أنتَِ نوري

الفصل الخامس عشر

فى اليوم التالى:

كانت بتسرحلها شعرها وسرحانه  بتغنى وبتدندن مع نفسها...

رقيه:"إنت الضحكه الحلوه فى دنيا مابتضحكليش غير بالصدفه ، لو حسيت بالبرد فى ثانيه لما عينيك تحضنى أنا بدفى ، لو..."

مليكه بإبتسامه طفوليه وهى بتقاطعها:"حلوه الأغنيه دى أوى ياروكا."

رقيه بإستيعاب:"هاه؟"

مليكه:"بقولك حلوه ياروكا الأغنيه إللى بتغنيها."

رقيه:"اه ، سرحت شويه معلش."

مليكه:"مافيش مشكله."

كملت تسريح ليها..

مليكه بحزن:"أنا آسفه يا روكا على إللى حصل إمبارح من بابا ، أنا مش عارفه هو زعقلك ليه؟"

رقيه وهى بتبوس راسها:"ماتقوليش كده ، سيف بيه بس كان متضايق فخرج عصبيته عليا وبعدين هو إعتذرلى خلاص."

مليكه بفرحه:"بجد؟"

رقيه:"اه بجد."

مليكه:"أصل أنا فكرته هيفضل زعلان عشان أونكل مروان معاكى علطول."

رقيه بإستفسار:"مش فاهمه؟"

مليكه بتوضيح طفولي:"لما أنا وبابا كنا بنلعب مع بعض إمبارح كان بيبص عليكى وإنتى بتتكلمى مع أونكل مروان، كان متضايق أوى، يمكن إتضايق عشان مش بتلعبى معانا وسيبانا وواقفه مع أونكل مروان؟"

رقيه بإستغراب:"هيتضايق عشان واقفه معاه وسيباكم ليه؟"

مليكه:"مش عارفه بس أنا عموما بتضايق لما حد بياخد منى ألعابى؛ فبابا كان زيي كده بالظبط إمبارح."

لوهله جه على بالها إن سيف يكون بيحبها بس شالت الفكره دى من بالها...

رقيه بينها وبين نفسها:"مستحيل يحبنى."

مليكه:"رقيه."

رقيه:"هاه؟"

مليكه:"أنا الفترة دي عندى إمتحانات كتيير أوى."

رقيه:"وأنا كمان عندى إمتحانات كتير أوى."

مليكه بفرحه:"يعنى هنذاكر مع بعض؟"

رقيه بتشجيع:"أكيد ياقلب رقيه ، هنذاكر مع بعض ونطلع من الأوائل كمان."

سيف وهو بيدخل الأوضه:"وأنا هساعدكم."

مليكه بفرحه وهى بتجرى عليه:"بابا."

سيف وهو بيحضنها:"قلب بابا."

رقيه بإستفسار:"حضرتك هنا من إمتى؟"

سيف بإبتسامه:"أنا لسه واصل حالا ، يادوب كنت لسه هخبط سمعتكم بتتكلموا عن الإمتحانات."

رقيه:" حمدالله على السلامه."

سيف وهو بيبص في عينيها:"الله يسلمك."