May dahilan kung bakit ang ila’y itinatago ang pinagdaraanan
Sino bang nagnanais na ito’y sarilinin at mag-isang labanan
Hindi lahat ng tao’y mababaw lang ang pinaghuhugutan
Marami ang malalim at pawang walang kasagutan
Minsa’y iniisip, ayaw maging sanhi ng paghihirap
Ng mga tao sa paligid na batid rin na may hinaharap
Kaya pilit nilulusutan at nagsasariling sikap
Nagpapanggap na ayos lang kahit kailangan ng yakap
Ang iba sa panghuhusga ay natatakot
Kaya piniling manahimik na lang at lumukot
Kalungkutan at dilim ma’y bumabalot
Hayon at mag-isang nakabaluktot
May ibang sadyang mapag-lihim
Hindi lang talaga nais ipaalam ang dilim
Sitwasyon ma’y lubha nang nakaririmarim
Mahirap intindihin ngunit naroo’t nagpapalamon sa lagim
May bilang na nahihiya
Dahil iniisip na wala namang wawa
Hirap at pagkabagabag na nadarama
Pinababayaan at binabalewala
Ang pagiging malakas at matatag na pagkakakilala
Ayaw sirain at baka tingin ay mag-iba
Tunay na nararamdama’y pilit ipinagkakaila
Upang mapagtakpan ang pagiging mahina
Ang mga piniling buksan ang sarili
May ilan na tunay na nagsisisi
Mga nilapita’y tila ‘di alam ang sinasabi
Lalong naguluhan sa halip na mapabuti
Okay lang ‘yan! Linya ng taong ‘di naiintindihan
Kung ano ang hirap at bigat ng pinagdaraanan
Marahil kasi’y hindi pa naman nararating at nararanasan
Itong sitwasyong kinalulugmukan at pilit tinatakasan
***WAKAS***
BINABASA MO ANG
Likhang Tula (COMPLETED)
PoetryKung puso'y nag-hahanap ng kaunting kurot Ito ang akdang sa kalooban mo'y lalapirot Mababatid na buhay ay hindi biro at masalimuot Sa reyalidad tiyak ika'y mapapahugot Sa koleksyong ito'y napapaloob ang mga madamdaming salaysay Ng mga kaganapang nan...
