حبيبه

#حبيبه 🦋 26

#البارت السادس والعشرون

معتز ،، بريئه ومش متصنعه ، حساسه وقويه ، جميله وشفافه .
صافي ،، بديت اتحبها ياخوي وخبطه بشواش على قلبه
معتز ،، عزق روحه على سريره ومسك راسه بيديه الاثنين وقال ، سكنت في عقلي ، وياريت اتدويلي جرح قلبي وتسكن فيه ، مننكرش اعجابي بيها
كل يوم نكتشف حاجه جديده بنت مليانه حياه مش فاضيه كيف بنات توا
نحسها اكبر من جيلها وهضا لي عجبني فيها من الاول .

محمد ، خش عليهم سمع معتز شن يحكي
اووووو كلام قوي يا عزوو هضا

اعميمه نجاة ،، هيا يا بنات واتيات
ساره ،، خلاص ياماما كملنا غير اينزلن دبشهن بس
ماما ،، هن يومين بس مفش داعي يكرن الشناطي كلهن
اعميمه فاطمه،، كلا نا دبش العيال في ساكو واحد نا وياهم
ماما ،، اريح راس مادام مازالو اصغار

نزلن ويه ونجوى هن اول واحدات
وبعدها تمن كل مره نازلت اثنين منا

نا ،، يا سولي ماتسيبينش والله ما نعرف نصرف لي يقولي تعالي تو نركب امعاه
وصال ،، واك منك وانتي حصله في روحك وكان حد اخرى راكي اتطلعيله فالحل
نا ،، نا دوه وخلاص راء
وصال ،، نجك لي انتي من كيفك
خلينا ننزلو متأخرين وتو انرن عليه عشان اناكد
نا ،، فكينا تو ايقول ما صدقت
وصال ،، واك عليك تفكير كلا انتي

خش عمي عبدالله قال هيا اطلعن عشان انصكر الشاليه وناكد
اعميمه سليمه ،، بلكي ناخدو معانا فرشات ومخاد ونصولات
خالد ،، لا مفش داعي ، معتز نسق مع صاحبه جاب كل لي ناقص واساسآ الاستراحه مفروشه

معتز قمعز منصدم من كلام محمد ، يحسابه عرف ان يحكي على بيبا
محمد ،، شنو نعرفوها نحن ، لي عاجبتك
صافي ،، يبي ايغير الموضوع، ها شن صار جهزو اروحم ولا مازال راء الساعه قريب 9

محمد ،، تي غيري خلي هضا يقول على من يحكي
معتز ،، معتقدش انك تعرفها ، نا بروحي مزلت ما تعرفت عليها اكويس
محمد ،، يعني مش من العيله
صافي ،، صوت عمي عبدالله
معتز ،، اووووه تو يسكن ويقول تاخرتو، وهرب من الاجابه .

اعميمه سليمه ،، الاستراحه هنا
خالد ،، لا في راس اهلال

طلعنا كلنا مع بعضنا توزعنا فالسيارات
عمامي وحوده اركبو مع ميدو

محمد يبي نجوى تركب امعاه بس معرفش يتكلم
اول ما طلعت نا وصال قالي تعالن اركبن هنا
صافي ،، لا يااحميده خلينا انعبو بالسياره
وركبت في اول سياره ونا وصال عارفينها سياره صافي
نا عليك بخت احصلت مش قلتها لكي
وصال ، ، 😂😂😂😂 ديري روحك تبي الحمام ونزلي
نا ،،😂 عليك عار ، والله ما انديرها

قعدنا نا وصال نحقو فيهن ايتوزعن ع السيارات
وليد سيارته بعدنا طول وبعدها سيارة محمد
ركبن ايه ودانه ونجوى وماما في سيارت محمد
وساره واعميمه نجاة و سليمه و ايمان
في سيارة خالد
مازالت اعميمه فايزه و فاطمه اركبت مع وليد ودزت على ايه
جابها لها خالد وركبها معها
وسلمى جابها محمد وحطها معايا نا وسلمى
نا ،، والله وجت امعاكي يا سومه
سلمى ،، صك فمك ، وانتي اتنفي تو ينزلوني
جاء صافي ركب لقدام وبحت فينا من عند المرايا
صافي ،، انستن
وصال و سلمى ،، الله يأنسك
صافي ،، كنك يا بيبا
نا ،، سلامتك
طلعت سيارة ميدو هي الأولي وراها صافي
كنت انبحت بلكي انشوف معتز لكن محقيتش وين ركب
درس صافي فجنب الطريق قدام المزرعه وقدامه ميدو
طلعت سيارة خالد هي الأوله ودرس
وجت ورانا سياره محمد
برمت انبحت في البوابه بتاع المزرعه شفت معتز يحكي هو والبواب
صافي نزل من كرسي السواق وعدا شور معتز حكى معه وجاء صافي
وركب فالكرسي لي قدام سلمى ، وبعدها معتز فتح الباب وركب في كرسي السواق وقال ،،
شنو انتوكلو وكان ايبحت فالمرايا
نا مابيتش انرد هذي اول مره نركب امعاه فالسياره وكنت متزلطه بكل
صكر معتز القزاز ودار كلاكس لسيارات لي قدامه وطلعنا ماشاءالله خمس سيارات
صافي كان يدردش هو وسلمى بالرسائل ومنسجمين
وصال اسخنت من العرب لي احذاها وتمت اتدز فرسائل الاحمد
ونا انتفرج عالطريق وبعد نرفع عيني انشوف معتز وهو يبحت فيا
كانت هذي أول مره نمشي للشرق مع أن ماما كانت تحكيلنا على ايام بابا كان ايشيل فينا بس نا مش مذكره
كنت انتفرج ع الطبيعه مع أن الجو ليل بس تهبل اول ما وصلنا عند للباكور فتح معتز القزاز وكانت السياره ترقى بسرعه اقل من قبل
كنت انبحت فيه ومنذهله من جمال الطبيعه لي عندنا فبلادنا
معتز ،، شن رايك يابيبا فالمنظر
نا ،، ماشاء الله
صافي ،، كان اتشوفيه فالنهار احلى
وصال ،، امشرق كلها سمحه ماشاءالله
سلمى ،، اكيد الجبل الأخضر امشرق وادي الكوف وشحات و درنه وطبرق
معتز ،، حتى اجدابيا غير تسلم بشمسها بكل
نا ،، اكيد ليبيا كلها سمحه ربي يحفظها ويعم امنها
انطلقنا اشوي فالحكي وبعدين عم الهدوء من جديد