونش و صافي
آسر: و شنو خاصني نبقا كيف الشن فداري، واش ولات مكنبانش ليها
ناصر: و انا مالي فمرتك، متجيش تعود ليا
لمهم قلبوها تخصار هضرة و غوات و معيار، حتا بغاو يتشادو، و شوية حتا تقلب الموضوع غير راسو
آسر: لحد الفايت عاد كنا بيخير داخلا عليا مرتك كيف الزلط
ناصر: الحد الفايت مشي كنا فالمحكاما
و هوما يتهدنو بزربا دكشي فت فت
آسر: اه، كنفكر فرضوان لي هرب من ايدينا، قدرو انهم يشدو الاغلبية ديال العصابة
ناصر: غيشدوه بغا ولا كره، حيت البوص حاط العين عليه
آسر: صافي ا ناصر، غدا غيسالي كلشي
ناصر: انا منادمش على لي دوزتو
آسر (تبسم): عشنا حياتنا
ناصر (تبسم): اش بان ليك نرجعو لايام القتيل و الاجرام، اخر مرة اليوم نهارنا اللخر فالمافيا خلينا نعيشوه
آسر: نوض خلينا نمشيو، تابعانا عصابة جديدة، غنلقيو عليهم التحية قبل ما نمشيو
ناضو غادين يتمتعو بآخر نهار ليهم فالمافيا زعما، و بيوتي خارجا مع خنساء تشوف طبيب على قبل الوجع، واخا قرب المغرب، ولكن مشي مشكل آسر مكينش فالدار، لقاو السيبا... باركة بيوتي كتسنا الطبيبة تسالي الفحص ديالها لخنساء، تعرفو خنساء كانت باغا تمشي عند طبيب، ولكن فكرات بيوتي ان ناصر الى ساق الخبار غيصفيها ليها هي و خنساء و داك الطبيب مسكين، دكشي علاش بركات دير السبة بلي هاد الطبيبة معروفة و مزيانة و بلابلا... لمهم، خرجات الطبيبة و بركات قدام خنساء و بيوتي، و عارفين الطبا عندنا مكين غير الله يعطيك صحيحتك كيقتلوك بالدويان
الطبيبة: صحتو مزيانة الحمدلله هاد الساعة، غير هوا ضعيف بزاف، و النبض ديالو عيان شوية، مي معا هاد الادوية يكون خير نشاءلله، و رجعي عندي الشهر جاي فنفس الموعد باش نراجعو
خنساء بغات تمشي، كون مشدتها بيوتي، اويلي علاه مغتسولش مغدويش
بيوتي: سمحيلي فاشمن شهر هي دابا
الطبيبة: دابا يالاه الشهر اللول قريبا تكملو
بيوتي: و شنو الاعراض لي تقدر تحس بيهم، اولا الوجع لي كيجيها مناش
بركات خنساء باش تسنط، و بيوتي لي كتهدر تقول ولدها هي مشي ولد خنساء]
الطبيبة: غير حيت اول حمالة كيزورها الوجع مرة مرة، عاد ان صحتها على قد الحال
احياني كون تعرف هاد لي صحتها على قد الحال مشيبا راجل على قدو طولا و عرضا
انا: سمحيلنا راه اول تجربة دكشي علاش خيفا
الطبيبة: مكين حتا مشكل
انا: اه و سؤال آخر علاش كانت ديرا الفانيد ولكن مشدش ليها
الطبيبة(جاتها غريبة انني عارفا هادشي و خنساء ساكتة و كتسنط): اه كطرا بعد الخطرات كتكون الحبة مشداتش
انا: و الحبوب لي كلاتهم منبعد مغيكون عندهم حتا شي تاثير
الطبيبة: الى كانت ملي عرفات حبسات يكون خير نشاءلله، غير ترجع باش نطمانو على حالة الجنين و غيكون كلشي بخير
انا (بغيت نعود نسول): و على...
الطبيبة(مقاطعاني): كلشي بيخير بيخير، يالاه طريق السلامة نشوفك ا خنساء الشهر الجاي
حسيت بيها سربكاتنا باش تسكتني من الاسئلة، و خنساء ديرا كيف التلميدة البريئة مكدويش، و غير خرجنا و هي تبدا دوي و تسرح لها اللسان
خنساء: عيت يا ختي بغيت ناكل شوارما
انا (بصدمة): عيتي و باغا تاكلي، مال كرشك معيات، زيدي قدامي مخلياني انا كنهدر عليها بحالا تقول معندكش فمك، كتولي مأدبة ملي كنبغيو سنطيحتك منلقاوهاش
خنساء (تقلقات): و دابا علاش كتغوتي عليا انا مدرت ليك والو، انا غير خليتك تاخدي راحتك فالهضرة
انا: صافي صافي غير متقلقيش لينا هنا، زيدي ناكلو شوارما راه 7 ليل هادي مباغاش نبات فالزنقة... مشينا لمكاننا المعتاد، سناك ريان لي غير شاف خنساء بغا يسخف
ريان: خنساء كيديرا اش خبارك، غبرتي ياكما كين باس
انا: لا اخويا ريان غير تزوجات و صافي
مسكين حسيت بقلبو تكسر، ولكن خاصني نقولها لو باش ميبقاش يحلم بيها، و شكون عرف مربانا طلق من ناصر و تزوج ريان كلشي ممكن...
حليت بابا الدار و رجليا غيتفركعو عليا، الدار خاويا كتصفر، باقي مرجعش آسر، ناري هاد اليامات مبقيتش كندوي معاه، شاغلاني غير خنساء، دابا ندوي معاه اليوم مشي مشكل، اصلا هوا غيتفهمني ياك... دخلت مشات خنساء تنشرات ليا فوق السداري و انا مشيت نقلب على باش نعمر كرشي ديك الغولة كلات ليا سندويتشي و بركات عليا يالاه تعطلنا، كون كنت عارفا لحمالة غدير ليها هاكدا كون هربتها نهار العرس... طيبت ليا و لاسر شي تخربيق، و حطيت ليه حقو فوق الطبلة و انا عمرت الخبز و مشيت تجبدت حدا خنساء و شعلنا التلفازة
انا: شفتك وليتي تفرجي فالمسلسلات التركية
خنساء: منعرف مبقيتش كنحمل الهنود و الكوريين
انا: قلبي قلبي لينا شي روسوم حسن من هاد الزبل لي كيوسخ الدماغ
و قلبو الروسوم و بركو يتفرجو فيهم، المهم حتا وحدا معندها العقل، و مكينش لي يديرو ليهم. سمعات بيوتي صوة الباب كيتحل، و من الرجلين عرفات كين شي واحد مع آسر، ناضت دارت زيفها و عطات لخنساء زيفها، ساعا صدق غير ناصر، غير شافتو خنساء و بغات تغوت و منعرف اش، و شافتها بيوتي كتلون و باغا تلاح عليه و ولات كترعد