#حبيبه 🦋
#البارت_التاسع_و_السبعون
البارت يفوز بااسم #جبر_الخواطر🍂
🍃اللهم فرحه تزيل الهموم و تُبكي العيُون و ترقص القلوب وتمحو ما مضي من هموم الحياه 💙🤍🍃
الصبايا لي فالحوش وماما وعماتي منتبهنش لنجوى بعد عدت
والبنات لي شافنها مبنش ايقولن لعند نطمنو عليها
معتز رفع فونه ورن على وصال
وصال ،، هضا معتز كان ماتقعد سايره حاجه فنجوى
ايمان حطت يدها على قلبها وماتكلمتس
ونا بحتت في ايمان لي كان وجها اصفر ردي ياسولي فيش اترجي
وصال،، الو
معتز ،، ايوه ياسولي
وصال ،، اهلين
معتز ،، شن الجو
وصال ،، تمام
نا قعدت انشيرلها عشان تفتح السبيكر لكن هي مبتش تفتحه
معتز ،، بيبا معاكي
وصال ،، اها عليش شن في
معتز ،، لا اطمني مافي شي غير نبي نسلم عليها
وصال تنفست وحطت يدها على قلبها
تبيها اهي نعطيها لك
معتز ،، لا نا نبي نخش خليها اتجيني فالمربوعه
وصال ،، باهي
معتز ،، شوفيلي الطريق
وصال ،، حاضر
معتز ،، امنوره
وصكر
نا ،، كنه
وصال، ، يبي يشوفك
ايمان ،، وكنه مارن عليكي
نا ،، فوني امصكر من يوم العزاء
ايمان، ، باهي رنن على سلمى اسالن على جيجي
نا ،، رني انتي
ايمان ،، تو انرن على محمد معندي عليش امطولته
حتى هم ماسمطهم مافيهم واحد رن
كانت ايمان تحكي وهي منفعله
رن الفون فيدها وكانت ويه
ايمان ،، حي اهي ويه رنت
وصال ،، ردي ردي بسرعه
ايمان ،، ها ويه شن صار
ويه وهي تبكي نجوي سلمت نجوى سلمت وجابت ابنيه
جابت مني جابتلنا مني
ايمان وهي دموعها ينزلن الحمدلله ياربي الحمدلله على سلامتها ومبروك عليكم مني
نا وسولي بحتنا فبعضنا وحضنا بعضنا وبكينا
بكيت الاخت لي سمو عليها بكيت الام لي ماعاد اتعوض بكيت البنت لي تمت حسره فقلوبنا كلنا
طلعنا عليهم برا وايمان قالت ان نجوى سلمت وجابت مني
كل لي فالحوش افرح ع سلامتها
قعدو ايباركو لعميمه سليمه وماما
صبت ماما هي وعميمه فاطمه ودرالها عشاء عشان يشيلو لها رغم ان محمد حطها فعياده بس ماما اصرت العشاء يمشيلها
روحو كلهم من عندها وكانت فرحتنا بجية مني كبيره لنا كلنا
ماما دمعتها اليوم هضا ماكفتش بكل
ونا كنت متوتره عشان نبي نطالع على معتز
وصال ،، هيا اطلعي
نا ،، باهي هو وين
ايمان ،، فالصور من لاوراء بعد جاو الرجاله طلع لصور
نا ،، باهي تو نطلع هيا
كنت امدوشه ولابسه بنطلون وقميص وحاطه اسكافه بتاع ماما على كتوفي لاني مجففتش اشعري
ورافعته فوق كوده
سلحت السليبر ولبست شوز دانه لقيته فمدخل الصاله وطلعت
مشيت شوره وكنت انبحت في اصبعي وقارنه حواجبي
لاني شفت فيها جرح
استغربت امتى وكيف انجرحت ونا مش حاسه بروحي 💔
معتز كان امقمعز امنزل راسه وحاط ايديه على ركابه وشابك ايديه فبعضهن ويهز فرجله
سمع صوت خطوت كراعيا رفع راسه
فنفس الوقت لي نا كنت نمشي ونبحت فصبعي
معتز رفع راسه وبعد شافني صبالي
فنفس الوقت لي نا بحتت فيه فيه
قربت منه وصبيت قدامه
معتز ،، عزنا واحد
نا ،، قدر الله وما شاءفعل
ومديت يدي له عشان نسلم عليه
هو مسك يدي وكرني لحضنه
وحط يدا ورا ارقبتي وباسني على راسي
والنعم بالله
شن دايره بشتي
نا ،، الحمدلله
معتز ،، نبيك قويه ومومنه بقضاء الله وقدره
نا ،، غمضت اعيوني ونزلت دمعتي ونا مزلت فحضنه
كنت نشم في ريحته وحاسه بدفى صدره لي نحس بالامان كل مانكون فيه
معتز حس بيا نبكي
بشتي عليش لبكاء توا
ونا حسيت بنبض قلبه كيف قعد سريع
معرفتش عشان نا بكيت ولا عشان نا فحضنه
كنت مش قادره انرد عليه
معتز ،، نا نقول عليك قويه وقد روحك وعارف انك مومنه بالله وهضا شي مكتوب علينا ولا مفر من حكم لله
نا ،، ونعم بالله بس الموت شينه
معتز ،، الموت حق ياعيوني
عشان خاطر مني معش تبكي والله ابكاكم هضا ايعذب فيها
نا ،، غصبن عني
معتز ،، عارف ان الفراق هو لي صعب ومني مش اي حد
مني عشانها بكو رجاله بشنابهم
احمدو ربكم انها سيبتلكم اعويله تذكروهم بيها وكل الناس ترحملها وتدعيلها بالخير
نا ،، الحمدلله
معتز ،، كنت مشغول عليكي ونرن على امي وخالتي نسال فيهن عليك
نا وخرت من حضنه وقعدت انبحت فيه
معتز ،، شنو ياروحي شن تبي اتقولي
نا ،، شيلني لها ياعيوني شيلني لمني
معتز،، مش باهي ياروحي
وحط ايديه على وجهي وقعد يمسحلي فدموعي
وكان يحكي بشواش
وهذي كانت اول مره انشوف فيه معتز مش امواسي لحيته
ومش امعدل على شكله
نا ،، المره هذي بس رايفت عليها
معتز ،، حاضر لو الشي هضا ايريحك حاضر
بس اوعديني تقعدي قويه وما تبكيش
نا ،، هزيت راسي
معتز قرب وباسني من جبيني
ورفع يدي وباسها
تسلملي مراتي لي تسمع فالكلام
نا ابتسمت عشان كلمته
معتز ،، منبيش انشوف ادموعك لانه يوجعلي فقلبي
نا ،، سلامة قلبك
معتز ،، كيف حال خالتي
نا ،، فرحانه بجيت مني محمد
معتز ،، رنيت على وليد وحتى هو فرحان
نا ،، اها عدا مع بابا وحوده ويه
معتز ،، اها
تبي تمشي شورهم انشيلك
نا ،، محمد منع عليها الزياره
قال محد ايجي
معتز ،، خايف ع البرنسيس الجديده
نا ،، لا خايف على نجوى من كثر ما يحبها
معتز ،، ونا نخاف عليكي ونحبك ونبيش انشوف دمعتك لو شن صار
تاكدي اني مبيتش انخش ولا انرن عليكي عشان مانشوفكش وانتي منهاره ولا تبكي
نا ،، ❤
معتز ،، صدقيني اكثر شي شاغلني كنتي انتي
وبعد شفتك امبدري تريحت
...........................
محمد خش على نجوى لي كانت مزالت على سرير الولاده
عدا شورها والممرضات بعد شافنهم ابتسمن وطلعن وسيبنهم وحدهم
محمد قرب منها ونزل عليها بجسمه باسها على راسها بوسه طويله كلها حب
رفع راسه ورد باسها على اعيونها لي كانن مليانات ادموع وعلى خدودها وعلى ف😘 بوسه كلها حب
محمد ،، الحمدلله على سلامتك ياغاليه
نجوى وهي داهشه من البكاء
الله يسلمك
محمد ،، مبروك علينا( الموهوبه)
نجوى ،، ابتسمت من بين ادموعها
محمد ،، شدي حيلك ع الاربعين نبي توام راء .
نجوى ،، شد عينك نا هذي وبعدها خلاص شعفه توبه
محمد ،، غير توا تو نحقك وانتي تعال يامادي
وكان ايقلد في صوتها
نجوى ،، باهي يامادي باهي
محمد ،، اعيون مادي انتي وقلبه ربي يخليكي لي
على خشت سلمى عليهم فالغرفه وهي تنحنح
محمد ،، اهي جتك دكتورتك
سلمى لي كانن اعيونها حمر من البكاء ابتسمت وهي شايفه الفرحه في اعيون خوها وسندها
وتمنت لو قدرت اتشوف نفسها فعيون يوسف ومني
بس قدر الله وما شاء فعل
محمد ،، شنو يادكتور نقدرو نطلعها
سلمى ،، اليله من الافضل اتبات هنا
وبكره الصبح تطلع
محمد ،، تمام بكل منها اتريح وترقد
سلمى ،، ابتسمت
تمام معناها نخليهم يحطو مني فالحضانه ونجوى اتريح اليله
محمد ،، تمام ونا تو نقعد معاهم
سلمى ،، ويه قاعده مفش داعي اتعبك روحك
محمدة،، تعبها راحه ام مني
سلمى ،، تستاهل كل خير انجيوه والف الحمدلله على سلامتها الف حمدىوشكر لك ياربي
نجوى ،، كان ما انتي معايا راء والله رحت فيها نا والبيبي
سلمى ،، مادرت شي انتي خيتي ياهبله
................
نقلو نجوى لغرفه خاصه بيها
وسلمى شطفتها ولبستها ترينق (بجامة بنطلون)جديده
وحطوها فغرفتها
بابا دق ع باب الغرفه
وخشت ويه هي الاولي
محمد بعد شافهم عدا شور الباب وقاللهم تفضلو
نجوى تبي تقعز بعد سمعت صوت بابا خاش
بابا ،، السلام عليكم
كلهم وعليكم السلام
بابا ،، خليكي متريحه يابنتي والف الحمدلله على سلامتك
نجوى ابتسمت الله يسلمك
ويه قدمت شورها حمدتلها على سلامتها
محمد ،، شن رايك في مني ياحاج
بابا ،، ان شاءالله تفرح بيها وبعويلتها وان شاءالله هي اطول عمر من سميتها
كلهم ،، امين
بابا ،، ردو بالكم حد ايزعلها ولا نسمع صوت بكائها
هذي بنتي لي ربي عطاها لنا فبدال لي خذها
كلهم ،، الله يرحمها
ويه انسحبت من جنبهم وطلعت شور وليد لي كان قاعد برا
ويه ،، صبت فالممر وكانت اتبحت فيه وهو مش فاطنلها
كان ماسك فونه ويحرك فيه
ويه ياربي يطلع لي فبالي صح يارب
ياربي ياربي ما تخيب ظني ولا املي فيك يارب
يارب
كانت تمشي شوره وتدعي فسرها
كانت تتمنى لي حاسه بيه من اول ما شافت الفرحه فعيونه وهو يبحت في سلمى وهي شايله مني وماشيه بيها شور محمد وبابا
كانن اعيون ايدلن على ان شايفها ويتحرك مع حركتهن
كانت امكذبه روحها بس توا وهو ماسك الفون ويحرك فشاشته زاد عندها الامل
صبت قدامه وقالت
وليدي شايفني صح 🥺
وليد لا شعوريآ وبدون وعي منه لشي لي قاله
اكيد شايفك ومش شايف غيرك اصلآ
نبض ويه وصل للمليون💗
تحركت لليمين اشوي
تحركت اعيون وليد امعاها
ردت لليسار ردن اعيونه معاها
قدمت شوره وبحتت فعيونه
وحطت ايديها على فمها
وليد هنا انتبه لروحه شن قال
ويه ،، الحمدلله ياربي الحمدلله ياربي
وليد حس بفرحة ويه لي كان صوتها يرجف وهي تحمد في ربها
وعيونها يبكن من الفرحه
نزلت من الفرحه للارض
كرعيها معش شالنها
وليد نزل امعها
ويه ،، من امتى من امتى ومخبي عليا
مش عارف اني فكل وقت ندعيلك مش عارف ان فكل صلاه ندعيلك مش عارف اني نموت الف موت ونا شايفه العصا فيدك وبحتت فجنب وليد وين ماكان امخلي عصاته فجنبه
ومدت يدها وسحبتها شورها وخلتها اتطيح فالارض
ليش خبيت عليا ليش ما فرحتني معاك ليش ليش
وليد ،، عارفك حتفرحيلي
بس استخسرت الفرحه عليا وعليكم
خفت اتكون فرحتي مش وقتها
ويه ،، وامتى وقتها امتى
وليد ،، كنتي انتي اول من شافنها اعيوني
كنت نبي نقولك بس قلت عزا ونا مش عارف شن ردت فعل لي يسمعها
مني فحسبة اختي
واكيد فيوم عزاها مستحيل حد يفرح ولا وقت فرحه اصلآ
ويه وهي تبكي ،، مني لو كانت حيه أكيد اكثر من يفرحلك هي
وليد ،، عارف والله عارف
بس متجيش وحركه شينه مني اذا بانت اني فرحان برجعت انظري
وفرحت هلي ومرعايتش حزنكم لي هو حزنا كلنا
مني مش بس بنت عمي مني اختي وصديقة طفولتي وهي اول وحده بعد ميدو جيت صارحتها وقتلها اني نحبك
ويه ارفعت اعيونها فيه بعد قال كلمته الاخيره
ويه ،، انت هضا عليش صايم كنت
وليد، ، معرفتش شن الشي لي نديره عشان نوصل شكري لله
وذكرت بعد روحت من مصراته وقلتيلي انك حتصيمي عشان ترويحتي طيب
ويه وتو حندير نفس الشي ونصيم ونصدق بكل افلوسي عشانك
وليد ،، كم عندك
ويه ،، قوست شفايفها وقالتله مش عارفه
فلوس الشقاقه بتاعي
وليد ،، نحبك وربي وربي نحبك
بس عشان خاطري تحملي الفتره هذي لعند نقوللهم اني نشوف
.............................
ثاني يوم الصبح
شيماء عدت للعمل لي كان مفروض اتكون فيه من اربع ايام
ماشيه ومتاكده انهم حيقولولها استغنينا عن خدماتك
ومع هضا لبست وطلعت وهي مش حاطه شي على وجها وكان باين الحزن على وجها
أنت تقرأ
حبيبه
Literatura Femininaروايتي هي عبارة عن علاقات أُسريه فقدنها للاسف مع الزمن 💔 هي روايه عائله تروي التلاحم الأسري لي كل شخص يتمنى يكون موجود فوسطه شخصياتها من وحي الخيال وليس لها وجود فالواقع بطلتها #حبيبه🦋 البنت لي كلكم حتحبوها وتحسو بيها وبمعانتها والالم لي عاش م...
