The LOEY

Part 2

Unicode

ဂွမ်းစောင်ပုံကြီးကြား ကွေးအိပ်နေသော ကောင်လေးက သိသိသာသာ တုန်ယင်နေသည်မှာ ပြတင်းပေါက်ဖွင့်ထားမိလို့ ချမ်းနေသည့်ပုံပင်။ သတိတရပင် လေတိုးဝင်နေသည့် ပြတင်းပေါက်ကို ပိတ်ပေးလိုက်သည်။ ထိုပုံစံအတိုင်းသာ တစ်ညလုံးထားပါက လေဖြတ်သေနေလိမ့်မည်မို့။ သေချာပြန်ကြည့်ကြည့်တော့ မျက်နှာပေါက်သေးသေး၊ ခန္တာကိုယ်လည်းသေးသေး၊ တိုက်ခန်းကလည်းသေးသေး၊ အကုန်သေးနေသည်ပင်။

သက်ပြင်းတစ်ချက် ခပ်ပြင်းပြင်းမှုတ်ထုတ်မိလိုက်သည်။

ဘေးတွင် အတိုင်းသားပုံထားသည့် အဝတ်အစားတို့ဘက် အကြည့်ရောက်တော့ မှုတ်ထုတ်လိုက်သည့် လေပူတို့ ပြန်ဆောင့်ဝင်လာသယောင်။ ထို့နောက် အဝတ်တွေဖရိုဖရဲ ချိတ်တင်ထားသော အဝတ်စင်တစ်ခုပေါ် အကြည့်ရောက်သည်။ ချိတ်ထားသည့် အဝတ်ကချိတ်ထားပေမယ့် တို့လို့တွဲလောင်းကျနေသည့် တချို့က လျှော်ပြီးသားလား ဝတ်ပြီးသားလား မခွဲနိုင်သည်အထိ တွန့်ကြေနေသည်။ အခန်းဝင်ပေါက်နားက ဗီရိုသေးသေးလေးပေါ်တွင်မူ ဓာတ်ပုံတချို့နှင့် စာအုပ်တွေအထပ်လိုက် ပြွတ်သိပ်ထည့်ထားသည်မို့ ကြည့်မကောင်း။

ဆယ်ပေပတ်လည်အခန်းကျဥ်းလေးသည် မည်သည့်အရာများနှင့် ပြည့်နေမှန်းပင်မသိအောင်ပင် မျက်စိရှုပ်နေသည်။ စာလုပ်ပြီး စာအုပ်တွေအထပ်လိုက် သေချာပြန်သိမ်းခဲ့သည်ပင် ကျေးဇူးတင်ရမလို။ ကြည့်ရသလောက် သပ်သပ်ရပ်ရပ်မနေသည်မဟုတ်ဘဲ သပ်ရပ်နေဖို့အချိန်မပေးနိုင်သည့်ပုံ။ ခြေချစရာနေရာရှိသည်ပင် တကယ်ကံကောင်းသည်။ မှန်ရဲ့လား နောက်တစ်ကြိမ် ဓာတ်ပုံထုတ်စစ်ကြည့်မိတော့ တစ်ပုံစံမှတစ်ပုံစံတည်းပင်။ အမှတ်ပါမပါ စစ်ဆေးဖို့ကိုတော့ နောက်ရွှေ့လိုက်သည်။ နောက်တစ်ကြိမ် သက်ပြင်းခပ်ဖြည်းဖြည်း မှုတ်ထုတ်မိပြန်သည်။ သေချာသည်ကတော့ chanyeol ရေရှည်အတွက် စိတ်ကိုဆွဲဆန့်ထားရမည်ဖြစ်သည်။

ဗီရိုပေါ်ရှိ ဓာတ်ပုံတွေကိုအကြည့်ရောက်မိတော့ ခြေကအလိုလိုလှမ်းရန် ပြင်မိသည်။ သို့သော်ငြား တစ်လှမ်းမျှသာ ရှိသေး။ chanyeol အလိုလိုရပ်တန့်လိုက်ကာ သိချင်စိတ်အစုံကိုလည်း အနောက်ပို့လိုက်သည်။ သူများအတွင်းကိစ္စက မသိတာကောင်းသည်မို့။ အထူးသဖြင့် ကံကြမ္မာနှင့် မွေးလာခဲ့သည့်သူမို့။ စောင်ပုံတွေကြားက ကောင်လေးကို နောက်တစ်ကြိမ် ကြည့်လိုက်မိတော့ နှစ်နှစ်ခြိုက်ခြိုက်အိပ်နေဆဲ။ ညအိပ်ချိန်မို့ ထိုကောင်လေးအား စိတ်ချလက်ချ ပစ်ထားခဲ့လိုက်လို့ရသော်ငြား ဒီညလပြည့်မို့ အခန်းထဲသာနေလိုက်ရန် တွေးမိသည်။