" အော်သမီးရယ် အမေ့ဘာသာ လှည်းပါ့မယ်ဆိုတာကို ... နားနားနေနေ အခန်းထဲမှာ သွားလှဲနေပါ ..... "အိမ်ထဲတွင် တံမြက်စည်းလိုက်လှည်းနေသော လင်း ကို အမေက တတွတ်တွတ်ဖြင့်ပြောနေသော်လဲ မရ ။
" တချိန်လုံးကြီး လှဲနေတော့လဲ ချွေးမထွက်ဘူး မေမေရဲ့ ... အခုလိုနည်းနည်းပါးပါး လှုပ်ရှားပေးမှာ ချွေးလေးစို့ပြီး နေလို့ပေါ့သွားမှာပေါ့ မေမေရယ် .... "
ဆရာမ ဆိုသည့်အတိုင်း အိမ်တွင်လဲ အမေကသူ့ကိုဆို ဘယ်တော့မှ ဆရာပြန်လုပ်လို့မရပေ ။ သူ့သမီးကိုပြောမနိုင်သည့်အဆုံး ထိုင်ခုံမှာသာ ဝင်ထိုင်နေတော့သည် ။
" ချွေးထွက်ရင်လဲ အဝတ်လဲဦးနော် ... တော်ကြာ ချွေးနဲ့ပြန်အအေးပတ်နေမယ် သမီး .... "
" ဟုတ်ကဲ့မေမေ ..... "
ထိုအချိန် ခြံရှေ့တည့်တည့်သို့ ပါကျဲဒိုးကားတစ်စီး ဆိုက်ရောက်လာသဖြင့် သူ့ကလေးလေး လာပြီဆိုတာ လင်း သိလိုက်ပြီမို့ မျက်နှာမှာပြုံးပန်းဝေဆာသွား၏ ။
ခဏနေတော့ ကားပေါ်မှ ရှပ်အကျီလက်ရှည် ၊ အားကစားဘောင်းဘီ ခပ်ပွပွအရှည်တစ်ထည်ကို ဝတ်ဆင်ထားသည့် ပိန်ပိန်သွယ်သွယ် အရပ်ရှည်ရှည်ဖြင့် ( ၅ ပေ ၄ လက်မကျော်ကျော် ဝန်းကျင်ခန့် ) ပိုးဟပ်ဖြူလေးတစ်ကောင် ဆင်းလာပါတော့သည် ။
မိုး မှာအခုမှ ၁၆ နှစ်တောင်မပြည့်သေးဘူးဆိုပေမဲ့ အရပ်ကတော့ သူ့အသက်အရွယ်နှင့်သူ ရှည်သည်ဟုခေါ်ရပေမည် ။ လင်း နှင့်ယှဉ်လျှင် မိုးကပင် တစ်လက်မခန့် အရပ်ပိုရှည်နေသည် ။
အရပ်ကရှည် အသားကလဲဖြူဖွေးစွတ်နေပြီး ဆံပင်အချို့က ညာဘက်မျက်လုံးပေါ်သို့ အမြဲဝဲကျလျက်ရှိ၏ ။ ပါးလေးနှစ်ဖက်က ပြည့်ပြည့်ဖောင်းဖောင်းကလေးနှင့် အနီးကပ်ကြည့်မည်ဆိုပါလျှင် သွေးကြောမျှင်စိမ်းဖန့်ဖန့်လေးတွေပင် မြင်နေရသည် ။ နက်မှောင်သည့် မျက်လုံးမျက်ခုံးကို ပိုင်ဆိုင်ထာသူ မိုး မှာ ကျောင်းမှာတော့ သူ့ကိုကျိတ် crush နေကြတဲ့လူတွေက တော်တော်ပင်များလှသည် ။
YOU ARE READING
Don't Stop Believing
Romanceငယ်ရွယ်စဉ်မှာ ဘဝရဲ့အချိုးအကွေ့အကူးအပြောင်း၌ အေးစက်သွားကာ ခပ်ချေချေ ပေပေတေတေနေတတ်သည့် ကောင်မလေးတစ်ယောက် ... ။ " နွေးထွေးမှုဆိုတာ 'မိုး' ရဲ့ဘဝအတွက်တော့ နွေခေါင်ခေါင်မှာ နှင်းပွင့်လေးတွေကို စောင့်ဆိုင်းရသလိုပါပဲ .... " ( မိုးဝဿန်လွင် / Hanna Keiko ) ...