حبيبه

#حبيبه 🦋76

#حبيبه 🦋
#البارت_السادس_و_السبعون
عمي  صالح كان ايراجي في ميدو ومحمد
يبيهم ايجو عشان ايرن ع العيل ويخبرهم بوفاة نوريه صلى الفجر وقمعز ايراجي فيهم
وصال كانت واعيه عشان اتصلي اسمعت عمي وهو يفتح فالباب الخارجي
صبت ع البريد بتاعت دارها شافته وهو مره يبرم فالجنان ومره يرد ايقمعز
وليد كان واتي وقاعد في داره وماسك السبحه في يده
ويستغفر
كانن خايف من نتيجة الصوره ومتوتر
اشوي وسمع نغمة فونه ابتسم ومد يدا يتلمس وين مافي الفون ع السرير فجنبه
مسك الفون ورفعه وفتح
وليد ،، صباح الخير
ويه ،،  صباحك عسل ياعيوني انت
وليد ،،  ربي يخليلي هالصوت السمح
ويه ،، الصوت بس
وليد ،، وصاحبت الصوت
ويه ،، نجك لي شنو واتي ياعمري
وليد ،، واتي انراجي فيهم
ويه ،، والمعنويات يااودي شنو اهم شي فعلاجك نفسيتك تقعد تمام راء نص العلاج هضا نفسي وانتي عارف
وليد ،، اطمني يادكتوره
نفسيتي تمام الحمدلله وهضا يرجع للعلاج ولاهتمامك
ويه ،، الحمدلله
ايوه نبيك هك ورد بالك اتسيب الاذكار والاستغفار والادعيه وسورة البقرة
وليد ،، اطمني البقره بديت نحفظ فيها حفظ
من كثر مانسمع فيها
ويه ،، ان شاءالله واحلى قاتوه مني لك يوم لي تحفظها
وليد ،، مدام هك ان شاءالله ربي يقدرني ونحفظها بسرعه
ويه ،، اول ماتوصلو كلمني
وليد ،، غير خليهم ايجو قبل
ويه ،، لا اكيد اقريب يوصلو فيكم بعد اوعيت سمعتهم بعد طلعو شورك
وليد ،، باهي اكويس عشان نوصلو بدري
.......
صافي اوعي من النوم ملقش سلمى جنبه
رفع تليفونه ايبحت فالوقت فتح الفون وخش ع الهاتف ومنها لسجل ورن على رقم محمد
ضرب مرتين ورد عليه
محمد ،، صباحك سعيد
صافي ،، صباحك مبروك ياغالي شن جوك
محمد ،، تمام
ميدو كان ايسوق ويبحت فيه
صافي ،، شنو طلعتو
محمد ،، ماشيين شور وليد في راس شارعهم قاعدين
صافي ،، توصلو طيبين ان شاءالله
اول ما تجو غادي كلموني
ميدو ،، كنه السكان هضا
صافي ،، صكر فمك يا 🚫
محمد ،، هههههههه
كان اتحق وجه كيف قعد
صافي ،، يستاهل الكلب
ميدو ،، ماتنساهش كلمتك هذي بعد تلقى روحك برا اه
صافي ،، اقلب وجهك
عليك صبح هو
ميدو ،، هضا وجهي كان مخليت سلمى ترقدك برا
محمد ،، اوووو
صافي ،، والله اتجي شور هلي نحفرلك عند وليد بعدها
ميدو   ،، اعلى مافخيالك اركبه يامعلم
محمد ،، اهو وصلنا انكلمك بعدين
صافي ،، تم
سلم على وليد
صكر منه وصبا ايدور في سلمى
لي كانت مقمعز ع الصالون وفاتحه الروشن وتفرج ع البحر والشمس لي كيف باديه تبي تشرق
صافي جاء لعندها كان لابس شورت لفوق الركبه بس
وصدرا عريان
جاء ورها وحضنها وطبس باسها من رقبتها بوسه طويله وهاديه وهي ميلت راسها شوره وكانت امغمضه اعيونها ومبتسمه
صافي ،، صباحك سكر
سلمى ،، صباح النور ياعمري
صافي ،، ليش واعيه بدري
سلمى ،، مفيش النوم طار وبعد سمعت الفجر قلت انصلي
صافي ،، باهي شن رايك انخش اندوش وتطيبي قهوه على مانا صليت نطلعو نشربوها ع البحر
سلمى ،، تمام باهي
صبت سلمى خشت للمطبخ لي كان بار ومقابل الصاله
وصافي كان قاعد في مكانه ايتامل فيها وهي تمشي
برم ومشى شور الحمام حشاكم وهي ردت لدار عشان تلبس وتطلع الصافي لبسه
ردت جهزت  فطور ع السريع وحطته في سله الافطار مع مقين قهوه
طلع من الحمام وكان لاف على جسمه من تحت  المنشف
خش لدار لاقى ادبشه واتي ابتسم
وبدء يلبس كمل عدا حط مزيل الروائح وبدين حط البروفيوم المفضل عند سلمى عليه
هو بدء فصلاته مع خشت سلمى عليه
قمعزت ع السرير لعند هو كمل الصلاه برم وجه بحت فيها شنو واتيه
سلمى وهي ماسكه فونها واتيه
صافي ،، باهي لي فيدك سيبي هنا
سلمى ،، ليش
صافي ،، حتى نا امسيب فوني غير ايتعبن رمله وخلاص
سلمى ،، باهي هيا نطلعو
..........
وصال  اتصدق على باب غرفة وليد
وليد ،، ادخلي
وصبا في مكانه
وصال ،، صباح الخير
وليد ،، صباح النور شنو جو الشباب
وصال ،، هيا ايراجو فيك
طلع وليد يمشي وكان يستخدم في عصاته
وصال ارفعت شنطته وطلعت امعه
جاها محمد سلم عليهم وخدا الشنطه من سولي
وصال فسرها ،، ربي يشفيك ويفرح بابا بيك يارب
ربي يشفيك ياخيي يارب يارب💔
محمد ،، ماتوصو على شي
وصال وعمي لي كان ماشي شور ميدو لي منزلش من السياره
ميدو لي مبش ايرن على دانه ويوعيها رغم انه كان متفق امعاها اول مايطلع من حوشهم ايرن عليها عشان ايشوفها
بس الخبر لي سمعه امبارح خلاه يلغي كل شي ويفكر بس امتى ايعدو ويردو بسرعه
كان عنده احساس ان نوريه مش تعبانه ومن صوت عمي امس وجه اليوم بعد شافه عرف انها متوفيه
عمي ،،
سلامتك بس ردو بالكم من الطريق
وصال ،، سلامتك والاخبار لتفرح
محمد ،، ان شاءالله ومسك يد وليد وعدا بيه شور باب السياره عشان يركب وراء محمد
محمد ،، ولا تركب من قدام
وليد ،، لا خليني لاوراء اريح
محمد ،، تمام اركب هيا
عمي ،، كيف ما وصيتك ياميدو
ميدو ،، حاضر ياخالي
وصال  وجت وراها اعميمه فايزه كبت كاس امياه استودعتكم الله
اعميمه ،، في حفظ لله ورعايته
عمي ،، ربي امعاهم ان شاءالله
وصال ،، شن في يابابا كنك حايس
.......
انردو ليوم امس ولمه خشت ماما على نوريه وهي ميته
خشت وقلبها يخبط للمليون
كانت تمنى لو تخش وتلقى نوريه اتراجي فيها كيف كل مره بس للاسف الشي هضا مستحيل ايسير والميت مستحيل ايرد
اول ما جت عينها عليها
ماما ،، ان لله وان اليه راجعون
ان لله وان اليه راجعون وقربت منها وجت عند راسها اتبحت فيها
كانت نوريه وكانها راقده مش ميته سبحان الله كيف كان شكلها اعيونها فمها ملامح وجها ايدلن على انها راقده مش ميته جمتها لي كانت نازله على وجها
ماما الله يسامحك يانوريه  الله يسامحك الله يسامحك
بعد تبي اتعدي وتسيبي عزو ليش جبتيني نا معاكي
الله يسامحك شن نبي انقوله اوليدي شن نبي نقوله لي يكلم فيا ويقولي ردي بالك من امي وسامحيها
نعلي كيف نبي انصبره نعلي لي ما احسبتها اتموتي  وتسيبه لي يانعلي يانوريه يانعلي اوليدي
الله يسامحك الله يسامحك
وطبست عليها تبي اتبوسها من جبينها
ارفعتلها جمتها من على  وجها وباستها
سامحيني يانوريه سامحيني ياام اوليدي سامحيني
ونا امسامحتك امسامحتك
ونزلن ادموع ماما السخنات على وجها نوريه لي كان بين عليها السكون
عمري ما احسبتها خشتي هذي عليك عمري
سامحيني كان قهرتك ولا جرحتك من دون ما نعلم  ماتوقعت انك اتعدي وتسيبي عزو
ليش بس ليش عجلتي وسيبتيه ليش
الله يسامحك ويغفرلك ويرحمك
الله يسامحك ويعفو عنك
بحتت ماما فيها زين وكانت الفوطه البيضه بتاع المستشفى متغطيه بيها لعند فوق صدرها
اسحبتها ماما وغطتلها بيها وجها
خشت الحمام الغرفه توضت وطلعت جابت مصحفها
وبدت تقرا عليها فقران
بدت بصورة الفاتحه وبعدها البقره وبعدها الاخلاص ومن بعد الاخلاص قرت التكاثر
(وطبعآ هذه الصور التي أوصى الرسول بقراتها بجانب الميت او عند راس الميت )
قعدت ماما ليل كله بالشكل هضا لعند سمعت صوت الفجر
استغفرت ربها وردت من جديد عشان اتوضي
مرن حوالي ساعتين
سمعت ماما بابا الغرفه وهو ايدق
حطت المصحف من يدها وصبت تفتح فيه
بابا ،، السلام عليكم
ماما ،، وعليكم السلام
بابا ،، نبي انشوفها قبل ماياخدوها للتغسيل
ماما ،، عظم الله اجرك فزوجتك
بابا ،، هز راسه ان لله وان اليه راجعون
ماما   ،، تفضل
وانسحبت هي من الغرفه وطلعت وخلتهم في اخر هم الاثنين وحدهم لاخر مره يجتمعو فيها مع بعضهم فمكان واحد فغرفه وحده حتى لو روح نوريه رحلت بس جسدها مازال موجود بينهم والميت ايحس ويشعر بالموجود جنبه ويتألم أيضآ
قرب منها ورفع لغطاء من على وجها وطبس عليها باس جبينها سامحيني سامحيني ونا مسامحك يانوريه
رفع راس وصبا على حيله ويبحت فيها
عمري مافكرت اني انطلع سرك برا لو انتي ماتكلمتيش كان مات معاكي سامحيني ليش انفعلت وخشيت عليكي وقلت لي قلته
صدقيني عمري ماتوقعت انخش نلاقي راقده هالرقده لاني عارفك نوريه القويه لي مايكسرها شي حتى بعد الصار فيكي كنتي طول عمرك قويه حتى لمه امرضتي المره لي فاتت وشالولك الرحم كنتي اقوى من المرض
ورديت اقوى من قبل
كنت نحسابك اتردي معايا وتربي اوليدك بيدك وتحت اجناحك ليش عديتي
نعترفلك بسر
كنت متريحه فحياتي معاكي رغم ان مفش حب بس كنت عايش معاكي بهدو
فاهمك وفاهمتيني وعارف قلبك شن فيه
طول وهو ايتامل فيها
رفع يدا مسح ادموعه بااصابعه السبابه والابهام
رد غطاها من جديد وطلع من عندها
ماما كانت امقمعزه ع الكراسي امقابله الباب 
كانن في ممرضات ومعاهن ممرض شاب امصبين عند الباب ايراجو فبابا لعند طلع
خشو عليها وحطوها ع الباريله
وطلعو بيها من الغرفه
ماما صبت ابسرعه وجت شورها وين شايلينها
الممرضه زوجها طلب انها تتغسل هون بالمستشفى
بابا قدم شور ماما للازم ما يغسلوها توا عشان نطلعو بيها طول من هنا للمقبره
ماما ،، مستحيل وكانها معندهش هل يبو ايشوفوها معندهش ولد قاعد ايراجي فيها
نوريه تطلع من حوشي تسمع فيا  ولا لا من حوشي
بابا ،، حاضر حاضر بس اكرام الميت دفنه
ماما ،، اتغسل هنا ماقلت شي لكن من هنا على حوشي ايشوفها عزو ويسامحنها البنات وتسامحن قبل
مهما كان هي ام خوهن ومرات بوهن ونزلن ادموع ماما لي قلب بابا 💔 ينشق كل مايشوفهن
ماما ،، رجوني نبي انجي معاكم
بابا هز براسه للمرضه
استنت ماما لعند وصلت فيها ومشت هي وياها
ماما ،، نبي ناخد شنطتي فيها مصحفي
الممرضه ،، انا بجيبها لئلك تكرم عينك
ماما ،، الله يسلمك
عدت الممرضه جابت شنطة ماما وردت شورها
وصلن للمكان لي يتم فيه تغسيل الموته حطو نوريه وطلعو
جت سيده كان بين عليها كبيره فالعمر  عشان اتغسلها
السيده ،، وين اهل المتوفيه
ماما ،، نعم تفضلي
السيده ،، تعالي عشان تحضري التغسيل
وتساعديني
ماما ،، نا
السيده ،، مش انتي اختها
ماما كانت حاسه بارتباك والخوف
هزت راسها
خشت وراها
وبدت فيها
السيده بحتت في ماما وحست ان هي خايفه
تقدري اتقمعزي هنا وتدعيلها لعند نحتاجك فالتكفين
ماما ،، ان شاءالله
خدت المصحف وبدت تقرأ فيه
فالوقت لي ماما تقرا اسمعت صوت المقص لي السيده اتقص بيه فدبش نوريه
صوت عبرت ماما وابكائها كان مالي الغرفه
ماما تقرأ وتمسح فدموعها لانه غطن عليها الرؤيه
كانت كل ما توصل في دعاء  تقعد تدعي بصوت
كملت القراءه
والسيده كملت تغسيل
طلبت من ماما اتساعدها في لف الكفن
كانت ماما ترجف ودموعها مستمرات
خدت نفس ورفعت راسها فوق
وبدت تدعيلها
اللهم اغفر لها و ارحمها و اعف عنه و اكرم نزلها”. “اللهم أبدلها داراً خيراً من دارها و أهلاً خيراً من أهلها و ذرية خيراً من ذريته و زوجاً خيراً من زوجها”. “اللهم اغفر لها اللهم ثبتها عند السؤال اللهم إخراجها من ضيق اللحود ومن مراتع الدود الى جناتك جنات الخلود”. “لا إله إلا أنت يا حنان يا منان يا بديع السموات والأرض تغمد ( نوريه  ) برحمتك يا أرحم الراحمين
..........
معتز ،، صباحو
دانه ،، اهلين صباح
معتز ،، خالي وين
دانه ،، جوا فالصاله مش عارفه كنه
معتز ،، كنه شن فيه
دانه ،، حاسه ان في شي يستر الله بابا ونعرفه
معتز ،، ان شاءالله خير
اني خاش انشوف شن فيه
خش على عمي واول ماقابله لاقه امطبس راسه
معتز ،، يارب ان شاءالله خير
السلام عليكم خير ياخالي كيف اصبحت
عمي ،، بخير الله يسلمك
معتز ،، ان شاءالله  خير ياخالي شن في
عمي ،، نوريه مرات خالك عطتك عمرها
اعميمه فايزه ،، هيييي وحطت يدها على صدرها
نعلي نعلي نعلي وك ووك وك ووك وك ووك
نعلي يا  نعلي
عمي سمع صوت اعميمه والبنات انزلن من فوق  يجارن
صبا عمي شور اعميمه لي قعدت تبكي وتندب
وصال ،، من ياماما من
قولي ياماما من
دانه شنو في علي من يندبن يابابا
عمي وهو يحضن في وصال لي قعدت ترعش
لاتخافن يابابا لا تخافي
عمتكن نوريه عطتكن عمرها
.............
شيماء ،، صباحو ياعمري
جوري ،، صباح الفل
شيماء ،، ليش واعيه بدري
جوري ،، شكلك ناسيه موعد امتحاناتي
شيماء  وهي تفتح فالدولاب تختار في سكافا تمشي مع لابستها
مش ناسيه بس مزال اليوم الاثنين وامتحاناتك يبدن السبت أرقدي وتريحي
جوري ،، لا وين انتريح نا كابوس الامتحان بداء معايا ازعمك ننجح ولا نرسب
ونحلم بالامتحانات كيف نبي نرقد ويجيني نوم ونا نبي مجموع عالي
شيماء ،، ان شاءالله تنجحي ونفرحو بيكي
انتي بس توكلي على الله
جوري ،، والنعم بالله
خودي الابيض هضا يمشي مع كل الالوان
شيماء خدت الاسكافا البيضه وردت الباقي صكرت الدولاب وقربتها من وجها تشوف فيها
شيماء ،، شنو سمحه صح
جوري ،، قمر
سقدي روحك عشان تفطري عارفه بابا مستحيل ايشيلك بلا فطور
شيماء ،، بكل
تعرفي حاسه بروحي متوتره رغم اني واثقه من قدراتي
جوري ،، معناها مافش داعي للخوف
شيماء ،، كل مكان جديد له رهبه لبال ناس مانعرفهمش والله اعلم شن نواياهم وشن ردة فعلهم لمى تكون مديرة العلاقات العامه عليهم بنت
جوري ،، هضا اسمه تخلف  لو في حد مش متقبلك او متقبل وجودك للازم تعرفي انك قهرتيه بوجودك وانه شايفك افضل منه عشان هك مايبيش وجودك عشان قيمته متقلش بين الاخرين
شيماء ،، والله جبتيها يابنت
جوري  ،، حتى نا جوري ياماما
شيماء باهي اطلعي سخنيلي السياره على مانا فطرت وبعدها ردي اقري
جوري ،، والله ماني طالعه من الدار اليوم لعند انكمل الماده هذي
شيماء ،، خزوو
جوري ،، موتي قهر
.......  ........
معتز ايرن على صافي لي مكنش ايرد
رن على خالد
ها خالد وينك
خالد ،، ها يامعتز
معتز ،، نبيك تسبقني على حوش خالي عبدالرحيم
خالد ،، امتى روح عمي
معتز ،، عمك فالمطار جاي
اسبقني غادي
خالد ،، شن في شغلتني
معتز  ،، مرات خالي عطتك عمرها
خالد ،، ان لله وان اليه راجعون
قصدك نمشو لفيلة عمي عبدالرحيم
معتز ،، لا لا خالي قال العزاء فحوش خالتي مريم
خالد ،، كيف
معتز ،، شكلها خالتي تبي هك
خالد ،، والله الوليه هذي ماعاد في منها
معتز ،، صدقني تلاقاها خير كله
.........
معتز ،، رن انت على يوسف افضل
عمي ،، غير كان قلته له انت
معتز ،، اتجي منك انت افضل ويعرف ان مزال هو الكبير لي فمكانه محمد وين ايغيب يلقوه امصبيلهم
عمي حط يدا على كتف معتز
وقاله
ربي يكملك بعقلك
رن عمي على يوسف رن الفون اكثر من مره وفي اخر لحظه رد يوسف
كان مزال راقد في سريره ومني راقده جنبه
يوسف ،، صباح الخير ياحاج
عمي ،، صباح النور سامحنا واعيتك
يوسف انحرج من عمي
لا لا المور طيبه ان شاءالله
عمي ،، الحمدلله
وين انت يايوسف
يوسف بحت في مني لي فتحت اعيونها وقعدت اتبحت فيه وكان صوت عمي واضح لانه صوت تليفون يوسف عالي
يوسف ،، فالحوش خير ياعمي في شي
عمي ،، مرات عمك عطتك عمرها
يوسف ،، كيف ؟  شنو  ؟
وكانن اعيونه على مني  لي وجها قعد ما يتفسرش بعد سمعت كلمت عمها
عمي ،، مرات عمك عبدالرحيم عمتك عطتك عمرها
مني ،، قعدت امفنصه اعيونها ومعش تحركت وصوت نفسها عالي
وحاسه بروحه تبي تطلع منها وقلبها نبض ارتفع فجاه
وصارت فيها ربكه من الداخل ربي بس هو لي عالم بيها
يوسف عيونه على ايمان لي وجها لونه انخطف وشافيفها انسودن فجاه
يوسف ،، ان لله وان اليه راجعون
باهي
عمي ،، تعال وجيب هلك معاك لحوش عمتك مريم العزاء غادي
يوسف ان شاءالله
صكر الفون ومد يدا لمني لي كانت منصدمه على منهاره من الداخل بعد سمعت خبارت عمها
يوسف مقدرش يسأل من مرات عمه لي توفت  بس من وجه مني فهم انها مريم
ومريم نفس الشي توقعت ان امها هي لي توفت
يوسف حس بيد مني كيف امثلجه
شنو انتي اكويسه
مني متردش ادموعها ينزلن ولا كلمه ولا عيطه طلعت منها
يوسف ،، قعد ايكلم فيها بلا فايده
اشوي اشوي قعد اعيونها ينقلبن وبدن يغمضن وجها كله انسود وشافيفها لونهن قعد موف داكن
يوسف ايخبط على وجها عشان اترد عليه بس بلا فايده
مش عارف كيف نط من ع السرير
وصبا يجري
رفع الورغان من على مني انصدم بلي شافه تحتها
كانت كني غارقه فدمها ( نزيف ) لدرجه انها دايره بقعه كبيره من الدم تحتها
حاس يوسف ومعرفش شن ايدير طلع فتح السياره ولعها ورد بسرعه البرق
رفع مني  ومشى بيها الدم قعد اينقط لعند ب ا  طلع بيها للسياره لي كانت امدرسه من ليلة امبارح حطها فالسياره وركز على لابستها
رد يجري ياخد في حاجه لها عشان ايغطيها بيها
كانن ايديه مليانات دم منها اذكر الساكو لي كانت امجهزته للبيبز (التوينز)
شاف فون ع الطاوله خده وطلع
ركب للسياره وقعد ايغطي فيها وعلق السياره وطلع وهو ماشي فنص الطريق اخطرت عليه سيما🌸
لي كانت راقده في دارها
خبط بيدا على جبهته وقعد بين نارين ايرد عشان بنته ولا يكمل عشان مراته لي غرقت السياره بدمها
ركز وين مافي كرعين مني شاف بحيرة دم بدون مبالغه تحتها
وهالشي صار فالواقع لسيده حامل  Natash sa
انصدم بالي شاف وكان يجري من دون مايركز ع السيارته لي قدامه كان كل همه ان ينقد حياة حب عمره لي قاعد يغرق قدامه
نسى بنته نسى السيارات نسى العالم لي قاعد فيه كليآ
لدرجة ان السيارات لي كان يجتاز فيهم ايبيبوله ويشيروله بالشي وهو ولا شايف ولا سامع شي
اول ما وصل شارع العياده حط يدا ع الكلاكس وكانه يبي اينبه العياده عشان ياخدوها وينقدوها له
وفعلآ كيف ما دار
كل لي يسمع لكلاكس كان ايوسع ويعطيه الطريق عشان يدخل للعياده بسرعه
اول ما جاء عند مدخل الطواري لاقى اثنين ايراجو فيه ومعاهم باريلا
يوسف ،، بسرعه تعال خوذوها بسرعه بسرعه
قعد ايعيطلهم وهو مزال ما نزل من السياره
قدمو عليه وفتحو باب السياره
خدو منه مني وحطوها ع البريله وطول خشو بيها ع الطواري كان في دكتور اول ماشاف بطن مني وكيف نازفه طلب منهم يدخلوها ع الكشف المستعجل
هم ايدفو فالبريله ومني يدها طاحت وهو شافها يبي يقدم شورها بس سمع صوت حد ايدور عليه
وين لي جايب المدام
يوسف وهو داهش
نا نا
تفضل
الدكتور ،، وين ملف المريضه
يوسف وهو مستك  
ملف شنو المدام تنزف وانت تسأل على ملف
الدكتور ،، ملف متابعه الحمل
وتحاليلها
يوسف ،، مني تبي اتريح مني وانت تسال ع تحاليل
كل شي فساكو البيبي موجود
الدكتور ،، تفائل خير ياخوي
وعدا خش شور مني
يوسف وهو يبرم فالممر اخطرت عليه سيما
خبط بيد على الساس بعدين  حط يدا في  جيبه
طلع الفون وهو مش امركز على شي
(كان فون مني لي خده من ع الطاوله فحوشهم )
رن على اول رقم عنده فالسجلات
وحطه ع ودنه
كان يحسابه رقم عمي صالح يبيهم ياخدو سيما من الحوش
شيماء ،، ايوه يامني
يوسف ،، مني فالعياده تعبت عليا
شيماء ،، امسكت افرينو ودرست سيارته فمكان مش لها بكل
يوسف ،، مفش وقت سيما ابروحه فالحوش عدي خوديها
شيماء ،، حاضر باهي انتو وين فاين عياده قصدي
يوسف ،، فعياده ******
شيماء ،، تمام تمام
السيارات اقعدن ايبيبن وراء شيماء
لي كان واصله عند باركي الشركه لي مشيتلها
وهي ارتبكت ومعش عرفت شن اتدير
اترن عليهم عشان سيما وتخش على عملها فأول يوم لها
ولا تعدي تاخد البنت لي قاعده فحوش وحده
مصعب كان جاي للعمل وشاف الربكه والزحمه لي عند مدخل الباركي
نزل عشان ايشوف من لي معطل الناس
وجاء عند الباب لي فجنب السواق ودق ع القزاز
شيماء هنا انتبهت ونزلت قزازها وهي عاضه على شفايفها ومنحرجه
لانها انتبهت للناس لي وراها والسيارات لي يراجن فيها اتخش
الصدمه الكبيره لها لم شافت مصعب قدامها
مصعب بعد شافها رفع حاجبه وقال فسره
(هذي شن جيبها هنا )؟
مصعب لو سمحتي قدمي سيارتك عشان لي وراك كلهم عندهم عمل
مش فاضيين
شيماء ،، ومن قالك اني فاضيه حتى نا
مصعب ،، باهي حولي سيارتك عشان عطلتينا
شيماء ،، نا نبي نطلع البنت وحدها
مصعب قرن حواجبه وفهم ان في شي من نبرة صوتها لي يرجف
ومن شكل اعيونها
مصعب  ،، بنت من لي تحكي عليها وين وحدها
لو في شي نقدر نساعدك
شيماء ،، شكرآ  ، عطلتك اسفه اسفه
وعلقت سيارتها وقدمت وبرمت اطلعت من عند بوابه الخروج للباركي
مصعب قعد امصبي في مكانه ايبحت فيها
بدن السيارات ايخشن
مصعب ،، بس هي شن جابها هنا وحرك شواربه لاعلي
بااستغراب و  عدا شور سيارته
شيماء كانت مش عارفه كيف تصرف ولا على من اترن
فقررت اترن على وصال وتفوت البنات عشان ماتفجعهنش على مني
ها سولي كيف حالك
وصال ،، وهي ترشف في انفها
هلين شيمو كيف حالك
شيماء ،، كنه صوتك شن في
وصال ،، نوريه مرات عمي عطتك عمرها
شيماء ،، لا متقوليهش
وصال ،، الله غالب هضا لي صار
شيماء ،، باهي  ياسولي شن نبي انقولك حوش مني وراء اهل يوسف صح
وصال، ، بخوف ليش شن في
شيماء ،، نا منعرفش حوشها ورن عليا رقم مني بعد رديت طلع زوجها وشكله يحسابني وحده من البنات قالي عدي لاسيما وحدها
وصال ،، ومني وين
شيماء ،، في عياده******
المهم توا البنت دزيلي العنوان فرساله
وصال ،، باهي نحن توا طالعين غادي  انتي عارفه حوش هل يوسف صح
الشارع لي وراء هله على طول فوتيها خودي الشارع لي بعده
اول فيله على يدك اليمين من برا جرانيت رصاصي مفش الا هي فالشارع بلون هضا
شيماء ،، تمام على يدي اليمين ثاني شارع
وصكرت
رنت على عمي مختار وقالتله على وفاة نوريه
وقالتله انها ماعدتش للعمل وحكتله لي صار
...............
معتز ،، وتي روحك نمشو لحوش خالي
اعميمه نجاة ،، ليش شن في
معتز  ،، خالي جاي اليوم وقال نوريه تعبانه
اعميمه ،، كيف تعبانه
معتز ،، يعني غلبانه
اعميمه ،، لا حوله ولا قوه الا بالله
باهي عزو علمها
معتز ،، لا لا عيت خالي صالح بس وخالد
وخالي قال اول ما يوصلو للمطار تو انخبرو باقي العيله
اعميمه ،، افهمت من كلام معتز ان نوريه توفت
قعدت تبكي نعلي يامعتز يانعلي يانعلي
معتز ،، وجعته امه وخدها في حضنه وقعد ايسكت فيها ويقوللها اذكري الله ياامي اذكري الله
قولي لا اله الا الله
اعميمه ،، لا اله الا الله
يانعلي اوليدي لي تقزن يانعلي عزو الصغير يانعلي خي يانعلي خي لي يقعد ابروحه
معتز ،، هيا ياامي وتو تبكي غادي
البنات وحدهن وخايف شي حد ايجيهن و يفجعهن #حبيبه
........Natash sa
يوسف ،، شن صار فالمدام
الممرضه ،، لو سمحت محتجين 6اكياس دم  مبدئيا
وللازم تعدي اتوقع ع العمليه وعدت تجري
يوسف ،، تمام
مشى شور الريسبشن  وطلع الفون من جيبه قعد ايدور في رقم سلمى وبعد لاقه قعد ايرن عليها اكثر من مره وهي ما تردش
اطر انه ايوقع ع العمليه
وايس ان سلمى اترد عليه قعد ايرن على صافي حتى هو نفس الشي
سلمى كانت هي وصافي ع البحر يفطرو وبعدها صافي خدا سلمى وخش بيها للبحر
وطلعو قعد يجففو في اروحهم ومخشوش للاستراحه بكل
كانت سلمى سعيده بحب صافي الكبير لها واحتواء لها مش بس كزوج وحبيب لا كأب  ايعوضها عن كل شي انحرمت منه فطفولتها ومازال مأثر فيها لليوم
بس لو سلمى علمت ان مني في امس الحاجه لها  فهالوقت شن كانت دارت وشن حتدير
........
وصلت شيماء لحوش مني ويوسف
انزلت من السياره ولاحظت ان الباب الخارجي مفتوح دفت الباب وخشت شافت جرت الدم قعدت اتبع فالجره ولقيت باب الخوش الرئيسي حتى هو مفتوح  وحست بالخوف من الدم لي شافته كان واجد وقاعد فكل الحوش
صبت في وسط الصاله وقعدت اتامل فيه شافت صور مني هي وبنتها وزوجها قدمت شورهن بحتت فيهن
رقيت مع اول درجتين ايشيلن شور لديار
قعدت اتبحت ومش عارفه اين دار فيها سيما 🌸
فتحت اول باب امقابلها وكانت غرفة اطفال حلوه والوانها وتنسيقها وديكوراها لاطفلين
عرفت انها غرفة التوم ولاحظت وجود صور لمني حتى فالغرفه هذي
طلعت وعدت شور الباب لي فجنب غرفة التوينز افتحت الباب وعرفت انها غرفة سيما من الوانها
خشت عليها لاقتها راقده فسريها كانت ضامه دميتها لحضنها
شيماء ،، الحمدلله لي قاعده ياربي الحمدلله لي ماطلعت 
طبست عليها وباستها
ربي ينوض مني على خير يارب 💔
عدت شور دولابها وخدتلها دبش وحطت فالسوت باق بتاع سيما وجهزتلها لبسه عشان تلبسها
....................
جتنا اعميمه جميله وقعدت امعانا
كنا نحسابوها جايا عادي كيف كل يوم اشوي وجاء عني مختار جايب خضره كامله ولحم واجد ومصروف
درس السياره ورن على اعميمه جميله عشان تطلع عليه
جوري حتى هي سيبت اقريتها وجت
لقت عمي مختار ايمد لعميمه فالحاجه
ويه ،، عليش هضا كله
اعميمه جميله،، كيف عليش
كلمت حوده وعزو عشان يطلعو لعمي مختار
طلع عزو واول ما شاف المصروف قلبه دق بالقوه وحس بالخوف
لانه نفس مناسبه عشان ايجيب كل هالجيب بدون سبب الا اذا
عزو ،، ياربي ان شاءالله لي فبالي مش صح يارب
خدا منه وخشش على طلعت حوده تلاقى هو وجوري ليى كانت تاخد فالاكياس من باتها
هلبت من جنب حوده من دون ما اتبحت فيه
وهو كان ملاحظ استكردها له
.......................
جن عماتي عندنا استغربت فجياهن وج عيت عمي صالح كان باين عليهم باكيين كلهم
بعد سالنا شن في قالو هلي امروحين
اليوم قبل العصر ايكونو هنا
عزو قعد حايس ولي ايرن عليه ما يحصلش
.............
معتز ،، شنو ياعمري
نا  ،،  نسألك سئوال وتجوبني بصراحه
معتز ،، شنو سؤالك لي تبي من انجاوبه لكي
نا ،، شن في محمد و وليد سايره معاهم حاجه
معتز ،، لا ليش
نا ،، باهي شن لي ساير خلى العيله كلها اتجي عندنا
ونسمع في صوت رجاله برا شن في يامعتز الله يربحك احكي
معتز ،، انقولك وتكوني قويه
نا ،، هزيت راسي وقلبي يبي يطلع من مكانه
فالوقت لي كان الدكتور بادي فعملية مني
سلمى خشت للاستراحه
صافي ،، حبيبي انتي خشي دوشي ونا نطلعلك دبش
سلمى ،، لا ياعمري خش انت نا نبي نكلم البنات نسأل على محمد و وليد
صافي ،، تمام باهي
سلمى ،، تو نطلعلك ادبشك عدي انت
خدت سلمى فونها وتفاجأت بعدد المكالمات لي من مني
لان مني مش من طبعها اتكثر الرن
ان شاءالله خير ، حي عليا كان ماهي مريضه
وعاودت اترن عليها
الدكتور ،، كيس دم بسرعه
يكلم في الدكتوره المساعده لي معه
البيشنت    placenta previa
معنى كلام الدكتور ان مني عندها المشيمه المنزاحه بسبب كثرة النزيف لي تعرضتله
الدكتوره المساعده ،، حنخسرو الام والاجنه لو قعد ضغط الام منخفض هك
الدكتور ،، عشان هك مطرين نفصلو المشيمه نحن عن الاجنه والا حنفقدوهم
كل لي كان حاضر العمليه حس بخوف
نبض ايمان بدء يقل وضغطها هبط فجاه
كان الدكتور يطلع في اول بيبي
قعدت حركة كل لي فالغرفه اتقل وهم يسمعو فصوت الجهاز وهو ايصفر عيونهم توجهت ع الشاشه لي تعرض في تخطيط والضغط
الدكتور مش معدل كل همه ينقد البيبي الثاني
ويوقف النزيف
سلمى بسرعه ياصافي
بسرعه الله يربحك بسرعه عشان خاطري
ياربي ياربي اختي ياربي ياربي انظر فحالها ياربي خيتي يارب
صافي ماسك ايد سلمى لي كانت منهاره فالسياره
لا لا ياربي متختبرنيش فخيتي ياربي
الا مني ياربي الا وخيتي ومينتي الثانيه
وصل صافي لمدخل المستشفي وسلمى مرجتش لعند ايدرس افتحت الباب وصافي انتبه لحركتها مسك فرينو
نزلت سلمى وهي تبكي وقعدت تجري وخشت ع الريسبشن المريضه ايمان عبدالرحيم (مني) في اين طابق بسرعه
الرسبشين عارفه سلمى لانه دكتوره عندهم فالعياده
فالطابق الثالث غرفة عمليه رقم 4 خليك هناء يل رغد مكاني لعند انجي نمشي مع الدكتوره سلمى ونرد
رغد بنت فالرشيبشن حتى هي
تمام تو  نمسك مكانك
ومشت مع سلمى للصانصير عشان اتحله لها
سلمى تمسح فدموعها بيديها الاثنين
صافي خش بعد سلمى وعدا يسال على مكانهم
سلمى وصلت الغرفة العمليات والبنت بتاع الريسبشن  كانت اتطلع لسلمي فاليونيفوم الخاص بالعمليات
وسلمى اتعقم في ايديها
سلمى كانت تلبس ركزت على صوت البيبات وهم يبكو
ابتسمت لانه عرفت ان مني جابت
الحمدلله ياربي الحمدلله
البنت شكلها سلمت صوت البيبي عالي
سلمى وهي مبتسمه ،، توام
البنت ،، ماشاءالله ايتربو فعزكم
دفت سلمى الباب وخشت بس مقدرتش اتكمل خطواتها لانه كراعيها ثقلن وطاحت فالارض
كل لي فالغرفه انتبه لسلمى
لاااااااااااا لاااااااااااا لاااااااااااااااا
فيش اتديرو حول حول من عليها حول من سمحلك تلمسها من سمحلك اتجي شورها
مني منييييي منييييييي
يوسف لي كان قاعد برا سمع اعياط سلمى
وصافي لي كان جاي شور يوسف وقف في مكانه بعد سمع اعياط مراته
ااااااااختي ااااااااختي هذي اختي اختي اختي
لا لا
مش اختي لا هذي امي اه هذي امي لي ياما عانتني وشجعتني عشان انكمل ونعيش
ليش يامني ليش يامي ليش ياعيوني ليش
جت الممرضه اتساعد فيها عشان اتصبي سلمى امسكت بيديها الاثنين فدراع الممرضه وعدت شور السرير لي كانت عليه سلمى امغطينها بالشاش الازرق على جسمها كله
كرت الشاش وقعدت اتحرك فيها
نوضي نوضي نوضي الله يربحك نوضي عشان اعيالك نوضي ياعيوني نوضي
منيييييي منييييييييي منيييييي
لا ياربي لا ياربي
ياربيييي خيتي خيتي ياربي ليش ليش بس
نعلي شن انقول لاهلي نعلي شن نقول ليوسف
اتبحت فالطاقم الطبي وتحكي
وكل لي فالغرفه يبكي امعاها والبيبز صوتهم مالي الغرفه
سلمى قعدت اتخبط في وجها بيديها الاثنين
وبرمت شور سلمى
نوضي ياعيوني نوضي يامني الله يربحك الله يربحك نوضي والله مانقدر نطلع بلاكي ليش يامني ليش خيتي ليش
يالمعجله ليش ليش ليش
واككككككككك ياربي واكككككككك ياوخيتي
واككككككككك يافرحاتلي واكككككككك ياعيوني
حي عليا حي عليا حي
يوسف ،، لا لا لا
مش صاح مش صاح لي نسمع فيه مش صاح
قدم شور الباب ودفه
خش ع العمليات اعيونه على مكان واحد
مني ع السرير وسلمى طايحه تحتها وتندب
الدكتور ممنوع يااخ لو سمحت
يوسف مكنش يسمع فيه
صافي لي خش وراه حتى هو
ممنوع من فيش تحكي انت
ودف الدكتور وعدا شور سلمى
ويوسف عدا شور مني لي كانت امسلم روحها لله
انتهت حياتها وهي اتادي في دورها اعظم دور ممكن للأنثى تأدي وهي الامومه افضل ما منح الله لها
يوسف ،، مني منييييي
لا لا متديرهش فيا ياعيوني
متعديش وتسيبني  انتي عارفه اني بلاكي ننتهي
نا عايش بس عشانك
ادموعه كانن ينزلن وهو يحكي معها
رفع الشاش وغطلها جسمها بيه
كان مايبيش حد ايشوفها وهي هك
نوضي عشان اعيالنا اسمعيهم قاعدين يبكو
نوضي عشان  لي تحبيهم
نوضي وماتسيبينش
طبس عليها وحط راسه في رقبتها وقعد يبكي ويشم فيها
...............
عمي ،، كيف يوسف مجش لعند توا لا هو ولا هله
معتز ،، والله ماني عارف عمره مادارها
عمي ،، رن عليه
معتز ،، رنيت مايردش
وهو يحكي فونه رن
وكان صافي
معتز ،، وينك ياراجل لعند توا
صافي ،، نا مع يوسف فالمستشفى
معتز ،، شن في صوت شنو لي جنبك
صافي ،، مني عطتك عمرها
معتز ،، شنو شنو بصوت عالي
صافي ،، وهو يبكي مني يامعتز مني هى وتجيب
معتز ،، ان لله وان اليه راجعون
عمي صالح وحوده وعزو وخالد وعمامي كلهم انتبهو لمعتز فيش ايقول
معتز ،، انتو وين
صافي ،، فعيادة ******
معتز ،، هي اشوي ونجيكم
صكر معتز وحط يدا على عيونه يخفي في دموعه
عمي صالح من كلام معتز عرف ان في حاجه سايره
من يامعتز احكي من 💔
معتز برم عليهم وقاللهم مني عطتكم عمرها
حوده ،، شنو
عمي ابراهيم لي كان جنبه كره شوره وحضنه
وعزو قعد يبكي
ويه كانت طالعه بصفرة قهوه للرجاله لي برا سمعت صوت الرجاله عالي حطت الصفره ع المدخل وكانت تبي اتدق ع الباب 
اسمعت صوت ابكاء حوده وعزو
عرفت ان في حد توفي
قعدت اتخبط على وجها بيديها الاثنين
وخشت تجري على عماتي وعلينا
اعميمه فاطمه بعد شافت ويه تحسب انها اعلمك على نوريه .
خش عمي صالح علينا وهو يبكي
لاقنا كلنا امصبين فجنب ويه لي مطلعش منها ولا صوت
غير اتخبط فوجها
عمي صالح تعالي يافايزه
اعميمه فايزه شنو عزو علمها
عمي ،، مني عطتك عمرها
اعميمه فايزه ،، وكككككك وكوكككككك وكوككككككك
بانعلي يانعلي وووكوككككك وكككككك يانعلي بنيتي
يانعلي مني يانعلي يانعلي مني
عماتي ونحن سمعنا صوت النديب .نا ركزت في اخر كلمتين قالتهن
مني مني كنها يانعلي اختي كنها
اعميمه فايزه مني عدت وككككك مني مني مني ابنيتي يانعلي يانعلي ياصغيره
نا ،، لا متقوليهش متقوليهش
لا لا لاااااااااااا
ويه ،، حي علينا حي علينا حي علينا حي ديما حي ديما
عماتي وعميمه نوريه وصال ودانه جوري كلنا قعدنا نندبو الرجاله اطلعو برا للشارع
ونحن الدنيا شالت عندنا والحوش قعد يمتلى بالعرب
معش حسينا بالوقت
معش عرفنا من لي جاء ومن لي طلع
خشت علينا شيماء جايبه سيما 🌸 لي اول ما شفناها ردينا نديب اسواء من اول ما سمعنا الخباره
نعلي ياسيمو مني عدت نعلي وخيتي لي عدت نعلي حبيبتي
واك عليا واك عليا واك ياربي واك واك واك واك
جينا كلنا فجنب بعضنا كنا نبرمو ونحن نندبو ومش حاسين بالدنيا كنا كلنا فجنب بعضنا اعميمه نجاة سلخت وجها
حي على خوي حي خوي لي يبي يدفن بالزوج
يانعلي ياخسارة مريم السوده يانعلي يالمعجله
يانعلي ابنيتي قليلة الدواء مني قليلة الدواء
واك علينا واك علينا واك
نعلي يامريم ايصبرك ربي يامريم ايصبرك ربي ياوخيتي
واك واك واك واك واك واك
سمعنا صوت سلمى وهي خاشه تندب كانت اسوء منا كلنا كانت امقطعه روحها تقطيع
خشو وراها عرب مني شيلات البيبز فيديهن وعمتها تندب عليها
اعميمه جميله خششت التوام لدار عند جوري وميرا 
سلمى حي حي عليكن مني عدت حي عليكن
جيت بلاها جيت يااعميمه جيت بلاها وخيتي سيبتها وجيت يانعلي وخيتي يانعلي حبيبتي يانعلي
واك ياربي واك واك واك واك
يوسف كان قاعد مع مني فالمستشفى
كملو إجراءات الوفاء وغسلوها
كان الوقت بعد صلاة الظهر بواجد
عمي صالح ومعتز مخلهمش يدفنو لعند اتجي ماما عشان اتشوفها
طلب من يوسف ايجيبها لحوشنا عشان عزاء نوريه عندنا ومفش داعي يقسمو
عم مني لي بكاء عليها وكانه وحده من بناته تفهم الامر وقال عادي اليوم نقعدو عندكم عشان خاطر الحاج وبكره ننقلو عندنا العزاء
عمي صالح بارك الله فيك
يوسف كان امقمعز غير للدموع مفش منه شي
جابو مني وخشو بيها ع المربوعه عندنا
نحن بعد حقينا التابوت  زدنا اخرى
كانت هذي اول مره انشوفو فيها حد ميت لنا ولا زياده هذي مني ومش اي حد خشتهم بالتابوت علينا طيرت اعقولنا منا وشقتلنا اقلوبنا 
ندبن على كل شي عشاناه معها ندبن على مني لي كانت تسكت فينا بقرعتها على مني لي كانت اتغطي فينا وتعري في روحها على مني لي تطلع لقمه من فمها وتوكلنا علي مني لي تفرح لفرحتنا وتخبي سرنا فوسط قلبها
قلبها لي تعب بدري من  شايل اهمومنا
مني لي اتدس وتفرحنا مني الحنونه فلكل
معش حد سكت ولا حد قدر يسكتنا لانه كنا كلنا منهارين
يوسف كان يقرأ عليها فالقرآن
ومفش حد فينا خش عليها فيت عماتي وحوده وعزو
بس نحن الخوات مقدرنش انخشو كنا كلنا خايفين انشوفوها ملفوفه بكفنها ومحطوط فصندوق (تابوت)
عمي صالح دز علينا
طلعنا عليه وقعدنا انتباكو
عمي هضا حكم لله ولا اعتراض على حكمه نا نبيكن اقوى عشان امكن لي جايه فالطريق وقريب توصل عليكن وعشان عزو خوكن لي تقزن وعشان اعيال مني
سلمى ،، مش قادره وخيتي وخيتي ياربي
مش قادره نصبر كيف بس كيف بلا مني كيف بس كيف
عمي ،،  عرف ان نحن مش امركزين امعاه
قاللنا
نوريه حتى هي عطتكن عمرها
صرن خيكن لي تو انجيبه لكن
وهو مكملش كلامه لان قعدنا انتنادبو احده
خش عزو علينا
اميييييييي امييييييي اميييييييييييي
ليش نا ياربي ليش نقعد ابروحي  ياربي
امي امي ياامي يامي وينك ياامي وينك
نحن نتنادبو وهو فحضن اعميمه فاطمه يبكي بالصوت
عمي رن على ميدو وقاله ردو
وبابا ركب فسيارته وماما فسيارت الاسعاف لي جايبه جثمان نوريه
عمي كان خايف على ماما وبابا من الصدمه
فقاله ان مني تعبت وحطوها فالعنايه عشان مينصدمش
بس ماما مقدروش ايقولولها شي
محمد و وليد استغربت ليش عمي قاللهم ردو
رنو على معتز
معتز ،، نوريه توفت بس خالي مايبيش يقوللكم
ميدو ،، تمام اصلن السياره لي صارلها صارلها فجأة ونحن انراجو في رافعه تجي تاخدها
معتز ،، تمام اي شي رنو عليا
ميدو ان شاءالله انطقو فيهم قبل الدفينه
.........
جوري كانت طالعه عشان اتكلم اعميمه جميله عشان التوينز مبوش يسكتو كل ما يغمضو اعيونهم اينوضو من جديد  ايتابكو
وسيما حتى هي اشر منهم
.
اعميمه جميله ،، تعالن شوفن التوام حرام امغير ايتباكو
سلمى ،، ونحن ونحن من ايشوفنا نحن لي خيتنا عدت من بينا نحن وعزو لي امه عدت من بيه
يانعلي يانعلي ياربي ياريتك خديتني نا ياربي
ولا امهات لعويله
اعميمه جميله ،، تعالي خليهم ايحقو امهم ولو مره بس
حرام يبو ايعيشو بلاها طول عمرهم
صبنا عشان خاطر خيتاكن خودن التوام وسيما خلنها اتحق امها ووتبوسها اكيد
مني مشغوله عليهم
ولا نسيتن مني كيف حنونه فيكن
صبن سلم بناتي صبن
ولا نسيتي سلمى لي ماتحمل حاجه فيكن ولاعمرها بكتنكن
كان خلاص الوقت اقريب من اذن العصر
جن عماتي جايبت التوام لي ايتابكو وكانهم يندبو على موت امهم
وعلى عمر يبي يبدء بدون امهم على قزن يبي يسكن اقلوبهم وعلى فقد يبي يكبر امعاهم 💔  وعلى و و و و
....................
وحطت واحد من التوينز في كتر سلمى لي كانت تبكي وتندب
والبيبي اول ما سلمى حضنته بيدها سكت
وسلمى خير ماتسكت انهارت
ااااااااااه ياعيون امكم انتو اااااااه ياقلب امك لي وقف على شانكم ااااااااااه ياحبها لكم .
نعلي وخيتي لي مافرحت بيكم نعلي وخيتي لي ما حقتكم نعلي امي امي لي ما رت بنتها حي  علي حي علي عدت وهي اتوصي فيا عليكم وعل امكم حي عليا شن نقوللها شن نقول بس شن انقول
عزو كان في حضن اعميمه سيبها وجاء لسلمى
امي امي ياسوما عدت
خدو البيبي من سلمى لي ايديها فشلن
وحضنها عزو وهو ايقول امي يانعلي امي نا من بي .امي يانعلي امي ياخواتي امي
سلمى ،، يانعلي ياخي ياناعلي ياحبيبي
امك ياعيون امك امك ياروح امك امك حي علينا امك ياخبارتنا الزينه امك امك وك امك وك وك وك
خشت ماما علينا وهي تبكي كانت تبكي على نوريه لي عدت وجت بيها جثه على عزو لي يوصي فيها على امه
وين ما ماما بانت علينا صبينا كلنا
انتنادبو
ماما تبكي مع اجديده ود لي تلاقت امعاها
الحتت في وجونا شافت سلمى كيف صاير فيها كانن اخدودها في الارض
واعميمه نجاة كيفها
ويويه ونا بس نا ويه اجروحنا مش كيفهن
عزو اول ما شاف ماما طار يجري لحضنها
ماما ،، سامحيني ياحبيبي سامحني ياعزو مقدرتش انجيبها لك كيف ماتبي سامحيني ياامي
عزو امي عدت امي عدت وسيبتني امي عدت خلاص امي عدت وخدت مني امعاها خدت اختي ليش ما خدتني نا ولدها ليش تاخد في مني
ماما لا لا متقولهش لا لا متقولهش لا بنيتي لا لا ياربي لا ياربي مني ياربي بنتي لا ياربي
حي عليا حي عليا بنتي بنتي
قعدت ماما تندب معانا على مني وماحوتنا سكتنا نحن وياها
اجديده ود صبي شوفي بنيتك هيا وخلي بناتك ايخشن ايشوفن اختهن هيا يامريم انتي انسانه مومنه
حالة ماما وسلمى كانت نفس الشي
صبينا كلنا خشينا عليها
لقينا يوسف وحوده معاها يقرو في قران عليها
كانن ادموعهم ماليات اوجوهم
ماما ،، ياحبيبتي ياامي ياحبيب امك وبنتك ياامي ياامي ياامي ياامي لي انحرمت منها ولقيتها فيكي وفكبر قلبك وعقلك ياامي ليش ياحبيبتي اتسيبيني ليش يامني ليش اتعدي ياعيوني
ربي وقلبي راضيين عليكي قلبي وربي راضيين عليك
والربح فراشك وغطاكي ياسمحتي ياغزالتي ياحبيبتي ياحنوننتي ياعيوني ياامي
ربي وقلبي راضيين عليك ياغزالة خواتك ياعمري انتي ياعمري لي يبي ينسود بلاكي يانوراتي انتي وبنيتك ياحبيبتي
طبست ماما اتبوس فيها فكل مكان من وجها
امسامحه ياعيوني امسامحه ياحنونتي امسامحه يامني
انفتح الباب وسمعنا صوت راجل ورانا يبكي بالعبره
كان بابا لي خاش محمد ماسكه من عند مرفقه
بابا لي بعد اعلم على مني طاح بين الرجاله
بابا لي عاش عمره كله بلانا اهو اليوم يبي يدفن وحده منا ومحمد لي عاش طول عمره هو بونا وهو سندنا 
خاش ايودع فبنته واخته وصاحبته
يوسف اول ما شاف محمد صبى شوره وحضنو بعضهم وقعدو ايتابكو
وماما ماسكه يد عزو فتحت يدها الثانيه لوحده لي كان يبكي وهو يقرأ فالمصفحف
انفتح الباب علينا
وخشو معتز وخالد وصافي وميدو شايلين تابوت نوريه
صبينا كلنا وحطوها فجنب مني وين ما بابا امقمعز
عزو بعد شاف تابوت امه طبس عليه يحضن فالتابوت وهو ومصكر والشباب اطلعو
طبسنا كلنا عليها بوسناها من راسها وسامحناها
عزو لي اتطبس فينا على امه ايطبس عو عليها ايبوسها
وكانه ايشكر فينا عشان سامحناها
جيت فجنبه وحضنته وقعدنا انتباكو نا وياه
خشن عماتي معاهن اعويلت مني ومدهن لماما وبابا
لي كان كل واحد فيهم قاعد عند جهه من راس مني 

Natash sa 🖤♟
سامحوني مقدرتش انكمل البارت من كثر ماهو مؤلم وقفت
استنوني ان شاءالله السبت التكمله