حبيبه

#حبيبه 🦋 73

#حبيبه 🦋
#البارت_الثالث_والسبعون
برمت ورايا لقيت معتز امصبي حاط ايديه فجيبوه ويسمع فيا
نا ،، من امتى هنا

معتز ،، نمشو لسبحه

لا لا منبيش
معتز ،، ليش غيرتي رايك
نا ،، مش عارفه مع اني امرايفه بس حاسه بضيقه ومعنديش نيه انصبي
معتز ،، وكان قتلك عشان خاطري
نا ،، نقولك من عيوني
معتز مد يدا لي وقالي تعالي
مسكت فيدا وصبينا مكنش في حد كلهم امقعزين بعيد
مشيت نا وياه فالمزرعه ونا ماسكه فيده
قعد ايهدرزلي وغيرلي جوي
فتح باب الجهه الثانيه من المزرعه وخشينا

سبحه كانت في الأسبطل ابتاعها
معتز ،، نطلعها لكي
نا ،، لا لا انشوفها من هنا ساد
معتز ،، ليش مش كنتي ملهوفه عليها قبل اشوي
نا ،، مفيش بس هك
وقربت منها وحطيت يدي على راسها وقعدت انحرك فيها
وسبحان الله وكانها عرفتني قعدت تحرك فراسها وتقرب مني وقربت من رقبتي بواجها
نا خفت
معتز ،، هههههه متخافيش منها ياعيوني تبي تشم ريحتك
نا ،، اها ، مزالت اصغيره نحس فيها مش متغيره واجد
معتز ،، تبيلها وقت على ما كبرت
وقعدت هك معها وبعدين معتز عدا شور بحر وقعد امصبي جنبه اشوي
عديت شوره
شنو نطلعو
معتز ،، هيا بس حالك هضا مش عاجبني
نا ،، اطمن والله مافيا حاجه ممكن عشان  انفكر  في سفرة ماما وفي عزو عشان هك اضايقت بس مش اكثر
معتز ،، ان شاءالله
ماتشيلش هم شي اي حاجه تبيها او ناقصتك نا نجيبها لك ولو على خالتي توا نجيبلك جاهز نت عشان اتكلميها في اي وقت
نا ،، ربي يخليك لي بس محمد مش امقصر
معتز ،، انتي توا مراتي واي حاجه تبيها تفهميها مني
وراء كان تبي تمشي للاردن انشيلك معندكش مشكله
نا ،، هههههه في فرحك ان شاءالله
معتز ،، في فرحي غصبن عنك وبعدين مكان خطير  ان شيلك له
نا ،، نحبك انت
معتز كان يمشي وقف قدامي وصبا يبحت فيا
شنو قلتي
نا ،، ا ن ح ب ك   ا ن ت
معتز مد يدا مسك يدي وعيونه فعيوني عض على فمه وغمض اعيونه رد فتحهن ونا نعشقك .❤
...............................
نبيك تقعد قد روحك وتسمع كلام خوتك وعمرك ماتقول هضوم مايحبونيش ولا نا مش خوهم
لا ياماما اعرف انهم يحبوك وانهم ديما في جنبك حتى لو قسو عليك حيكون هالشي فصالحك وماقسوش الا لانهم خايفين عليك
معتز ،، باهي خليني نمشي معاكي
نوريه ،، لا لا نبيك تذكرني ديما ونا قويه نبي صورتي الاخيره تكون هك وماتشوفنيش ونا فااضعف حالتي
معتز ،، ليش اتقولي هكي اهو وليد عدا عالج وجاء حتى كان فقد اعيونه بس وضعه اكويس
ياامي الله يربحك خليني نعدي معاكي ياامي متحرمينش منك ياامي ساد المرض لي جاكي
نوريه ،، ودموعها ماليات وجها ،، مش ساهل عليا افراقك ياوحيدي مش ساهل ياخوي وبوي وامي مش ساهل ياحبيبي لكن الله غالب
كانت تبكي ومعتز كيفها وهو حاضنها ومترس فيها بأيديه الاثنين وكانه خايف منلي جاي
بابا امصبي عند باب الدار يسمع فيهم متحملش وطلع وسيبهم
نوريه ،، احمد ربك ان مريم انسانه تخاف ربي ومعتبرتك كيف اعيالها
معتز ،، بس نبيكي ياامي ومنبيش غيرك
نوريه ،، بعدته عنها وحطت ايديه على وجه ومسكت اخدوده الاثنين
تاكد اني ماشيه ومسيبه قلبي وروحي وعقلي معاك بس فنفس الوقت متريحه لانك حتكون بين ايدين امينات
مريم مستحيل تظلمك 
الانسانه لي راضيه توقف معايا فوقت محنتي هذي مينخافش منها بالعكس
طول عمري كنت انغار منها على حب الناس لها
مش بس من الناس
كنت انغار منها على باتك (عبدالرحيم )
حتى لمى طلقها قعد كم يوم وهو لا ياكل ولا يشرب كان ايعذب في روحه وهي مش عالمه بيه
كنت نغار منها لم يغلط ويناديني باسمها
كنت انغار منها لقدرت اتعيش من دون هلها ومن دون زوجها وربت اعيالها احسن تربيه
مريم الحب لي فقلبها يكفي العالم كله
اتصدق حرمت على باتك يمشيلهم اها من غيرتي منها حرمت اعياله منه واهو ربي عاقبني على كل شي درته
معتز ،، بس هما عمرهم ما حكولي هكي
هم ديما في حالهم وحتى على باتي مايحكوش بكل
نوريه ،، رد بالك من روحك وخليك اقريب من ربك واهتم بدراستك
هذي وصيتي لك ياعزو
معتز ،، متقوليش هكي
تو تعدي وتجي طيبه نا مزلت نبيكي ياامي
عشان خاطري خليكي قويه عشان خاطري متسيبينش
نوريه ،، اه ياامي اه ياامي ااااااااااااااه ياامي ياامي 💔
عزق معتز راسه على كترها وقعدو يبكو هم الاثنين
رقد معتز اليله هذك فكتر امه
......................
محمد ،، اتوصي على شي من برا
نجوى ،، سلامتك ياعيوني
محمد قرب باس راسها وطلع
صبت نجوى خشت للحمام دوشت وبدت اتلم في شقتها وبعدها انزلت عشان اتدير الغداء لان ماما تبي تمشي مع بابا ونوريه عشان علاجها
نجوى ،، صباح الخير يااعميمه
ماما ،، صباح النور
ليش نازله بدري يابنيتي ليش مارقدتي وتريحتي
نجوى ،، اوعيت عشان محمد وقلت ننزل انساعدك  عارفه البنات فالجامعه
ماما ،، الحوش ملموم وردن ابرمن عليه قبل مايعدن
نجوى ،، باهي نحط الغداء ع النار عشان اتغدي معانا قبل مايجي عمي ياخدك
ماما ،، باهي لي ايريحك
خشت نجوى بدت فالغداء وماما طلعت للاصور قعدت اتسيق فيهن وين ماوصلت لفم الحوش شافت اعميمه جميله وهي نازله من سيارة عمي مختار لي حطها وعدا
اعميمه جميله من بعيد  ،، صباح الخير ، الله ايعاون
ماما ،، صباح النور ،  سلمك
تفضلي ياجموله افطري معايا
اعميمه جميله ،، هيا جايتك
فتحت الباب وخشت حطت حاجتها وردت على ماما لي كانت اتراجي فيها ومقمعزه ع الكراسي لي فجنب وردي
اعميمه جميله ،، كنك يامرومه امقمعزه وحاطه يدك تحت خدك شن في ياخيتي شغلتيني
ماما ،، ماتنشغلي على غالي ان شاءالله
شاغلتني البنات لي يبن يقعدن وحدهن
اعميمه جميله كرت الكرسي وقمعزت في جنبها ومدت يدها امسكت يد ماما
ردي بالك تخافي ولا تنشغلي عليهن ونا قاعده
راهن ابنايتي واعيالي
وراء محمد وحوده هم العيال لي مقدرتش الفرح مختار بيهم
وكانك حسبتني اخت ردي بالك اتشيلي هم حاجه ونا هنا
عمري ماننسى بعد امي امرضت وعديت لطرابلس وقعدت امعها ثلاث اشهور والبنات قاعدات معاكي ومايعرفن باب حوشهن وين يفتح
ومحمد ايشيل ويجيب فيهن ومافي يوم شكى ولا قال مليت
ماما ،، ماعندي فيها جميل
وحميدا كيف ما انتي قلتي فحسبت اولدك
وهو عند عمه مختار وقطع الخبر
جميله ،، معناها عدي وانتي مطمئنه عليهن
وردي بالك من روحك ومن صحتك
وان شاءالله ربي يساعدك ويقويك على فعل الخير
ماما  ،، والله بعد هي جتني وصبت عليا ماقدرت انردها واكيد في عرب تو ايقولو كيف وفي من يقول اكيد عشان عبدالرحيم
لكن نا والله ماني عارفه كيف قلت باهي لي نذكره وهي تحكيلي جت صورة عزو بين اعيوني هالعيل لي من يوم اكبر وخش حوشي وهو مايقول الا ياامي ويكب على يدي وراسي
وكان حق خوته خاطرهم فشي ايجي جايبه الهم بعدها حتى كان اصغير فالسن لكن عقله كبير
اهو قدام هالسياج الحديد هو لي داره بعد حق اخته تعارك على وردها
وراء مخلى حد يدفع معه
ونا فكل عيد ام جايني وجيبلي هديتي
اعميمه جميله ،، ربي ايحنن اقلوبهم على بعضهم ويجعل فيهم الخير
ماما ،، امين ، بيني وبينك ياجموله شاغلتني مني
عارفه ان صحتها مش تمام ابنيتي
ومع هضا اتكابر وداير روحه صاحه
لكن نا ام وقلب الام ديما يحس بعياله نا ماشيه وعقلي عند بنتي ولي يبي ايصير فيها
اعميمه جميله ،، قولي خير كنك اتفاولي ع البنت
ان شاءالله ماهناك الا الخير
وتجيب وتحل اعويناتها على خير
ماما ،، مني قلبها مانضني يحمل جيبت التوأم
اعميمه ،، كيف يعني
حكت ماما كل شي صار مع مني في جيت سيما وكيف توا تعبانه
اعميمه ،، ينعلي ابنيتي ان شاءالله ربي معها وينظر فحالها يارب
ماما ،، يارب