Unicode
လွန်ခဲ့သော ရာစုနှစ်ပေါင်းများစွာက လောကသုံးပါးကို စောင့်ရှောက်ရန်အတွက် ဓာတ်ကြီးလေးပါး ပေါ်ပေါက်လာခဲ့၏။
မြေကမ္ဘာအဖွဲ့အစည်း၊
ရေအောက်အဖွဲ့အစည်း၊
အထက်ကောင်းကင်အဖွဲ့အစည်း နှင့်
နေအဖွဲ့အစည်း ဟူ၍။
အဖွဲ့အစည်း တစ်ခုချင်းဆီက သက်ဆိုင်ရာ နယ်မြေများတွင် အလျိုလျို ဖုံးကွယ်နေထိုင်ခဲ့ကြသည်မှာ ရာစုနှစ်ပေါင်းများစွာ ကြာသည်အထိ။ ရှေးခေတ်ပတ်ဝန်းကျင်များကတည်းက တောက်လျောက် ပြောဆိုလာခဲ့ကြသည့် ပါးစပ်ရာဇဝင်များစွာ ရှိသော်ငြားလည်း ရာစုနှစ်တွေကြာလာသည်နှင့်အမျှ အမှန်တရားဟူသည်လည်း တဖြည်းဖြည်းတိမ်မြုပ်ကာ လုပ်ဇာတ်တွေသာ များပြားလာတော့၏။
မျက်မှောက်ခေတ်များထဲ မည်သူတစ်ဦးတစ်ယောက်ကမှ ၎င်းတို့အား သတိမပြုမိတော့သော်ငြား ဓာတ်ကြီးလေးပါး၏ အမည်တပ်ခံရသော အဖွဲ့အစည်းတစ်ခုချင်းအလိုက် လောကသုံးပါး ပုံမှန်လည်ပတ်နေစေရန် ၎င်းတို့၏ စွမ်းအားအမြောက်အများသုံးကာ ဆောင်ရွက်ပေးနေမြဲပင် ဖြစ်သည်။
အဖွဲ့အစည်းတစ်ခုချင်းဆီတိုင်းတွင် စောင့်ရှောက်သူ ဘွဲ့ခံယူရသည့် ခေါင်းဆောင်ရှိသည်။ ခေါင်းဆောင်တိုင်းတွင် ပါရမီဖြည့်ဖက် ကြင်ရာတော်ရှိသည်။ ကြင်ရာတော်မရှိသည့် ခေါင်းဆောင်သည် လောကကို အင်အားဖြည့်ရန် စွမ်းအားအလုံအလောက်မရှိသကဲ့သို့ ခေါင်းဆောင်မရှိသည့် ကြင်ရာတော်ကလည်း တစ်ယောက်တည်း အသက်ရှင်ကျန်ရစ်နိုင်မည်မဟုတ်။
စောင့်ရှောက်ရမည့် ခေါင်းဆောင်တိုင်းကို ကံကြမ္မာက ရွေးချယ်သတ်မှတ်သည်။ မျိုးရိုးစဥ်ဆက်အလိုက် ခေါင်းဆောင်ဘွဲ့ခံယူနိုင်စွမ်းမရှိ။ ကံကြမ္မာက သတ်မှတ်ပေးသော ခေါင်းဆောင်ကသာ အပြည့်အဝ စောင့်ရှောက်နိုင်သလို စွမ်းအားလည်း သူမတူအောင် ကြီးနိုင်သည်မို့။ သတ်မှတ်ချက်များက ရေရေရာရာမရှိ။ လူငယ်လည်း ဖြစ်နိုင်သလို လူအိုလည်းဖြစ်နိုင်သည်။ မိန်းမလည်းဖြစ်နိုင်သလို ယောကျ်ားလည်းဖြစ်နိုင်သည်။ အဆင့်နိမ့်လည်းဖြစ်နိုင်သလို အဆင့်မြင့်လည်းဖြစ်နိုင်သည်။ ကြင်ရာတော်လည်း ထိုနည်းအတိုင်းပင်။
YOU ARE READING
The LOEY
Fanfictionတောတောင်ရေမြေတို့၏ သဘာဝတရားသည် စောင့်ရှောက်သူနှင့် ကြင်ရာတော်အပေါ် မူတည်၍ဖြစ်တည်သည်။ ကြင်ရာတော်၏စိတ်သည် သဘာဝတရားဖြစ်ပြီး စောင့်ရှောက်သူက ထိုသဘာဝတရားကို ထိန်းညှိသည်။ [ ဤဇာတ်လမ်းတွင် ပါဝင်သော အကြောင်းအရာများသည် စိတ်ကူးယဥ်ဖန်တီးမှု သက်သက်သာဖြစ်၏။ ] ~ ...
