حبيبه

#حبيبه 🦋 22

#البارت الثاني والعشرون

كنت حاطه اكتاباتي قدامي ونقرأ ومش امدوره الدنيا لي برا كان كل تركيزي في الإمتحان لاني خايفه منه

ويه،، نا عندي عطله توا
وليد ،، معناها ايسير منها المشيه ونا تو نقنع محمد
ويه ،، حبيبي انت احكي مع ماما وخلي نجوى هي لي تكلم محمد
وليد ،، تمام ياعمري كيف ما تبي

سلمى ،، شن قالك وليد
ويه ،، كيف ماقلتيلي قتله وقال باهي بس معش في وقت راء
سلمى ،، امتى يبي ايجي
ويه ،، بعد العصر ، نخش اندير كيكه عشان ندوش قبل ما يجي
سلمى ،، انتي خلطيها وخشي ونا نكمل لي فيدي ونصبيلك عليها
ويه ،، احسن اخت
سلمى ،، راء تسمعك بيبا
ويه، ، امتحانات والله ماعاد تسمع حاجه
سلمى ،، الثلاثاء آخر ماده هانت

ماما ،، كانت قاعده اتخيط في فساتين لبنات اصغار
ماما يابيبا يابيبا
نا ،، مكنتش نسمع فيها عشان انصلي
سلمى ،، جتها تجري ، شن في ياماما كنك
ماما ،، نبي بيبا اتجي اتشوف الفستان الأول كملته
سلمى ،، رفعت الفستان ، واو ياماما خيال مش عادي
ماما ،، بيبا عندها مستقبل فالتصميم
سلمى ،، ياريت حالتنا افضل كنا خلينها تخش معهد تصميم والخياطه ، بس وعد مني ياماما اول مايقعد عندي نخليها اتخش على احسابي
ماما ،، ربي يحفظكن لبعضكن
وقعدن سلمى فجنب ماما تهدرز لعند سمعن الباب ايدق
سلمى ،، الباب يا ويه
ويه ،، هيا هيا وصبت على مراية المدخل اتبحت في روحه وطلعت فتحت
وليد ،، شن جوك ومد يدا لها
ويه ،، اهلين ياعمري
وليد ،، انتي لي عمري والله ، ومد الكيس لي فيدا لها
ويه، ، عليش امتعب روحك الشوكلاطه لي عندي ماكملتش ولا تبيني نقعد دبه
وليد ،، ردي بالك ، نبيكي هك ديما ، هذي عطيها ل بيبا
عشان الامتحانات
ويه ،، يعني حاسب حتى بيبا
وليد ،، مش بنت عمي وأخت حبيبتي اكيد بنحسبها
ويه، ، كل يوم انحبك أكثر من قبل
وليد ،، ونا نبيكي اتحبيني

ماما ،، اختك كنها معش خشت
سلمى ،، اكيد وليد لي جاء
ماما ،، باهي صبي شوفيها
سلمى ،، هيا ، طلعت سلمى اتكلم في ويه

سلمى ،، احم يالله يالله يلي هنا
وليد ،، هههههههه فوتي بنت عمي مافي حدا
سلمى و ويه هههههههههه
وليد ،، سالك معايا جو باب الحاره
سلمى ،، قتل
وليد ،، باهي شن تبي جايه
سلمى ،، عمتك تسأل من لي جاء خش راء تطلع عليك هي ويبقي بوعجيله ليبي لا باب حاره لا سوء
وليد ،، لا كان بوعجيله معناها خلوني نطلع من توا
ويه ،، صار هكي يا اودي
وليد ،، تي معاكي ع الموت وحياتك ياعمري
سلمى ،، احم شكلك تبي اتخشلنا ع التركي خشو قدامي
وليد ،، هيا

صافي كان قاعد في المخطط بتاع الفيلات هو وحوده
حوده ،، طول معتز المره هذي
صافي ،، معتز قال مش جاي قبل ما يشحن المواد الصحيه ويتاكد انها طلعت فالبخاره
حوده ،، اها عشان هك
رن تليفون صافي وهم يحكو
صافي ،، ايو يا تركي
معتز ،، وحياتك إلا ليبي اصلي
صافي ،، تي كنك ناقم يا راجل
معتز ،، تي فكني من جد اصلهم ل🚫 مامعروف قرعة بوهم من وين
صافي ، ، هههههههههه شكلك غاطس
معتز ،، تي حشاني من المزفر
صافي ،، مفيش كيف الوطني وبالذات كان تماء من الفاميليه
معتز ،، تعبر عن شعورك طبعآ انت
صافي ،، هههه نعلي ملي فاهمني
معتز ،، عيب يا نصي ، اسمع احتمال بكره فلليل المواد الصحيه تطلع
شن صار في الرخام وصل ولله مازال
صافي ،، وصل امس وقعدت نا وحوده لعند نزلو كله
وفالصبح
معتز تمام سلم على الاهل ، وأسأل حوده ما يبي شي انجيبه له
صافي ،، تو نعطي لك تحكي امعاه اهو قاعد جنبي
المهم انت الخميس اتكون هنا
معتز ،، ان شاءالله ،