أنتَِ نوري

الفصل التاسع عشر

فى اليوم التالى:

كانت قاعده معاهم وبيتكلموا...

هناء:"ربنا يبارك فيكى يابنتى ، الفلوس إللى كنتى بعتيهالنا ، كفتنا وزياده كمان ، ده حتى باقى منهم."

رقيه وهى بتبوس راسها:"ويباركلى فيكى يا ماما."

سمير بإستفسار:"هتعملى إيه بقا فى الترم التانى؟ إنتى مش معاكى فلوس يابنتى ، هتصرفى على نفسك إزاى؟"

رقيه:"ياحبيبى هتتدبر من عند ربنا ، ماتقلقش عليا ، هفضل قاعده عند نهى *إتنهدت بحزن وكملت كلامها* نهى كويسه وبتحبنى جدا."

سمير:"ونعم بالله ، ربنا يحبب فيكى خلقه كمان وكمان يارب."

رقيه:"يا رب ، أنا بقا هقوم أعملكم غدا إنما إيه هتاكلوا صوابعكم وراه."

سمير:"تصدقى فعلا وحشنا أكلك."

رقيه بغرور:"لازم طبعا يوحشكم أكلى ، ده أنا بعمل أكل مابيتعملش هنا فى البلد."

ضحكوا على كلامها وراحت المطبخ وبدأت تحضر الأكل....

................................

فى شركة سيف الدمنهورى:

سيف بعصبيه وهو بيضرب إيده بقوه على المكتبه:"إجرى بسرعه هاتى الورق إللى يخص الصفقه دى."

نهال بفزع:"حاضر يا سيف بيه."

خرجت بسرعه من المكتب وأخدت الورق ورجعت تانى...كان ماشى رايح جاى فى المكتب بتاعه وبيزفر بضيق...

نهال وهى بتبلع ريقها بخوف:"إتفضل الورق ياسيف بيه."

سيف بعصبيه زائده:"سبيهم وإطلعى بره."

سابت الورق على المكتب وخرجت...مسك الورق وبدأ يراجعه مره ورا التانيه لحد ماقرر القرار الأخير...

سيف بغضب مكتوم:"مش أنا إللى يتلعب بيا."

مسك موبايله إللى على المكتب وبدأ يعمل مكالمه...

سيف بغضب:"أنا عايز إللى إسمه عصام الهنداوى ده يكون قدامى حالا يا صبرى ، تجيبهولى من المكان إللى هو فيه ، حتى لو هو موجود تحت الأرض."

صبرى وهو بيبلع ريقه بخوف:"حاضر يا بيه."

قفل المكالمه وحاول يتحكم فى أعصابه.....

سيف بسخريه مع غضب:"أنا يا عصام ال*** تضحك عليا ، إما وريتك."

قطع تفكيره صوت رنة موبايله...

سيف:"ألو."

؟؟:"تم تنفيذ أوامرك ياسيف بيه."

سيف:"برافو عليكم."

قفل المكالمه وضحك ضحكه خفيفه ... ومستنيها تكلمه...

.......................

كانت قاعده بتروق أوضتها وفجأه سمعت صوت وصول رساله على موبايلها...إبتسمت على إعتقادها إنه سيف...فتحت الرساله وإتصدمت من إللى قدامها...