نصيب الفهد ل صفيه صالح

٩

٩

** تجلس هنا وسلمي في كافتريا الجامعه ويجلس ماجد بجانبهم علي ترابيزه أخري

هنا : يا سلمي كل اللي حصل كان غصب عني ما ينفعش تزعلي مني وانتي ماتعرفيش ظروفي ايه

سلمي _بزعل : ظروف ايه اللي تخليكي تخبي عني كل دا، طول الوقت بقولك انتي مرتبطه بحد  تقولي لاء إتقدملك كذا عريس وترفضيه وأخرهم كريم واقولك عرفيني بتفكري في ايه ما بترضيش تقولي، يبقي احنا كدا اصحاب ازاي

هنا _بتردد: جوازي من فهد مكانش متخطط له احنا فعلا كنا بنحب بعض من زمان وانا مكنتش بحب اتكلم عنه عشان…

سلمي : عشان ايه؟

هنا :عشان بابا ماكنش موافق انتي عارفه ان فيه بينا وبين خالتي خلافات من زمان بسبب نصيب ماما وورثها فأضطرينا نتجوز من وراه  

سلمي _بحزن :  عشان كده تعب ودخل المستشفى،، طب وانتي ازاي يجيلك قلب تكسري بخاطره

هنا : مكانش فيه حل تاني وحبي ل فهد سيطر عليا

سلمي :  ليكي حق الصراحه تحبيه دا البنات اتهبلوا عليه لما شافوه معاكي ماشوفتيش نظراتهم و هو شكله كده جامد وبيحبك وبيغير عليكي وكمان ممشي معاكي بودي جارد عشان يحميكي ليكي حق تعملي اي حاجه عشان تحافظي علي حبه وجنونه بيكي

هنا : هو باين عليه مجنون فعلاً؟

سلمي : طبعاً دا باين جداً هو لو متجوز جوازه عاديه كان هيبان عليه لكن انا شايفه انه مستحملش لمسه كريم وكان هيولع فيه الغيره حاجه مايحسش بيها غير اللي بيحب زيي..

هنا : وانتي هتفضلي تحبي و تغيري بصمت لغايه امتي؟

سلمي _ تتنهد : مش عارفه نصيبي يا هنا

هنا : قوليله

سلمي : مقدرش اروح اقوله اني بحبه هو مسيره يعرف ويحس بيا المهم انتي عيشي حياتك انتي وجوزك هو يستاهل انه يتحب **صمتت هنا ونظرت ل سلمي وماجد وشردت قليلاً وقالت لنفسها وهي تتذكر بعض المواقف التي حدثت بينها وبين فهد

هنا _لنفسها : هو فعلا يستاهل يا هنا انه يتحب؟ حنيته اللي بتطلع منه ساعات تتحب،، وقسوته وغيرته ورجولته تتحب برضه،، نظراته وهدوئه يتحبوا… يبقي يستاهل فعلا يا هنا ولا لاء؟؟

** ظهرا في مكتب صادق بشركته يجلس فهد مع صادق الذي كان سعيدا

صادق : الخطوه دي بجد ممتازه يا فهد الورق طلع من عند الناس بإيد ساحر كدا أقدر اتفق علي أرض المصنع الجديد قبل اي حد

فهد : مبروك عليك يا باشا

صادق: انا مش هسيبك يا فهد ليك عندي مكافأه حلوه

فهد : كتر ألف خيرك

صادق_ بخبث :  انت مالك فيك ايه الجواز لحق ينكد عليك هي وحشه للدرجادي ؟