امرأة في الاربعين

البارت (٢٦)

النصف هو حياة لم تعشها،،،

و كلمة لم تقلها ،،،،

وابتسامه اجلتها،،،،

و حب لم تصل إليه،،،،

‏ترى كم نصفا فقدناه إلى اليوم ..؟!!

#نورا

هلو حبايبي 😘😍 مااتحملت ماانزل بارت الكم احبكم😘😍

.
.
.
يوم زفافي....

بتاريخ١٦/١٠/٢٠٠٥.

وايضا تاريخ لحدث آخر لفرحة غمرت گلبي..

واني بيومها اصلا جنت مافرحانة بزواجي ولا

اي شي...

غييييير الى اللحظة الي سمعت ابتهال...

تكعدني من النوم...

من الايام الي ماانساها بحياتى يمكن تكولون ومنو ينسى يوم زفافه..

لكن الوضع بالنسبة الي كان يختلف..

والذكريات الي بي تختلف...

ورة ماصليت الفجر واستمعت لتراتيل قراءة القرآن الي كان يرتلها بابا...

رحت لغرفتي ونمت كلت خلي

اودع فراشي هم وانام عليه لاخر مرة 😢.

ابتهال... لج كومي هيو كومي..

فتحت عيوني على هز متن من ابتهال تركص وتصفك عبالي فرحانة الي...

كتلها... والله انتي بطرانة خليني انام ساعة ب٧

هسة مالحكت انام ساعتين بعد وكت للصالون

خليني انام..

ابتهال... ولج كومي ياصالون..لج طلع الغالي الغالي من الحبس والله وسواها بابا وطلعه من حلك السبع لج كومي 💃💃

اني باستغراب لج منو الي طلع ؟؟وحطيت ايدية على حلگي بس لاظني صحيح🙊.

ابتهال... الغالي بعد بيتي... تحجي وتركص
وتهلهل...

اني... هسة غير تحجي فيفي عبدو.. 😤

ابتهال... شبيج من هسة طفيتي من الرئيسي
اكولج الغالي شعدنا من غالي غير اخونا الجبير
لج مثنى طالع البارحة بليل ب١٢.

وبابا ورة ماطالع وية نضال لبيتهم مخابرته
ماما وكايلتله ابنك جابه هسة المترجم..

ورايح بابا متخبل همة جانوا كايلين راح
يطلع لان هذا الضابط الامريكي كايل لبابا قبل
يومين بس مامتوقع بابا يفرجون عنه بسرعة.

اني... مااعرف اوصف شعوري فرح على
حزن على بختى الاسود..

باركت لابتهال طلعة مثنى ..وكتلها.. ها راح
ترحين لاهلج تشوفين مثنى..؟

كالت... لا هو راح يجي كال بابا وياه حتى
يسلم على عمي وهم يودعج شوفي الصدف

يعني بنفس يوم طلعته انتي زفتج اووف
يقهر اشلون راح يتحمل اخوية 😢