أنتَِ نوري

الفصل السادس والثلاثون

تم الإعلان عن إنتهاء وقت الإمتحان ، إتنهدت بإرتياح وسلمت ورقة الإجابه....خرحت من الكليه وإتفاجأت بسيف إللى واقف مستنيها عند عربيته...قربت منه..

رقيه:"سيف."

مردش عليها بس لاحظت شروده...

رقيه وهى بتحط إيدها على كتفه:"حبيبى."

خرج من شروده وبصلها وبيتأملها بس مابيتكلمش...

رقيه بإبتسامه:"جيت ليه؟"

سيف بإبتسامه هادية:"مافيش ، كنت حابب أعملهالك مفاجأه ونروح القصر مع بعض."

رقيه:"بجد؟"

سيف:"اه بجد ، طمنينى عملتى إيه فى الإمتحان؟"

رقيه:"الحمدلله حليت كويس."

سيف بإبتسامة:"طب كويس ، يلا نركب بقا عشان هنمشى."

رقيه:"ماشى."

ركبت العربيه وهو ركب وبدأ يسوق والحرس إتحركوا وراه...كانت سرحانه فى الطريق وبتفكر تخرج من إللى هى فيه إزاى ، بتحاول تجيب حلول وحجج عشان تقنع بيها سيف ، وفى نفس الوقت مش عارفه هتعمل إيه بعد كده أو هتحكيله إزاى وخاصة إن سيف إن عمره ماهيسامحها ده غير إنها شافت وشه التانى قبل كده مع غيرها ، دموعها نزلت من غير ماتحس مسحتهم بسرعه وبصت لسيف إللى بيسوق لقته مش مركز معاها أصلا كإنه فى دنيا تانيه...إتنهدت بإرتياح لإنه مشافش دموعها بعد فتره بسيطه من الصمت التام وصلوا للقصر...نزلت من العربيه وهو كمان نزل من العربيه ، لاحظت إنه ماسك ورقه فى إيده بس قررت إنها ماتركزش دخلت القصر ولسه هتطلع على السلالم قابلت مليكه...

مليكه بفرحه وهى بتقرب منها:"ماما ، عملتى إيه فى الإمتحان؟"

رقيه:"كان حلو أوى يا مليكه."

مليكه:"أنا خليت كل إللى بيشتغلوا هنا فى القصر يدعولك ياماما."

رقيه وهى بتحضنها:"ربنا يخليكى ليا يامليكه."

مليكه:"بحبك ياماما."

رقيه:"وأنا كمان بحبك ياروح ماما."

مليكه:"تعالى معايا عشان نلعب و........."

سيف وهو بيقاطعها:"لا ، رقيه هتطلع تاخد شاور عشان هى تعبانه شويه من الإمتحان."

مليكه:"بس....."

سيف بأمر وهو بيقاطعها:"من غير بس ، يلا يارقيه إطلعى."

بصتله بإستغراب وإستغربت أكتر من نبرة صوته ، بس قررت إنها تطلع وتاخد شاور...أخدت هدوم من دولابها ودخلت الحمام...دخل الأوضة بتاعتها وقفل الباب براحة ، راح لشنطة هدومها إللى هى جهزتها قبل ماتنام عشان السفر وبدأ يدور فيها لحد ما لقى الحاجه إللى كسرت قلبه وفى نفس الوقت خلت الغضب يعمى عينيه...لقى دبلة وخاتم ومحبس ، الدبله مكتوب جواها إسم "أحمد" ، بص للورقه إللى فى إيده إللى إتضح إنها مش مجرد ورقه ، كانت دعوة فرح....