أنتَِ نوري

الفصل العشرون

فى اليوم التالى:

دخلت القصر وإتفاجأت بإللى مستنياها...

مليكه بفرحه وهى بتجرى عليها:"روكا."

رقيه وهى بتحضنها:"قلب روكا."

مليكه:"وحشتينى أوى."

رقيه:"وإنتى كمان وحشتينى جدا جدا جدا قد الكون ده كله."

رجاء وهى بتقرب منها:"أهلا بيكى يابنتى."

رقيه بإبتسامه:"أهلا بحضرتك يا مدام رجاء."

بدأت تدور عليه بعيونها...

رجاء بإبتسامه وهى ملاحظه نظراتها:"سيف بيه فى الشركة، هيرجع على بليل."

رقيه بإحراج:"شكرا."

مليكه وهى بتمسكها من إيدها:"يلا يا روكا نلعب ، بابا جابلى عرايس كتير ،عايزاكى تلعبى معايا بيهم."

رقيه بضحكه خفيفه:"حاضر ياحبيبتى ، بعد إذنك يا مدام رجاء."

رجاء:"إتفضلى يا حبيبتى."

طلعت معاها على أوضتها وبدأوا يلعبوا ويتكلموا كتير مع بعض عن أجازة كل واحده فيهم...

مليكه بتأفف:"المدرسه هتبدأ بكره ، وأنا مش عايزه أروحها."

رقيه:"ياحبيبتى ماتقوليش كده ، لازم تروحى المدرسه عشان تبقى شاطره وتطلعى من الأوائل."

مليكه:"طيب."

كانت لسه هتتكلم سمعوا صوت خبط خفيف على الباب ، وبعدها الباب إتفتح...عيونهم جات فى عيون بعض ، نظراتهم لبعض كانت كلها لهفه وشوق وحب كبير...الحب إللى كان بينموا فى كل ثانيه وهما بعيد عن بعض... كل واحد فيهم كان نفسه يجري على التانى بس إللى كان موقفهم وجودها...قطع لحظة تأملهم صوتها...

مليكه بفرحه وهى بتجرى عليه:"بابا."

شالها من على الأرض وحضنها بشده...

سيف بإستفسار:"عامله إيه ياروح بابا؟"

ملكيه:"أنا كويسه ، شوف...روكا جات أهيه ومسابتنيش."

سيف بهيام وهو بيبص لرقيه:"عمرها ماهتمشى ... أبدا."

مليكه بفرحه:"يعنى روكا هتعيش معانا علطول؟"

سيف:"أكيد ، إن شاء الله هتفضل معانا علطول."

لوهله كانت فرحانه بكلامه بس إفتكرت الواقع إللى هى عايشه فيه ، وخاصة إن فرحها على أحمد بعد شهور قليله....قطع تفكيرها صوته...

سيف بإبتسامه:"صحيح يا رقيه ، بمناسبة إن خلاص الدراسه بدأت ، كنت حابب أقولك عندى فرح واحد صاحبى بعد أسبوع فى إسكندريه ، وهاخد مليكه معايا .. وده طبعا معناه إنك هتيجى معانا وهنسافر من بكره لإنهم عازمينا على أسبوع هناك قبل الفرح بتاعه يعنى."